ଭୁବନେଶ୍ୱର, ୬।୧(ବ୍ୟୁରୋ): ଭଗବାନପୁର ଅଞ୍ଚଳର ଏକ ପଲିଥିନ୍ କାରଖାନାରେ ମଙ୍ଗଳବାର ଭୁବନେଶ୍ୱର ମହାନଗର ନିଗମ (ବିଏମ୍ସି)ର ଏନ୍ଫୋର୍ସମେଣ୍ଟ ସ୍କ୍ବାଡ୍ ଚଢ଼ାଉ କରିଛି। ଏହି କାରଖାନାରୁ ୨୫ କେଜି ବିଶିଷ୍ଟ ୬୯ଟି ପଲିଥିନ୍ କ୍ୟାରିବ୍ୟାଗ୍ ବସ୍ତା ଜବତ କରାଯିବା ସହ ମାଲିକଙ୍କୁ ୧୦ ହଜାର ଟଙ୍କା ଜରିମାନା କରାଯାଇଛି। ଡି.ଏନ୍. ରେଗାଲିଆ ମଲ୍ ପଛପଟେ ଥିବା ଏହି କାରଖାନାକୁ ବିଏମ୍ସି ଦକ୍ଷିଣ-ପଶ୍ଚିମ ଜୋନ୍ର ଏନ୍ଫୋର୍ସମେଣ୍ଟ ସ୍କ୍ବାଡ୍ ଅଚାନକ ପରିଦର୍ଶନ କରିବାକୁ ଯିବାବେଳେ ବହୁ ପରିମାଣର ବେଆଇନ୍ ପଲିଥିନ୍ କ୍ୟାରିବ୍ୟାଗ୍ ଦେଖିବାକୁ ପାଇଥିଲେ। ବିଏମ୍ସି ଟିମ୍ ସହ ପୋଲିସ୍ ଫୋର୍ସଙ୍କୁ ଦେଖି କାରଖାନାର କର୍ମଚାରୀମାନେ ବେଆଇନ୍ ସାମଗ୍ରୀଗୁଡ଼ିକୁ ବାହାରେ ଫିଙ୍ଗିଦେବାକୁ ଚେଷ୍ଟା କରିଥିଲେ। ତେବେ ଏହି ସମୟରେ ସେଗୁଡ଼ିକୁ ଏନ୍ଫୋର୍ସମେଣ୍ଟ ଟିମ୍ ଜବତ କରିଥିଲା।
ସୂଚନା ଅନୁଯାୟୀ, ପୂର୍ବବର୍ଷ ବେଆଇନ୍ କାର୍ଯ୍ୟ ପାଇଁ ଧରାପଡ଼ିଥିବା ଉକ୍ତ କାରଖାନା କିପରି କଟକଣା ମାନୁଛି ତାହା ପରଖିବାକୁ ମଙ୍ଗଳବାର ଦକ୍ଷିଣ-ପଶ୍ଚିମ ଜୋନ୍ର ଏନ୍ଫୋର୍ସମେଣ୍ଟ ଟିମ୍, ପୋଲିସ୍ ଏବଂ ସେଣ୍ଟ୍ରାଲ୍ ଏନ୍ଫୋର୍ସମେଣ୍ଟ ଟିମ୍ ଯାଇଥିଲେ। କାରଖାନାରେ ବିଭିନ୍ନ ଉତ୍ପାଦିତ ଦ୍ରବ୍ୟକୁ ଦେଖିବା ପରେ ୬୯ଟି ୨୫କେଜି ବିଶିଷ୍ଟ ପଲିଥିନ୍ କ୍ୟାରିବ୍ୟାଗ୍ ବସ୍ତା ଠାବ କରିଥିଲେ। ପରେ ଦକ୍ଷିଣ-ପଶ୍ଚିମ ଜୋନ୍ର ଜୋନାଲ୍ ଡେପୁଟି କମିଶନର ରବିନାରାୟଣ ଜେଠୀ ଉକ୍ତ କାରଖାନାକୁ ଯାଇ ବେଆଇନ୍ ସାମଗ୍ରୀଗୁଡ଼ିକ ନମୁନା ସଂଗ୍ରହ କରି ପରୀକ୍ଷା ପାଇଁ ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡକୁ ଜଣାଇଥିଲେ। ପ୍ରଦୂଷଣ ନିୟନ୍ତ୍ରଣ ବୋର୍ଡର ପରିବେଶ ବିଜ୍ଞାନୀ ରେବତୀ ମିଶ୍ରଙ୍କ ସହିତ ଲ୍ୟାବ୍ ଆନାଲିଷ୍ଟମାନେ ଆସି ବେଆଇନ୍ ପଲିଥିନ୍ ସାମଗ୍ରୀଗୁଡ଼ିକୁ ଚିହ୍ନଟ କରିଥିଲେ। ଏହାପରେ ଡେପୁଟି କମିଶନର ଶୁଭେନ୍ଦୁ କୁମାର ସାହୁଙ୍କ ନିର୍ଦ୍ଦେଶକ୍ରମେ ବିଏମ୍ସି ଏସ୍ବିଏ ସେଲ୍ର ଏନ୍ଭାୟରନ୍ମେଣ୍ଟ ଏକ୍ସପର୍ଟ କୀର୍ତ୍ତିମାନ୍ ଷଡ଼ଙ୍ଗୀ ଏବଂ ସୁନିଲ୍ କୁମାର ସାମଲ ଉକ୍ତ କାରଖାନାକୁ ଯାଇ ବେଆଇନ୍ ସାମଗ୍ରୀ ଗୁଡ଼ିକର ସମୀକ୍ଷା କରିବା ସହିତ ଏସବୁର ବିବରଣୀ ବିଏମ୍ସିକୁ ହସ୍ତାନ୍ତର କରିଛନ୍ତି। ଭବିଷ୍ୟତରେ ଏପରି ସାମଗ୍ରୀ ଉତ୍ପାଦନ ନ କରିବାକୁ କାରଖାନା କର୍ତ୍ତୃପକ୍ଷଙ୍କୁ କଡ଼ା ଚେତବନୀ ଦିଆଯାଇଛି। ଭୁବନେଶ୍ୱର ମହାନଗର ନିଗମାଞ୍ଚଳକୁ ପଲିଥିନ୍ ଏବଂ ଏକକ ବ୍ୟବହାରଯୁକ୍ତ ପ୍ଲାଷ୍ଟିକ୍ଠାରୁ ଦୂରେଇ ରଖି ପରିବେଶବନ୍ଧୁ ସହର କରି ଗଢ଼ି ତୋଲିବାର ପ୍ରୟାସ ଜାରି ରହିଛି ବୋଲି କର୍ତ୍ତୃପକ୍ଷ କହିଛନ୍ତି।
