କେନ୍ଦ୍ରାପଡ଼ା,୨୮ା୭(ଜଗନ୍ନାଥ ଧଳ): ଜାତୀୟ ଉଦ୍ୟାନ ଭିତରକନିକା ମଧ୍ୟ ଦେଇ ଧାମରାରୁ କଟକ ପର୍ଯ୍ୟନ୍ତ କୋଇଲା ଚୋରା ଚାଲାଣ ପୁନର୍ବାର ଆରମ୍ଭ ହୋଇଯାଇଛି। ଏହି ଚୋରା ଚାଲାଣକାରୀ ରାକେଟ ଏବେ ସକ୍ରିୟ ହୋଇଥିବା ବେଳେ ଭିତରକନିକାର ସୁରକ୍ଷାକୁ ନେଇ ପ୍ରଶ୍ନ ଉଠିଲାଣି। ୪ ବର୍ଷ ମଧ୍ୟରେ ରାଜନଗର, ରାଜକନିକା ପୋଲିସ ୧୦ରୁ ଊର୍ଦ୍ଧ୍ୱ ଥର ଚୋରା କୋଇଲା ଚାଲାଣକାରୀଙ୍କୁ ଗିରଫ କଲାଣି।
ଏ ସମ୍ପର୍କରେ ରାଜନଗରର ପ୍ରତ୍ୟୁଷ ନାୟକ କହିଛନ୍ତି, ୨୦୧୯ ଏପ୍ରିଲରେ ରାଜନଗର ଥାନା ପୋଲିସ ଏପରି ଏକ ଘଟଣାରେ କଟକର ଖୁଣ୍ଟୁଣୀ ଅଞ୍ଚଳର ୨ ଜଣ ବ୍ୟକ୍ତିଙ୍କୁ କୋଇଲା ଭର୍ତ୍ତି ଟ୍ରକ୍ ସହ ଗିରଫ କରିଥିଲା। ଏହି ଘଟଣା ପରେ ବେଆଇନ ଭାବେ ହେଉଥିବା କୋଇଲା ଚାଲାଣ ବନ୍ଦ ହୋଇଥିଲା। ପୁଣି କିଛିବର୍ଷ ଧରି କୋଇଲାର ଚୋରାଚାଲାଣ ଭିତରକନିକା ଅଭୟାରଣ୍ୟ ବାଟ ଦେଇ କଟକକୁ ଚାଲିଛି। ଏ ନେଇ ବନ ବିଭାଗ ଅଥବା ସ୍ଥାନୀୟ ପୋଲିସର ତଦାରଖ ନାହିଁ। ଫଳରେ ଭିତରକନିକାର ସଂରକ୍ଷିତ ଜୀବଜନ୍ତୁଙ୍କ ଚୋରାଚାଲାଣ ସମ୍ଭାବନା ବଢ଼ି ଯାଇଛି। ଏ ନେଇ ଜିଲା ପ୍ରଶାସନ କାର୍ଯ୍ୟାନୁଷ୍ଠାନ ନେବା ଆବଶ୍ୟକ। ରାଜନଗରର ତପନ କୁମାର ସାମଲ କହିଛନ୍ତି, ଖମାର ପଞ୍ଚାୟତ ଅଧୀନ ପରମାନନ୍ଦପୁର ଗ୍ରାମ ସୀମାକୁ ଲାଗିଥିବା ବ୍ରାହ୍ମଣୀ ନଦୀକୂଳରେ ଏହି କାରବାର ଚାଲିଛି। ସିମେଣ୍ଟ ବସ୍ତାରେ ପ୍ୟାକିଂ ହୋଇ ଆସୁଥିବା ଏହି କୋଇଲା ଧାମରା ବନ୍ଦରରୁ ବୋଟ ଯୋଗେ ସମୁଦ୍ରପଥ ଓ ବୈତରଣୀ ନଦୀ ମଧ୍ୟ ଦେଇ ପରମାନନ୍ଦପୁରରେ ପହଞ୍ଚୁଛି। ବ୍ଲକର ନଳିତାପାଟିଆଠାରେ କୋଇଲା ଅନଲୋଡିଂ ହେଉଛି। ମାତ୍ର ୩ ଘଣ୍ଟା ମଧ୍ୟରେ ଏହା ଟ୍ରକ୍ରେ ଲଦା ହୋଇ କଟକ ସହ ଅନ୍ୟ ସହରକୁ ଚାଲାଣ ହେଉଛି। ତାଳଚୁଆ ସାମୁଦ୍ରିକ ଥାନା ଅଞ୍ଚଳରେ ଏହି କାରବାର ଚାଲିଥିବା ବେଳେ ବନ ବିଭାଗ ଟୋଲ ଏଠାରୁ ମାତ୍ର ୧ କିଲୋମିଟର ଦୂର। ରାତିରେ କୋଇଲା ଭର୍ତ୍ତି ଟ୍ରକ୍ଗୁଡ଼ିକ ଯାଉଛି। ଏ ସମ୍ପର୍କରେ ସାମାଜିକ କର୍ମୀ ବାନାମ୍ବର ସାହୁ କହିଛନ୍ତି, ଉପକୂଳ ସୁରକ୍ଷାକୁ ନେଇ ଜିଲା ପ୍ରଶାସନ ବହୁବାର ବୈଠକ କରୁଛନ୍ତି। ତେବେ ଏହାର କାର୍ଯ୍ୟକାରିତାକୁ ନେଇ ବିଭିନ୍ନ ସମୟରେ ପ୍ରଶ୍ନ ଉଠୁଛି। ସମୁଦ୍ର ମଧ୍ୟ ଦେଇ ବାଂଲାଦେଶୀ କେନ୍ଦ୍ରାପଡ଼ାକୁ ଆସୁଥିବା ବେଳେ ବିଭିନ୍ନ ନିଶା କାରବାର ହେଉଥିବା ଗଣମାଧ୍ୟମରେ ଜାଣିବାକୁ ମିଳୁଛି। ସେହିପରି ଚିଙ୍ଗୁଡ଼ି ଘେରି ଉଚ୍ଛେଦ, ହେନ୍ତାଳବଣ ନଷ୍ଟକୁ ନେଇ ଜିଲା ପ୍ରଶାସନ ସତର୍କ ନ ଥିବା ବେଳେ କୋଇଲା ଚୋରା ଚାଲାଣ ଭିତରକନିକାର ସୁରକ୍ଷାକୁ ନେଇ ପ୍ରଶ୍ନବାଚୀ ସୃଷ୍ଟି କରିଛି। ଏ ସମ୍ପର୍କରେ ରେଞ୍ଜର ମାନସ କୁମାର ଦାସଙ୍କୁ ପଚାରିବାରେ କୋଇଲା ଚୋରା ଚାଲାଣ ଘଟଣା ନଜରକୁ ଆସିନାହିଁ। ଏପରି କାର୍ଯ୍ୟ ଚାଲିଥିଲେ ନିଶ୍ଚିତ ଭାବେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ କହିଛନ୍ତି।
