ମସ୍କୋ,୧।୧ : ରୁଷିଆର ରାଷ୍ଟ୍ରପତି ଭ୍ଲାଦିମିର ପୁଟିନ ନୂଆ ବର୍ଷ ଅବସରରେ ଦେଶବାସୀଙ୍କୁ ସମ୍ବୋଧିତ କରିଛନ୍ତି। ଗତ ୧୦ ମାସ ଧରି ୟୁକ୍ରେନ ବିରୁଦ୍ଧରେ ଯୁଦ୍ଧ କରୁଥିବା ସୈନିକମାନଙ୍କୁ ଉତ୍ସାହିତ କରିବା ଉପରେ ସେ ଅଧିକ ଧ୍ୟାନ ଦେଇଥିଲେ। ତାଙ୍କ ଭାଷଣରେ ସେ ଆମେରିକା ସମେତ ପାଶ୍ଚାତ୍ୟ ଦେଶମାନଙ୍କୁ ରୁଷିଆ ବିରୁଦ୍ଧରେ ଷଡଯନ୍ତ୍ର କରିଥିବା ଅଭିଯୋଗ କରିଛନ୍ତି। ସେ କହିଛନ୍ତି ଯେ ପାଶ୍ଚାତ୍ୟ ଦେଶଗୁଡ଼ିକ ୟୁକ୍ରେନ ମାଧ୍ୟମରେ ରୁଷିଆକୁ ଧ୍ୱଂସ କରିବାକୁ ଷଡଯନ୍ତ୍ର କରୁଛନ୍ତି।
କିନ୍ତୁ ତାଙ୍କ ଦେଶ କଦାପି ନତ ମସ୍ତକ ହେବ ନାହିଁ। ପ୍ରକୃତ ସ୍ବାଧୀନତା ପାଇଁ ଏହି ଲଢ଼େଇ ଜାରି ରହିବ ବୋଲି ସେ କହିଛନ୍ତି। ନଅ ମିନିଟର ଭାଷଣରେ ସେ ପାଶ୍ଚାତ୍ୟ ରାଷ୍ଟ୍ର କପଟ କରୁଥିବା ଅଭିଯୋଗ କରିଛନ୍ତି ଏବଂ ପାଶ୍ଚାତ୍ୟ ତାଙ୍କୁ ୟୁକ୍ରେନରେ ଏକ
ସ୍ବତନ୍ତ୍ର ସାମରିକ ଅପରେଶନ ଆରମ୍ଭ କରିବାକୁ ଉତ୍ସାହିତ କରିଥିବା କହିଛନ୍ତି। ପୁଟିନ ୟୁକ୍ରେନରେ ନିଜର ସାମରିକ କାର୍ଯ୍ୟକୁ ଯୁଦ୍ଧ ବୋଲି କହିବା ପରିବର୍ତ୍ତେ ଏକ ସ୍ବତନ୍ତ୍ର ସାମରିକ ଅପରେଶନ ବୋଲି କହିଛନ୍ତି।
ପାଶ୍ଚାତ୍ୟର ଶାସକ ଶ୍ରେଣୀ ବର୍ଷ ବର୍ଷ ଧରି ଶାନ୍ତିର କପଟ କଥା କହି ଆସୁଛନ୍ତି। ସେମାନେ ଶାନ୍ତିପୂର୍ଣ୍ଣ ଉଦ୍ଦେଶ୍ୟ ବିଷୟରେ ଆମକୁ ନିଶ୍ଚିତ କରିଆସୁଛନ୍ତି। ଡୋନବାସରେ ଚାଲିଥିବା ବିବାଦରେ ସେମାନେ ସାହାଯ୍ୟ ମଧ୍ୟ କରିଛନ୍ତି। ଏହାକୁ ସହ୍ୟ କରାଯିବ ନାହିଁ।
