ନୟାଗଡ ଅଫିସ,୮।୧୨: ପରୀକୁ ନ୍ୟାୟ ଦେବା ଦାବିରେ ନୟାଗଡ ଜିଲାପାଳଙ୍କ କାର୍ଯ୍ୟାଳୟ ସମ୍ମୁଖ ଦୁର୍ଗାମଣ୍ଡପରେ ଭାଜପା ପକ୍ଷରୁ ଚାଲିଥିବା ରିଲେ ଅନଶନ ତୃତୀୟ ଦିବସରେ ପହଞ୍ଚତ୍ଛି। ସୋମବାର ଏହି ଅନଶନରେ ସାମିଲ ହୋଇଥିବା ନେତାମାନେ ନୟାଗଡରେ ଅନ୍ଧାରୀ ଶାସନ ଚାଲିଛି ବୋଲି ଅଭିଯୋଗ କରିବା ସହ ରାଜ୍ୟ ସରକାରଙ୍କୁ ସମାଲୋଚନା କରିଥିଲେ।
ଭାଜପା ନେତା ତଥା ପୂର୍ବତନ ଡିଜି ପ୍ରକାଶ ମିଶ୍ର କହିଛନ୍ତି, ଶିଶୁକନ୍ୟା ପରୀର ହତ୍ୟା ଦୁଃଖଦ ଖବର। ଓଡିଶାରେ ଶିଶୁ ଅତ୍ୟାଚାର ଓ ନାରୀ ନିର୍ଯାତନା ବଢ଼ି ଚାଲିଛି। ନ୍ୟାସନାଲ କ୍ରାଇମ୍ ରେକର୍ଡ ବ୍ୟୁରୋର ଏହି ରିପୋର୍ଟ ଉଦ୍ବେଗର ବିଷୟ। ମୁଁ ପୋଲିିସରେ କାର୍ଯ୍ୟ କରିଥିବାରୁ ପୋଲିସର ଦକ୍ଷତା ପ୍ରତି ପ୍ରଶ୍ନ କରୁନି। ଆଗରୁ ପୋଲିସ ଯେପରି ଦକ୍ଷ ଥିଲା ଏବେବି ରହିଛି। ହେଲେ ପୋଲିସର ହାତକୁ ଧିରେ ଧିରେ ଏପରି ବାନ୍ଧି ଦିଆଯାଉଛି ଯେ, ସେମାନେ କାର୍ଯ୍ୟ ଠିକ୍ରେ କରି ପାରୁନାହାନ୍ତି। ପୋଲିସ ତଦନ୍ତ କ୍ଷେତ୍ରରେ ସ୍ବାଧୀନତା ପାଇଥିଲେ ପରୀ ମାମଲାକୁ ନେଇ ବିଭିନ୍ନ ପ୍ରଶ୍ନ ଉଠୁ ନ ଥାନ୍ତା। ପୋଲିସକୁ ଠିକ୍ ଭାବେ କାମ କରାଇ ଦିଆଯାଉନି। ପୋଲିସଠାରୁ ଦାୟିତ୍ୱ କାଢ଼ି ଏସ୍ଆଇଟିକୁ ତଦନ୍ତ ଦାୟିତ୍ୱ ଦିଆଯାଇଛି। ଲ’ରେ ଏସ୍ଆଇଟିର କୌଣସି ଷ୍ଟାଟସ ନାହିଁ। ଏସ୍ଆଇଟି ମୁଖ୍ୟ ଓଏସ୍ଆରଟିସିର ମ୍ୟାନେଜିଂ ଡାଇରେକ୍ଟର(ଏମ୍ଡି)। ସେ ପୋଲିସରେ ଚାକିରି କରିନାହାନ୍ତି। ସେ କିପରି ତଦନ୍ତ କରିବେ। ସେ ସତ୍ୟ କାଢ଼ି ପାରନ୍ତି। କିନ୍ତୁ ସେହି ତଥ୍ୟ ଉପସ୍ଥାପନ କଲେ କୋର୍ଟ ଗ୍ରହଣ କରିବେ ନାହିଁ। କାରଣ ତାଙ୍କର ତଦନ୍ତ କରିବାର କ୍ଷମତା ନାହିଁ। ସିଆରପିସିରେ ଉଲ୍ଲେଖ ଅଛି ଥାନା କେବଳ ଅନୁସନ୍ଧାନ କରିପାରିବେ। ସିବିଆଇ, କ୍ରାଇମବ୍ରାଞ୍ଚ ମଧ୍ୟ ଥାନାର ମାନ୍ୟତା ପାଇଛନ୍ତି। ବସ୍ ଚଳାଇବା ଦାୟିତ୍ୱରେ ଥିବା ଅଫିସର କିପରି ତଦନ୍ତ କରିବେ ସରକାର ଆଗେ ଷ୍ପଷ୍ଟ କରନ୍ତୁ। ମୁଁ ଭାବୁଛି ଏହା କେବଳ ଲୋକଙ୍କୁ ଭୁଅଁା ବୁଲାଇବାକୁ କରାଯାଉଛି। ଏଣୁ ପରୀ ହତ୍ୟାକାଣ୍ଡକୁ ଏସ୍ଆଇଟି ତଦନ୍ତ କଲେ ନିପେକ୍ଷତା ହେବ ନାହିଁ। ନିରପକ୍ଷେ ତଦନ୍ତ ପାଇଁ ଭାଜପାର ଦାବି ସିବିଆଇ ତଦନ୍ତକୁ ସରକାର ମାନନ୍ତୁ।
ଗଁା ସଭାପତି ଜୟକୃଷ୍ଣ ପରିଡା କୁହନ୍ତି, ଯଦୁପୁରର ୨୮ ପରିବାର ସନ୍ଦେହ ଘେରରେ ଆସୁଛନ୍ତି। ସେମାନଙ୍କୁ ବାରମ୍ବାର ତଦନ୍ତ କରାଯାଉଛି। ପୁଣି ଏହି ପରିବାରର ୨୦ରୁ ଊର୍ଦ୍ଧ୍ୱ ଲୋକଙ୍କ ବ୍ଲଡ ସାମ୍ପୁଲ ସଂଗ୍ରହ କରାଯାଇଛି। ମୋର କହିବା କଥା ୨୮ ପରିବାର ସ୍ଥାନରେ ଗଁାର ୧୦୦ ପରିବାରକୁ ତଦନ୍ତରେ ସାମିଲ କରାଯାଉ। ଯିଏ ଦୋଷୀ ଦଣ୍ଡ ପାଉ। ପରୀ ନ୍ୟାୟ ପାଉ। ଆମେ ସବୁ ପ୍ରକାରର ତଦନ୍ତକୁ ସ୍ବାଗତ କରୁଛୁ ଓ ସହଯୋଗ କରୁଛୁ। ଖୁବ କମ ଦିନରେ ହତ୍ୟାକାରୀ ଚିହ୍ନଟ ହେବ। ଯଦୁପୁରର କାହ୍ନା ବେହେରା କୁହନ୍ତି, ମୋ ପରି ୧୭ଜଣଙ୍କୁ ତଦନ୍ତ ପରିସରଭୁକ୍ତ କରାଯାଇଛି। ମୋତେ ପ୍ରାୟ ୧୫ରୁ ୧୬ ଥର ଡକାଇ ତଦନ୍ତ କରାଗଲାଣି। ଆମେ ତଦନ୍ତକୁ ସ୍ବାଗତ କରୁଛୁ। ତେବେ ବାରମ୍ବାର ଆମକୁ ପଚରାଉଚୁରା ପାଇଁ ନିଆଯାଉଥିବାରୁ କାମକୁ ଯାଇ ପାରୁନି। ଘରେ ଚୂଲି ଜଳୁନି। ଆମେ ଗରିବ ଲୋକ। ଚଳିବୁ କିପରି। ଖାଇବୁ କ’ଣ। ଆମେ ହତ୍ୟାରେ ସାମିଲ ନାହୁଁ। ଗଁା ଛାଡିବୁନି। ଆମେ ନିର୍ଦ୍ଦୋଷ। ଧର୍ମ ଅଛି। ପରୀ ଅପହରଣ ଦିନ ନୟାଗଡରେ ଥିଲି। ଯେତେବେଳେ ଡାକିବେ ସେତେବେଳେ ଯିବୁ ବୋଲି କହିଥିଲେ।
