ନୂଆଦିଲ୍ଲୀ,୨୦।୬: ନ୍ୟାଶନାଲ୍ ହେରାଲ୍ଡ ମନି ଲଣ୍ଡରିଂ ମାମଲାରେ ସୋମବାର କଂଗ୍ରେସ ନେତା ରାହୁଲ ଗାନ୍ଧୀ ଚତୁର୍ଥ ରାଉଣ୍ଡ ପଚରାଉଚରା ପାଇଁ ଏନଫୋର୍ସମେଣ୍ଟ ନିର୍ଦ୍ଦେଶାଳୟ (ଇଡି) ରେ ହାଜର ହୋଇଛନ୍ତି। ସେ ସିଧାସଳଖ କଂଗ୍ରେସ କାର୍ଯ୍ୟାଳୟରୁ ଇଡି କାର୍ଯ୍ୟାଳୟକୁ ଯାଇଥିଲେ। ଭଉଣୀ ପ୍ରିୟଙ୍କା ଗାନ୍ଧୀ ମଧ୍ୟ ତାଙ୍କ ସହ ଇଡି କାର୍ଯ୍ୟାଳୟରେ ପହଞ୍ଚିଥିଲେ। ଏହାପୂର୍ବରୁ ରାହୁଲ ଗାନ୍ଧୀ ଲଗାତାର ତିନି ଦିନ ଇଡିରେ ହାଜର ହୋଇ ନିଜର ବିବୃତ୍ତି ରେକର୍ଡ କରିଛନ୍ତି। ଏହି ସମୟରେ କଂଗ୍ରେସ ଦଳର ବହୁ ବଡ ନେତା ଓ କର୍ମୀ ଦିଲ୍ଲୀରେ ବିରୋଧ କରିଥିଲେ।
ଏଠାରେ ରାହୁଲ ଗାନ୍ଧୀଙ୍କ ପଚରାଉଚରା ପୂର୍ବରୁ କଂଗ୍ରେସ ଆଜି ଘୋଷଣା କରିଛି ଯେ, ଦଳର ନେତା ଓ କର୍ମୀମାନେ ଇଡି କାର୍ଯ୍ୟାଳୟକୁ ଯିବେ ନାହିଁ, ବରଂ ଜନ୍ତର ମନ୍ତରରେ ଏକ ସତ୍ୟାଗ୍ରହ କରିବେ। ତେବେ ଦିଲ୍ଲୀ ପୋଲିସ ସେଠାରେ ଏକ ହଜାର ଲୋକଙ୍କୁ ଏକାଠି ହେବାକୁ ଅନୁମତି ଦେଇଛି। କଂଗ୍ରେସ କହିଛି ଯେ, କେନ୍ଦ୍ର ସରକାରଙ୍କ ବିରୋଧରେ ସାରା ଦେଶରେ ଶାନ୍ତିପୂର୍ଣ୍ଣ ପ୍ରଦର୍ଶନ କରାଯିବ।
ଏହାପୂର୍ବରୁ କଂଗ୍ରେସର ତୀବ୍ର ବିରୋଧ ମଧ୍ୟରେ ଇଡି ରାହୁଲ ଗାନ୍ଧୀଙ୍କୁ ଜୁନ ୧୩ରୁ ୧୫ ପର୍ଯ୍ୟନ୍ତ ଦିଲ୍ଲୀରେ ଲଗାତାର ତିନି ଦିନ ପ୍ରଶ୍ନ କରିଥିଲା। ରାହୁଲ ଗାନ୍ଧୀ ତାଙ୍କ ମା’ ତଥା ଦଳର ଅଧ୍ୟକ୍ଷା ସୋନିଆ ଗାନ୍ଧୀଙ୍କ ସ୍ବାସ୍ଥ୍ୟାବସ୍ଥା ଖରାପ ଥିବା ଦର୍ଶାଇ ଜୁନ ୧୭ରୁ ଜୁନ ୨୦ ପର୍ଯ୍ୟନ୍ତ ପଚରାଉଚରା ସ୍ଥଗିତ ରଖିବାକୁ ଇଡିଙ୍କୁ ଅନୁରୋଧ କରିଥିଲେ।
