ରିଷିଡା:୫।୧୦(ସୁଶାନ୍ତ ମଲ୍ଲିକ): କଳାହାଣ୍ଡି ଜିଲା କର୍ଲାମୁଣ୍ଡା ବ୍ଲକ ରିଷିଡ଼ାଠାରେ ରାବଣ ପୋଡି କାର୍ଯ୍ୟକ୍ରମ ଅନୁଷ୍ଠିତ ହୋଇଛି। ଅସତ୍ୟ ଉପରେ ସତ୍ୟର ବିଜୟର ପ୍ରତୀକ ବିଜୟାଦଶମୀ ଉପଲକ୍ଷେ ରିଷିଡ଼ାରେ ହେବାକୁ ଥିବା ରାବଣ ପୋଡ଼ିରେ ପ୍ରବଳ ବର୍ଷା ଯୋଗୁ ରାବଣ ପୋଡି ହୋଇପାରି ନ ଥିଲା । ତେଣୁ ଗତ ଚାରି ତାରିଖ ଶନିବାର ରାବଣ ପୋଡି ଉତ୍ସବ ଅନୁଷ୍ଠିତ ହୋଇଯାଇଛି। ପଞ୍ଚାୟତ ପରିସରରେ ଥିବା ଖେଳପଡ଼ିଆରେ ବିଶାଳ ରାବଣ ପ୍ରତିମା ଦହନ ହେବାର ଝଲକ ଦେଖିବା ପାଇଁ ଲୋକଙ୍କର ଭିଡ ଲାଗିଥିଲା। ରାତି ୯ଟା ସମୟରେ ରାବଣ ଦହନ ସଫଳତାର ସହିତ ପାଳନ ହୋଇଥିଲା। ଏହି କାର୍ଯ୍ୟକ୍ରମରେ ନର୍ଲା ବିଧାୟକଙ୍କ ସ୍ବାମୀ ତଥା ନର୍ଲା ବ୍ଲକ ଉପାଧ୍ୟାକ୍ଷ ଦୁର୍ଗାପ୍ରସାଦ ମହାନ୍ତି (ମୁନା) ମୁଖ୍ୟ ଅତିଥି ଭାବେ ଉପସ୍ଥିତ ହୋଇ ପାରମ୍ପାରିକ ରୀତିରେ ତୀର ମାରି ରାବଣ ପ୍ରତିମୂର୍ତ୍ତିରେ ଅଗ୍ନି ସଂଯୋଗ କରିଥିଲେ । ସରପଞ୍ଚ ସେବତୀ ରଣା, ସମିତି ସଭ୍ୟ ନିମାଇଁ ଚରଣ ବେହେରା, ଉଦ୍ୟୋଗପତି ଶିବଲାଲ କେଡ଼ିଆ ସମ୍ମାନିତ ଅତିଥି ଭାବରେ ଉପସ୍ଥିତ ଥିବା ବେଳେ ମଞ୍ଚ ପରିଚାଳନା କରିଥିଲେ। ନରୋତ୍ତମ ସେଲମା, ରାବଣ ପୋଡ଼ି ସମୟରେ ‘ଜୟ ଶ୍ରୀରାମ’ ଧ୍ୱନିରେ ପୁରା ପରିସର ପ୍ରକମ୍ପିତ ହୋଇଉଠିଥିଲା। ଦୁର୍ଗାପୂଜା କମିଟି ପକ୍ଷରୁ ଡ୍ୟାନ୍ସ ପ୍ରତିଯୋଗିତା ପ୍ରଦର୍ଶନୀ ସହ ଏହି ଉତ୍ସବ ଲୋକମାନଙ୍କୁ ଧର୍ମ ଓ ସତ୍ୟର ପଥରେ ଅଗ୍ରସର ହେବାର ପ୍ରେରଣା ଦେଇଥିଲା। ଉକ୍ତ କାର୍ଯ୍ୟକ୍ରମରେ ମୁଖ୍ୟ ପୂଜକ ରୁଦ୍ର ମଣି ଦାସ ସହଯୋଗୀ ମନୁ ଦାସ, ଦାୟିତ୍ୱ ନିର୍ବାହ କରୁଥିବା ବେଳେ ପୂଜା କର୍ତ୍ତା ଭାବରେ ଅବସରପ୍ରାପ୍ତ ଶିକ୍ଷକ କ୍ଷୀରସାଗର ରଣା ଓ ତାଙ୍କ ଧର୍ମ ପତ୍ନୀ ରହିଛନ୍ତି। କମିଟିର ସଭାପତି ଭାବେ ଅଶୋକ କୁମାର ତ୍ରିପାଠୀ ଉପସଭାପତି ନରୋତ୍ତମ ସେଲମା ସମ୍ପାଦକ ଦୁଷ୍ମନ୍ତ ଲେଙ୍କା ସହ ସମ୍ପାଦକ ରଞ୍ଜନ କୁମାର ନାଏକ, ଏବଂ ଗ୍ରାମର ଯୁବ ଗୋଷ୍ଠୀ ବୁଦ୍ଧିଜିବୀ ତତ୍ୱାବଧାନରେ ସମସ୍ତ କାର୍ଯ୍ୟକ୍ରମ ପରିଚାଳନା ହେଉଥିବା ବେଳେ ଶନିବାର ପୂର୍ଣ୍ଣାଙ୍ଗ ସହ ପରିସମାପ୍ତି ହୋଇଯାଇଛି।
