ଭୁବନେଶ୍ୱର,୩୧।୧୦(ବ୍ୟୁରୋ): ଜଣେ ଦଳିତ ଯୁବକଙ୍କୁ ମାଡ଼ ମାରିବା ଅଭିଯୋଗରେ ଭୁବନେଶ୍ୱର ଉପକଣ୍ଠ ବାଲିପାଟଣା ଥାନା ଅଧିକାରୀ କୃପାସିନ୍ଧୁ ବରାଡ଼ ନିଜ ସମେତ ଏସ୍ଆଇ ରାକେଶ ସାମଲ ଏବଂ ଅନ୍ୟ କର୍ମଚାରୀଙ୍କ ନାଁରେ ମାମଲା ରୁଜୁ କରିବା ଘଟଣାକୁ ନେଇ ଚର୍ଚ୍ଚା ଲାଗି ରହିଛି। ପୋଲିସ କର୍ମଚାରୀଙ୍କ ନାଁରେ ହୋଇଥିବା ଏହି ମାମଲାରେ ତଦନ୍ତ ପ୍ରକ୍ରିୟାରେ ସ୍ବଚ୍ଛତାକୁ ନେଇ ବିଭିନ୍ନ ମହଲରେ ପ୍ରଶ୍ନବାଚୀ ସୃଷ୍ଟି ହୋଇଛି। ଡିସିପି ପ୍ରତୀକ ସିଂ ଏହି ମାମଲାରେ ଜୋନ-୪ ଏସିପି ଶୁଭନାରାୟଣ ମୁଦୁଲିଙ୍କୁ ତଦନ୍ତ ଭାର ଦେଇଛନ୍ତି। ଏସିପି ଶୁଭନାରାୟଣ ରବିବାର ଗିରିଙ୍ଗୋ ଭୋଇସାହିର ପୀଡିତ ସରୋଜ ଭୋଇ ଏବଂ ତାଙ୍କ ମା’ଙ୍କୁ ଭେଟି ପଚରାଉଚରା କରିବା ସହ ଥାନା କର୍ମଚାରୀଙ୍କ ବୟାନ ରେକର୍ଡ କରିଛନ୍ତି। ଏସିପି କହିଛନ୍ତି, ଏହି ସଂକ୍ରାନ୍ତରେ ଶନିବାର ଏସ୍ସି ଏସ୍ଟି ଆକ୍ଟ ସହ ଆଇପିସିର ବିଭିନ୍ନ ଦଫାରେ ମାମଲା (ନଂ.୨୬୯/୨୦୨୨) ରୁଜୁ କରାଯାଇ ତଦନ୍ତ କରାଯାଉଛି। ତଦନ୍ତ ପ୍ରକ୍ରିୟା ଆଗକୁ ବଢ଼ିଲେ ଅଭିଯୋଗର ସତ୍ୟତା କେତେ ତାହା ଜଣାପଡ଼ିବ। ଅନ୍ୟପକ୍ଷରେ ଏହି ଘଟଣାରେ ପ୍ରକୃତ ସତ ସାମ୍ନାକୁ ଆସୁ ବୋଲି ରାଜ୍ୟ ଦଳିତ ଆଦିବାସୀ ଅଧିକାର ମହାସଂଘ ସଭାପତି ବିଜୟ କୁମାର ଭୋଇ କହିଛନ୍ତି।
ଅଭିଯୋଗ ଅନୁଯାୟୀ, ଗତ ଅକ୍ଟୋବର ୩ରେ ବାଲିପାଟଣା ହାଟସାହିରେ ଦୁର୍ଗାପୂଜା ପାଇଁ ମେଲୋଡ଼ି ହେଉଥିବାବେଳେ ଆୟୋଜକ କମିଟି ଓ ସରୋଜଙ୍କ ମଧ୍ୟରେ ଗଣ୍ଡଗୋଳ ହୋଇଥିଲା। ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚତ୍ ସରୋଜଙ୍କୁ ଥାନାକୁ ନେଇଥିଲା। ଥାନାରେ ଆଇଆଇସି କୃପାସିନ୍ଧୁ ଓ ଅନ୍ୟମାନେ କେବୁଲ ପାଇପ୍ରେ ସରୋଜଙ୍କୁ ମାଡ଼ ମାରିବାରୁ ତାଙ୍କର ଗୋଡ଼ ଭାଙ୍ଗି ଯାଇଥିଲା। ଏହାପରେ ସରୋଜଙ୍କୁ ଚିକିତ୍ସା ନ କରି ପୋଲିସକୁ ମାଡ଼ ମାରିବା ଅଭିଯୋଗରେ ତାଙ୍କୁ ଗିରଫ କରାଯାଇ କୋର୍ଟଚାଲାଣ କରାଯାଇଥିଲା। ପରେ ଜେଲରେ ଚିକିତ୍ସା କରାଯିବାରୁ ତାଙ୍କ ଗୋଡ଼ ଭାଙ୍ଗିଥିବା ଜଣାପଡ଼ିଥିଲା। ଅକ୍ଟୋବର ୧୮ରେ ସରୋଜ ଜାମିନରେ ଆସିବା ପରେ ପରିବାର ଲୋକ ଘଟଣା ସମ୍ପର୍କରେ ଜାଣି ଅସନ୍ତୁଷ୍ଟ ହୋଇଥିଲେ। ଦଳିତ ଆଦିବାସୀ ଅଧିକାର ମହାସଂଘ ପକ୍ଷରୁ ଏନେଇ ଥାନାରେ ଏତଲା ଦିଆଯାଇଥିଲେ ସୁଦ୍ଧା କୌଣସି ପଦକ୍ଷେପ ନିଆଯାଇ ନ ଥିଲା। ଶୁକ୍ରବାର ସରୋଜଙ୍କ ସ୍ତ୍ରୀ ଲିପିକା ଡିସିପିଙ୍କୁ ଭେଟି ଏନେଇ ଅଭିଯୋଗ କରିଥିଲେ। ଡିସିପି ଏହି ଘଟଣାରେ ମାମଲା ରୁଜୁ କରିବାକୁ ଥାନାଧିକାରୀଙ୍କୁ ନିର୍ଦ୍ଦେଶ ଦେଇଥିଲେ।
