ନୂଆଦିଲ୍ଲୀ,୨୧।୭: ମଙ୍ଗଳବାର ନିଟ୍ (NEET) ପେପର ଲିକ୍ ମାମଲାରେ କକରୋଚ ଜନତା ପାର୍ଟି ଏବଂ ଦେଶବାସୀଙ୍କ ବିରୋଧ ପ୍ରଦର୍ଶନ ଜାରି ରହିଛି। ଏଥିରେ ଏବେ କଂଗ୍ରେସ ନେତା ରାହୁଲ ଗାନ୍ଧୀ, ପ୍ରିୟଙ୍କା ଗାନ୍ଧୀଙ୍କ ସମେତ ଅନେକ ବରିଷ୍ଠ ନେତା ପ୍ରବେଶ କରିଛନ୍ତି। କଂଗ୍ରେସର ବରିଷ୍ଠ ନେତାମାନେ ପ୍ରଧାନମନ୍ତ୍ରୀଙ୍କ ବାସଭବନ ନିକଟରେ ବସି ଧାରଣା ଦେଉଛନ୍ତି। ଏହି ସମୟରେ ରାହୁଲ ଗାନ୍ଧୀ ସୋସିଆଲ ମିଡିଆ ପ୍ଲାଟଫର୍ମ X ରେ ପୋଷ୍ଟ କରି ଅଧିକରୁ ଅଧିକ ସଂଖ୍ୟାରେ ଏହି ଧାରଣାରେ ସାମିଲ ହେବାକୁ ଲୋକଙ୍କୁ ନିବେଦନ କରିଛନ୍ତି।
छात्रों पर हमला हर भारतीय परिवार पर हमला है।
प्रधानमंत्री मोदी को लगता है कि वो बिना जवाब दिए, बिना किसी नतीजे का सामना किए बच निकलेंगे – नहीं कर पाएंगे, इस बार तो बिल्कुल नहीं।
मैं हर उस देशभक्त भारतीय से अपील करता हूं जो मानता है कि हमारे छात्रों को न्याय मिलना चाहिए -…
— Rahul Gandhi (@RahulGandhi) July 21, 2026
ରାହୁଲ ଗାନ୍ଧୀ ପୋଷ୍ଟ କରିଛନ୍ତି- “ଛାତ୍ରଛାତ୍ରୀଙ୍କ ଉପରେ ଆକ୍ରମଣ ପ୍ରତ୍ୟେକ ଭାରତୀୟ ପରିବାର ଉପରେ ଆକ୍ରମଣ। ପ୍ରଧାନମନ୍ତ୍ରୀ ମୋଦୀ ଭାବୁଛନ୍ତି ଯେ ସେ ବିନା ଉତ୍ତର ଦେଇ ଏବଂ ବିନା କୌଣସି ପରିଣାମ ଭୋଗି ଖସିଯିବେ। ସେ ଏଥର ଆଦୌ ଏପରି କରିପାରିବେ ନାହିଁ।”
ସେ ଆହୁରି କହିଛନ୍ତି- “ଯେଉଁ ଦେଶପ୍ରେମୀ ଭାରତୀୟମାନେ ବିଶ୍ୱାସ କରନ୍ତି ଯେ ଆମର ଛାତ୍ରଛାତ୍ରୀମାନଙ୍କୁ ନ୍ୟାୟ ମିଳିବା ଉଚିତ୍, ମୁଁ ସେମାନଙ୍କୁ ପ୍ରଧାନମନ୍ତ୍ରୀଙ୍କ ବାସଭବନ ଆଗରେ ଆମ ଧାରଣାରେ ସାମିଲ ହେବାକୁ ନିବେଦନ କରୁଛି। ଭାରତର ଛାତ୍ରଛାତ୍ରୀଙ୍କ ସ୍ୱରକୁ ଅଣଦେଖା କରାଯାଇପାରିବ ନାହିଁ।”
ଲୋକ କଲ୍ୟାଣ ମାର୍ଗରେ ଚାଲିଥିବା କଂଗ୍ରେସର ଏହି ବିକ୍ଷୋଭ ପ୍ରଦର୍ଶନରେ କେ. ସି. ଭେଣୁଗୋପାଳ, ପବନ ଖେଡ଼ା ଏବଂ ଅନ୍ୟାନ୍ୟ ନେତାମାନେ ମଧ୍ୟ ସାମିଲ ହୋଇଛନ୍ତି। ଧାରଣା ଦେଉଥିବା କଂଗ୍ରେସ ନେତାମାନଙ୍କୁ ହଟାଇବା ପାଇଁ ପୋଲିସ ସେଠାରେ ପହଞ୍ଚିଥିଲା। ଏହି ସମୟରେ ପୋଲିସ ସହିତ ସେମାନଙ୍କର ଧସ୍ତାଧସ୍ତି ମଧ୍ୟ ହୋଇଥିଲା। ଏହାପରେ ପୋଲିସ ଅନେକ କଂଗ୍ରେସ ନେତାଙ୍କୁ ଅଟକ ରଖିଛି।
ଧାରଣା ସ୍ଥଳରେ କେନ୍ଦ୍ରୀୟ ମନ୍ତ୍ରୀ ଜିତେନ୍ଦ୍ର ସିଂହ ପହଞ୍ଚିଥିଲେ। ସେଠାରେ ସେ ରାହୁଲ ଗାନ୍ଧୀଙ୍କ ସହ କଥାବାର୍ତ୍ତା କରି ଧାରଣା ଶେଷ କରିବାକୁ ତାଙ୍କୁ ବୁଝାଇବାକୁ ଚେଷ୍ଟା କରିଥିଲେ। ସୂଚନାଯୋଗ୍ୟ ଯେ, ରାହୁଲ ଗାନ୍ଧୀ, ପ୍ରିୟଙ୍କା ଗାନ୍ଧୀ ଏବଂ ମଲ୍ଲିକାର୍ଜୁନ ଖଡ଼ଗେ ନିଜ ହାତଗୁଡ଼ିକୁ କେବୁଲ୍ ଜିପ୍ ଟାଇ (cable zip tie) ରେ ବାନ୍ଧିଥିଲେ। ସେହିପରି ଧାରଣାରେ ସାମିଲ ହେବାକୁ ଆସିଥିବା ସମସ୍ତ କଂଗ୍ରେସ ନେତାଙ୍କୁ ରାହୁଲ ଗାନ୍ଧୀ ନିଜେ କେବୁଲ୍ ଜିପ୍ ଟାଇ ବାଣ୍ଟିଥିଲେ।