ନୂଆଦିଲ୍ଲୀ, ୧୯।୭ : ନିଟ୍ ୟୁଜି ୨୦୨୨ ପରୀକ୍ଷାରେ ସିବିଆଇ ପକ୍ଷରୁ ଏକ ବଡ଼ ଧରଣର ରିଗିଂ ର଼୍ୟାକେଟର ପର୍ଦ୍ଦାଫାଶ୍ କରାଯାଇଛି। ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରି ସିବିଆଇ ମାଷ୍ଟରମାଇଣ୍ଡ ଏବଂ ସ୍ଲୋଭର ସମେତ ୮ ଜଣ ଅଭିଯୁକ୍ତଙ୍କୁ ଗିରଫ କରିଛି। କେନ୍ଦ୍ରୀୟ ଅନୁସନ୍ଧାନ ବ୍ୟୁରୋ (ସିବିଆଇ) କହିଛି ଯେ ଏହି ଅଭିଯୁକ୍ତମାନେ ପ୍ରକୃତ ପ୍ରାର୍ଥୀଙ୍କ ବଦଳରେ ଡମି ପ୍ରାର୍ଥୀ ହୋଇ ନିଟ୍ ୟୁଜି ପରୀକ୍ଷାରେ ହାଜର ହୋଇଥିଲେ। ଏହି ଘଟଣା ପରେ ନିଟ୍ ପରୀକ୍ଷାର ସ୍ବଚ୍ଛତା ନେଇ ପ୍ରଶ୍ନ ଉଠିବାରେ ଲାଗିଛି ମୂଳ ପ୍ରାର୍ଥୀଙ୍କ ବଦଳରେ ପରୀକ୍ଷା ଦେଇଥିବା ମାଷ୍ଟରମାଇଣ୍ଡ ସମେତ ଏଜେନ୍ସି ଆଠ ଜଣଙ୍କୁ ଗିରଫ କରିଛି। ଏମାନଙ୍କ ବ୍ୟତୀତ ଅନ୍ୟ ତିନି ଜଣଙ୍କୁ ମଧ୍ୟ ଗିରଫ କରାଯାଇଛି। ବର୍ତ୍ତମାନ ଗିରଫ ହୋଇଥିବା ତିନି ଜଣଙ୍କୁ ପଚରାଉଚରା କରାଯାଉଛି।
ଅପରପକ୍ଷରେ ସିବିଆଇ ଦ୍ୱାରା ଗିରଫ ହୋଇଥିବା ଅଭିଯୁକ୍ତମାନଙ୍କ ନାମ ସୁଶୀଲ ରଂଜନ, ବ୍ରିଜମୋହନ ସିଂ, କୃଷ୍ଣ ଶଙ୍କର ଯୋଗୀ, ସନ୍ନି ରଂଜନ, ପପୁ, ରଘୁନନ୍ଦନ, ଜିପୁ ଲାଲ, ଉମାଶଙ୍କର ଗୁପ୍ତା, ନିଧି, ହେମେନ୍ଦ୍ର ଏବଂ ଭାରତ ସିଂ ବୋଲି ଜଣାପଡିଛି। ସିବିଆଇ ଏବଂ ଏନଟିଏ ଗୁପ୍ତ ସୂଚନା ପାଇଥିଲେ ଯେ ଦିଲ୍ଲୀ ଏବଂ ହରିୟାଣାର ଅନେକ କେନ୍ଦ୍ରରେ ନକଲ କରୁଥିବା ଗ୍ୟାଙ୍ଗ ସକ୍ରିୟ ରହିଛନ୍ତି। ଏହି ଅଭିଯୁକ୍ତମାନେ ପ୍ରକୃତ ପ୍ରାର୍ଥୀ ବଦଳରେ ଡମି ପ୍ରାର୍ଥୀ ଭାବରେ ପରୀକ୍ଷା ପାଇଁ ହାଜର ହେବା ଉଦ୍ଦେଶ୍ୟରେ ପହଞ୍ଚିଥିଲେ। ସେମାନେ ମୂଳ ପ୍ରାର୍ଥୀଙ୍କ ୟୁଜର୍ ଆଇଡି ଏବଂ ପାସୱାର୍ଡରେ ମଧ୍ୟ ସଂଶୋଧନ କରିଥିଲେ। ଏଥିସହିତ ପରୀକ୍ଷାରେ ହାଜର ହେବା ପାଇଁ ଡମି ପ୍ରାର୍ଥୀଙ୍କ ଫଟୋ ଆକାର ମଧ୍ୟ ପରିବର୍ତ୍ତନ କରାଯାଇଥିଲା। ଏଜେନ୍ସି କହିଛି ଯେ ଏହି ସ୍ଲୋଭର ଏବଂ ଡମି ପ୍ରାର୍ଥୀଙ୍କୁ ପ୍ରାର୍ଥୀଙ୍କ ତରଫରୁ ବିପୁଳ ପରିମାଣର ଅର୍ଥ ପ୍ରଦାନ କରାଯାଇଛି।
ଅନୁସନ୍ଧାନକାରୀ ସଂସ୍ଥା ଦ୍ୱାରା ନିଆଯାଇଥିବା ଏହି କାର୍ଯ୍ୟ ବିଷୟରେ ସିବିଆଇ ସୂତ୍ର ସୂଚନା ଦେଇଛି। ନ୍ୟୁଜ ଏଜେନ୍ସି ଏଏନଆଇ ମଧ୍ୟ ଏହା ନିଶ୍ଚିତ କରିଛି। ସ୍ନାତକୋତ୍ତରସ୍ତରର ଡାକ୍ତରୀ ପାଠ୍ୟକ୍ରମରେ ଆଡମିଶନ ପାଇଁ ନିଟ୍ ପରୀକ୍ଷା ରବିବାର କରାଯାଇଥିଲା। ଏହି ପରୀକ୍ଷା ଦେଶ ତଥା ବିଦେଶର ୫୫୦ ରୁ ଅଧିକ ସହରରେ କରାଯାଇଥିଲା। ଏହି ପରୀକ୍ଷା ପାଇଁ ୧୮.୭୨ ଲକ୍ଷ ପ୍ରାର୍ଥୀ ପଞ୍ଜୀକୃତ ହୋଇଥିଲେ। ଏଥିମଧ୍ୟରୁ ୧୮ ଲକ୍ଷରୁ ଅଧିକ ଅର୍ଥାତ ୯୯ ପ୍ରତିଶତ ପ୍ରାର୍ଥୀ ପରୀକ୍ଷାରେ ହାଜର ହୋଇଥିଲେ।
