କେନ୍ଦୁଝର,୬।୧୧(ନରେଶ ଚନ୍ଦ୍ର ପଟ୍ଟନାୟକ): କେନ୍ଦୁଝର ଜିଲା ସରକାରୀ ଇଞ୍ଜିନିୟରିଂ କଲେଜରେ ରାଗିଂ ଅଭିଯୋଗ ହୋଇଛି। ତୃତୀୟ ବର୍ଷର କେତେକ ଛାତ୍ରଙ୍କ ଆକ୍ରମଣରେ ଜଣେ ଦ୍ୱିତୀୟ ବର୍ଷର ଛାତ୍ର ଗୁରୁତର ହେବା ଘଟଣା ଚର୍ଚ୍ଚାର ବିଷୟ ପାଲଟିଛି।
ମଙ୍ଗଳବାର ବିଳମ୍ବିତ ରାତିରେ ଏହି ଘଟଣା ଘଟିଥିବା ବେଳେ ଆହତ ଛାତ୍ରଙ୍କୁ ଜିଲା ମୁଖ୍ୟ ଡାକ୍ତରଖାନାରେ ଚିକିତ୍ସା ପାଇଁ ଭର୍ତ୍ତି କରାଯାଇଛି। ଆହତ ଛାତ୍ରଙ୍କ ନାମ ବିଶ୍ୱଜିତ ବେହେରା। ଘର କେନ୍ଦୁଝର ଜିଲା କୋଳିପଶି ଗ୍ରାମରେ ବୋଲି ଜଣାପଡ଼ିଛି। କଲେଜର ଅଧ୍ୟକ୍ଷ ଓ ଅନ୍ୟ ଅଧ୍ୟାପକମାନେ ଡାକ୍ତରଖାନାରେ ରହି ଚିକିତ୍ସା ସୁବିଧା କରୁଛନ୍ତି। ସେହିପରି ଖବର ପାଇ ଟାଉନ ଥାନା ପୋଲିସ ମେଡିକାଲକୁ ଯାଇ ଘଟଣାର ଅନୁସନ୍ଧାନ ଆରମ୍ଭ କରିଛନ୍ତି।
ଏହି ଘଟଣାରେ ୪ ଜଣ ତୃତୀୟ ବର୍ଷର ଛାତ୍ରଙ୍କ ସଂପୃକ୍ତି ଥିବା ଜଣାପଡିଛି। ଏହି ଘଟଣାକୁ ନେଇ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଅଧ୍ୟକ୍ଷ ସରୋଜ ଷଡ଼ଙ୍ଗୀ କହିଛନ୍ତି। ତୃତୀୟ ବର୍ଷର ଛାତ୍ରମାନେ ରାତିରେ ବଳଦେବ ହଷ୍ଟେଲରେ ପଶି ବିଶ୍ୱଜିତ୍ଙ୍କୁ ଲୁହା ରଡରେ ମାଡ ମାରିଥିବା ଅଭିଯୋଗ ହୋଇଛି।
