ଢେଙ୍କାନାଳ,୨୮ା୧୧: ଦକ୍ଷିଣ ଆଫ୍ରିକା ବିପକ୍ଷ ଘରୋଇ ଟେଷ୍ଟ୍ ସିରିଜରେ ଭାରତର ୦-୨ ପରାଜୟ ପରେ ଦଳର ପରିବର୍ତ୍ତନ ରଣନୀତିକୁ ନେଇ ପ୍ରଶ୍ନ ଉଠିଛି। ଏହି ପ୍ରସଙ୍ଗରେ ପୂର୍ବତନ ସ୍ପିନର ରବିଚନ୍ଦ୍ରନ୍ ଅଶ୍ୱିନ୍ ମତ ଦେଇଛନ୍ତି ଯେ ତାଙ୍କ ସହ ବିରାଟ କୋହଲି ଏବଂ ରୋହିତ ଶର୍ମା ଆହୁରି ଅଧିକ ସମୟ ଟେଷ୍ଟ୍ ଫର୍ମାଟ୍ରେ ରହି ଯୁବ ଖେଳାଳିମାନଙ୍କୁ ପ୍ରସ୍ତୁତ କରିବାରେ ସାହାଯ୍ୟ କରିପାରିଥାଆନ୍ତେ, କିନ୍ତୁ ଭବିଷ୍ୟତ ବିଷୟରେ ସ୍ପଷ୍ଟତା ନଥିବାରୁ ଏହା ସମ୍ଭବ ହୋଇପାରିଲା ନାହିଁ।
“ପରିବର୍ତ୍ତନ ପାଇଁ ଏକ ନିର୍ଦ୍ଦିଷ୍ଟ ପଥ ରହିବା ଉଚିତ୍। ଯେତେବେଳେ କୌଣସି ସ୍ପଷ୍ଟତା ନଥାଏ, ଏହା ଏକ ବ୍ୟକ୍ତିଗତ ନିଷ୍ପତ୍ତିରେ ପରିଣତ ହୁଏ। ବିରାଟ, ରୋହିତ ଓ ମୁଁ ନୂଆ ଖେଳାଳିମାନଙ୍କୁ ପ୍ରସ୍ତୁତ କରିପାରିଥାଆନ୍ତୁ। ଜ୍ଞାନର ଆଦାନପ୍ରଦାନର ଗୁରୁତ୍ୱ ବିଷୟରେ ମୁଁ ସବୁବେଳେ କହି ଆସିଛି, କିନ୍ତୁ ଏହା କେବେବି ଆମର ଶକ୍ତି ନଥିଲା।”
ଅନ୍ୟପକ୍ଷରେ, ଭାରତୀୟ ବ୍ୟାଟିଂ କିମ୍ବଦନ୍ତୀ ସୁନୀଲ ଗାଭାସ୍କର ଅଶ୍ୱିନଙ୍କ ଏହି ମନ୍ତବ୍ୟକୁ ଖଣ୍ଡନ କରିଛନ୍ତି। ଗାଭାସ୍କରଙ୍କ ମତରେ କୋହଲି, ରୋହିତ ଏବଂ ଅଶ୍ୱିନଙ୍କ ଅବସର ନିଷ୍ପତ୍ତି ସମ୍ପୂର୍ଣ୍ଣ ରୂପେ ସେମାନଙ୍କର ଥିଲା ଏବଂ ଏଥିପାଇଁ ଟିମ୍ ମ୍ୟାନେଜମେଣ୍ଟକୁ ଦାୟୀ କରିବା ଠିକ୍ ନୁହେଁ।
“ସେମାନେ ନିଜେ ଅବସର ନେବାକୁ ନିଷ୍ପତ୍ତି ନେଇଥିବେ। ହୁଏତ ସେମାନଙ୍କୁ ଭବିଷ୍ୟତ ବିଷୟରେ ଚିନ୍ତା କରିବାକୁ କୁହାଯାଇଥିବ। କିନ୍ତୁ ଆମେ ଏହା କହିପାରିବା ନାହିଁ ଯେ ଯଦି ସେମାନେ ଥାଆନ୍ତେ, ତେବେ ଆମେ ଜିତିଥାଆନ୍ତୁ।” ସେ ଉଦାହରଣ ଦେଇ କହିଥିଲେ, ଯେତେବେଳେ ଏହି ତିନିଜଣ ଦଳରେ ଥିଲେ, ଭାରତ ନ୍ୟୁଜିଲ୍ୟାଣ୍ଡ ବିପକ୍ଷରେ ୦-୩ରେ ଏବଂ ଅଷ୍ଟ୍ରେଲିଆ ବିପକ୍ଷରେ ପରାଜିତ ହୋଇଥିଲା। ତେଣୁ, ସେମାନଙ୍କ ଉପସ୍ଥିତି ଦକ୍ଷିଣ ଆଫ୍ରିକା ବିପକ୍ଷରେ ବିଜୟର କୌଣସି ନିଶ୍ଚିତତା ଦେଇ ନଥାନ୍ତା।
ସେ ଆହୁରି କହିଛନ୍ତି, “ସେମାନଙ୍କୁ ଅବସର ପାଇଁ ବାଧ୍ୟ କରାଗଲା କି ନାହିଁ, ସେହି ଦିଗରେ ଚିନ୍ତା କରିବା ଉଚିତ୍ ନୁହେଁ। ଏହା ଏକ ଭୁଲ୍ ଆଭିମୁଖ୍ୟ।”
