ଗୁଆହାଟୀ,୨୯।୪: ସଂରକ୍ଷିତ ବର୍ଗ ପ୍ରାର୍ଥୀ ସାଧାରଣ ବର୍ଗର ଅନ୍ତିମ ପ୍ରାର୍ଥୀଙ୍କଠାରୁ ଅଧିକ ନମ୍ବର ରଖିଥିଲେ, ସେ ଜେନେରାଲ କାଟାଗୋରି ପାଇଁ ଉଦ୍ଦିଷ୍ଟ ପଦବୀ କିମ୍ବା ସିଟ୍ ପାଇବାକୁ ହକ୍ଦାର ବୋଲି ସୁପ୍ରିମକୋର୍ଟ କହିଛନ୍ତି। ଏନେଇ ରାଜସ୍ଥାନ ହାଇକୋର୍ଟଙ୍କ ରାୟକୁ ସର୍ବୋଚ୍ଚ ଅଦାଲତ କାଏମ ରଖିଛନ୍ତି। ନିଯୁକ୍ତି ପାଇଥିବା ୨ଅଣସଂରକ୍ଷିତ ପ୍ରାର୍ଥୀଙ୍କ ଠାରୁ ୨ ଜଣ ଓବିସି ଆଶାୟୀ ଅଧିକ ନମ୍ବର ରଖିଥିବାରୁ ସେମାନଙ୍କୁ ସାଧାରଣ ବର୍ଗଙ୍କ ପାଇଁ ଉଦ୍ଦିଷ୍ଟ ପଦବୀରେ ନିଯୁକ୍ତି ଦେବାକୁ ରାଜସ୍ଥାନ ହାଇକୋର୍ଟ କହିଥିଲେ।
ଏହାକୁ ଭାରତ ସଂଚାର ନିଗମ ଲିଃ (ବିଏସ୍ଏନ୍ଏଲ୍) ପକ୍ଷରୁ ସର୍ବୋଚ୍ଚ ଅଦାଲତରେ ଚ୍ୟାଲେଞ୍ଜ କରାଯାଇଥିଲା। ଜଷ୍ଟିସ୍ ଏମ୍.ଆର୍. ଶାହା ଏବଂ ବି.ଭି. ନାଗରତ୍ନଙ୍କୁ ନେଇ ଗଠିତ ଖଣ୍ଡପୀଠ କହିଛନ୍ତି, ମେରିଟ୍ ଲିଷ୍ଟରେ ଆଗରେ ଥିବା ସଂରକ୍ଷିତ ବର୍ଗର ପ୍ରାର୍ଥୀ ଅଣସଂରକ୍ଷିତ ବର୍ଗ ପାଇଁ ଉଦ୍ଦିଷ୍ଟ ପଦବୀ ବା ସିଟ୍ ପାଇବାକୁ ଦାବି ଜଣାଇପାରିବେ। ଏନେଇ ଖଣ୍ଡପୀଠ ରାୟ ପ୍ରଦାନ ବେଳେ ୧୯୯୨ର ଇନ୍ଦ୍ରା ସାହାନି ବନାମ କେନ୍ଦ୍ର ସରକାର ମାମଲା ରାୟର ସହାୟତା ନେଇଥିଲେ।
ରିପୋର୍ଟ ଅନୁଯାୟୀ ବିଏସ୍ଏନ୍ଏଏଲ୍ ଏହାର ରାଜସ୍ଥାନ ସର୍କଲରେ କେତେକ ଟେଲିକମ୍ ଟେକ୍ନିକାଲ ଆସିଷ୍ଟାଣ୍ଟ (ଟିଟିଏ) ପଦବୀରେ ନିଯୁକ୍ତି ଲାଗି ୨୦୦୮ ଅକ୍ଟୋବର ୬ରେ ବିଜ୍ଞପ୍ତି ପ୍ରକାଶ କରିଥିଲା। ନିଯୁକ୍ତି ପାଇଥିବା ୨ ସାଧାରଣ ବର୍ଗ ପ୍ରାର୍ଥୀଙ୍କଠାରୁ ଓବିସି ପ୍ରାର୍ଥୀ ଆଲୋକ କୁମାର ଯାଦବ ଏବଂ ଦିନେଶ କୁମାର ଅଧିକ ନମ୍ବର ରଖିଥିଲେ। ତେଣୁ ଉଭୟେ ସାଧାରଣ ବର୍ଗଙ୍କ ପଦବୀରେ ନିଯୁକ୍ତ ହେବାକୁ ଯୋଗ୍ୟ। ପଛୁଆ ବର୍ଗଙ୍କ ପାଇଁ ଉଦ୍ଦିଷ୍ଟ ଅବଶିଷ୍ଟ ପଦବୀରେ ଓବିସିର ଅନ୍ୟ ପ୍ରାର୍ଥୀଙ୍କୁ ନିଯୁକ୍ତି ଦିଆଯାଇପାରିବ ବୋଲି ହାଇକୋର୍ଟ କହିଥିଲେ।
