ନୂଆଦିଲ୍ଲୀ,୨୬।୧: ଦୁଇ ଦୁଇଥର ଅନୁରୋଧ କଲେ ରାଷ୍ଟ୍ରପତି ଦ୍ରୌପଦୀ ମୁର୍ମୁ, ହେଲେ କର୍ଣ୍ଣପାତ କଲେନି ରାହୁଲ ଗାନ୍ଧୀ। ଆଗରୁ ଅନେକ ଥର ରାହୁଲ ବରିଷ୍ଠ ମାନଙ୍କୁ ହତାଦର କରିବାର ନଜିର ରହିଛି। ଏବେ ସେ ରାଷ୍ଟ୍ରପତିଙ୍କ ଅନୁରୋଧକୁ ମଧ୍ୟ ଖାତିର କରି ନାହାନ୍ତି।
ସୋମବାର ସାଧାରଣତନ୍ତ୍ର ଦିବସ ଅବସରରେ ରାଷ୍ଟ୍ରପତି ଭବନରେ ଆୟୋଜିତ ହୋଇଥିଲା ‘ଆଟ୍ ହୋମ୍’ କାର୍ଯ୍ୟକ୍ରମ। ଏଥିରେ ଲୋକସଭା ବିରୋଧୀ ଦଳ ନେତା ରାହୁଲ ଗାନ୍ଧୀ ଉତ୍ତର-ପୂର୍ବ ଭାରତର ପାରମ୍ପରିକ ‘ପଟ୍କା’ ପିନ୍ଧି ନଥିବା ଅଭିଯୋଗ ହୋଇଛି। ଏହାକୁ ନେଇ ଭାଜପା ଏବଂ କଂଗ୍ରେସ ମଧ୍ୟରେ ରାଜନୈତିକ ଯୁଦ୍ଧ ଆରମ୍ଭ ହୋଇଛି।
ଭାଜପା ଆଇଟି ସେଲ୍ ମୁଖ୍ୟ ଅମିତ ମାଲବ୍ୟ ଦାବି କରିଛନ୍ତି ଯେ, ରାଷ୍ଟ୍ରପତି ଦ୍ରୌପଦୀ ମୁର୍ମୁ ଦୁଇଥର ଅନୁରୋଧ କରିବା ସତ୍ତ୍ୱେ ରାହୁଲ ଗାନ୍ଧୀ ପଟ୍କା ପିନ୍ଧିବାକୁ ମନା କରିଥିଲେ। ପ୍ରଧାନମନ୍ତ୍ରୀଙ୍କଠାରୁ ଆରମ୍ଭ କରି ବିଦେଶୀ ପ୍ରତିନିଧି ଏବଂ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖାଡ଼ଗେ ମଧ୍ୟ ଏହି ପଟ୍କା ପିନ୍ଧିଥିଲେ।
ଏହି ଘଟଣାକୁ ନେଇ ଆସାମ ମୁଖ୍ୟମନ୍ତ୍ରୀ ରାହୁଲଙ୍କ ଏହି ଆଚରଣକୁ “ଅତ୍ୟନ୍ତ ସମ୍ବେଦନହୀନ” ଏବଂ “ଉତ୍ତର-ପୂର୍ବବାସୀଙ୍କ ପ୍ରତି ଅପମାନ” ବୋଲି କହିଛନ୍ତି। ଏଥିପାଇଁ ସେ ରାହୁଲଙ୍କ କ୍ଷମା ପ୍ରାର୍ଥନା ଦାବି କରିଛନ୍ତି।
ଭାଜପାର ଏହି ଆକ୍ରମଣକୁ କଂଗ୍ରେସ ପ୍ରତ୍ୟାଖ୍ୟାନ କରିବା ସହ ଏହାକୁ ଏକ ଅଣ-ପ୍ରସଙ୍ଗ ବୋଲି କହିଛି। କଂଗ୍ରେସ ନେତା ପବନ ଖେରା ପ୍ରତିରକ୍ଷା ମନ୍ତ୍ରୀ ରାଜନାଥ ସିଂଙ୍କ ଏକ ଫଟୋ ସେୟାର କରିଛନ୍ତି, ଯେଉଁଥିରେ ସେ ମଧ୍ୟ ପଟ୍କା ପିନ୍ଧି ନାହାନ୍ତି। ହିମନ୍ତ ବିଶ୍ୱ ଶର୍ମା କ’ଣ ରାଜନାଥ ସିଂଙ୍କଠାରୁ ମଧ୍ୟ କ୍ଷମା ମାଗିବେ କି ବୋଲି ସେ ପ୍ରଶ୍ନ କରିଛନ୍ତି।
ସେହିପରି କଂଗ୍ରେସ ନେତା ଅଜୟ କୁମାର ଲାଲୁ କହିଛନ୍ତି ଯେ ଭାଜପା କେବଳ ଅପପ୍ରଚାର ଚଳାଇଛି। ସାଧାରଣତନ୍ତ୍ର ଦିବସ କାର୍ଯ୍ୟକ୍ରମରେ ବିରୋଧୀ ଦଳର ନେତାଙ୍କୁ ଦିଆଯାଇଥିବା ଆସନ ବ୍ୟବସ୍ଥା ଭାଜପାର ମାନସିକତାକୁ ଦର୍ଶାଉଛି।
