ଚିତ୍ରଦୁର୍ଗ,୪ା୮: କଂଗ୍ରେସ ନେତା ରାହୁଲ ଗାନ୍ଧୀ ଦିନେ ତାଙ୍କ ଜେଜେ ମା’ ଇନ୍ଦିରା ଗାନ୍ଧୀ ଓ ବାପା ରାଜୀବ ଗାନ୍ଧୀଙ୍କ ଭଳି ପ୍ରଧାନମନ୍ତ୍ରୀ ହେବେ ବୋଲି କର୍ନାଟକ ସ୍ଥିତ ଶ୍ରୀ ମୁରୁଗାରାଜେନ୍ଦ୍ର ମଠର ଜଣେ ସାଧୁ ଭବିଷ୍ୟବାଣୀ କରିଛନ୍ତି।
ଆସନ୍ତା ବର୍ଷ କର୍ନାଟକରେ ବିଧାନସଭା ନିର୍ବାଚନ ହେବାକୁ ଥିବାବେଳେ ରାହୁଲ ବୁଧବାର ଦକ୍ଷିଣ ଭାରତର ଏହି ରାଜ୍ୟକୁ ଗସ୍ତ କରିଛନ୍ତି।
ଚିତ୍ରଦୁର୍ଗର ପ୍ରସିଦ୍ଧ ମୁରୁଗା ମଠରେ ସେ ଲିଙ୍ଗାୟତ ସମ୍ପ୍ରଦାୟର ଦୀକ୍ଷା ନେଇଛନ୍ତି। ରାହୁଲ ମଠାଧିଶ ଶିବମୂର୍ତ୍ତି ମୁରୁଗା ଶରଣରୁଙ୍କୁ ଭେଟି ତାଙ୍କ ଆଶୀର୍ବାଦ ନେଇଥିଲେ। ଏହି ଅବସରରେ ସେଠାରେ ଉପସ୍ଥିତ ସନ୍ଥ କହିଥିଲେ, ଇନ୍ଦିରା ଓ ରାଜୀବ ଲିଙ୍ଗାୟତ ଦୀକ୍ଷା ନେଇଥିଲେ। ଏବେ ରାହୁଲ ମଧ୍ୟ ଦୀକ୍ଷା ନେଇଛନ୍ତି।
ସେ ମଧ୍ୟ ଦିନେ ଭାରତର ପ୍ରଧାନମନ୍ତ୍ରୀ ହେବେ। ଏହା ଶୁଣି ଶିବମୂର୍ତ୍ତି କହିଥିଲେ, ଏପରି କୁହନ୍ତୁ ନାହିଁ। ଏହା ଉପଯୁକ୍ତ ମଞ୍ଚ ନୁହେଁ। ଲୋକେ ନିଷ୍ପତ୍ତି ନେବେ। ପ୍ରକାଶ ଯେ, କର୍ନାଟକ ଜନସଂଖ୍ୟାର ୧୭% ହେଉଛନ୍ତି ଲିଙ୍ଗାୟତ, ଯାହାଙ୍କୁ ଭାଜପାର ପାରମ୍ପରିକ ଭୋଟର ବିବେଚନା କରାଯାଏ। ଭାଜପା ଶାସିତ ଏହି ରାଜ୍ୟରେ କ୍ଷେତ୍ର ପ୍ରସ୍ତୁତି ପାଇଁ ରାହୁଲ ଲିଙ୍ଗାୟତ ଦୀକ୍ଷା ନେଇଥିବା କୁହାଯାଉଛି।
