ମସ୍କୋ,୨୯ ।୧୧: ରୁଷିଆ ଗଣମାଧ୍ୟମ ପ୍ରୋଏକେଟର ଏକ ରିପୋର୍ଟ ଅନୁଯାୟୀ ରୁଷିଆର ରାଷ୍ଟ୍ରପତି ଭ୍ଲାଦିମିର ପୁତିନଙ୍କର ଜଣେ ମହିଳା ସଫେଇ କର୍ମଚାରୀଙ୍କ ସହ ସମ୍ପର୍କ ଥିଲା । ଆଉ ଏବେ ସେହି ମହିଳା ୭ଶହ କୋଟିରୁ ଊର୍ଦ୍ଧ୍ୱ ଟଙ୍କାର ମାଲିକାଣି ପାଲଟି ଯାଇଛନ୍ତି । ତେବେ ଏହି ଖବରକୁ ପୁତିନଙ୍କ ପ୍ରବକ୍ତା ଖଣ୍ଡନ କରିଛନ୍ତି । ଉକ୍ତ ରିପୋର୍ଟ ଅନୁଯାୟୀ, ପୁତିନଙ୍କ ସହ ସମ୍ପର୍କ ପରେ ମହିଳା ଜଣଙ୍କ ଏକ କନ୍ୟା ସନ୍ତାନ ମଧ୍ୟ ଜନ୍ମ ଦେଇଛନ୍ତି । ଏବେ ସେହି କନ୍ୟା ୧୭ ବର୍ଷର ହୋଇଥିବା କୁହାଯାଉଛି । ଏହାକୁ ଦ ମସ୍କୋ ଟାଇମ୍ସରେ ମଧ୍ୟ ପ୍ରକାଶିତ କରାଯାଇଛି । ରିପୋର୍ଟରେ କୁହାଯାଇଛି କି ପୁତିନ ଶ୍ୱେତଲାନା କ୍ରେମୋନୋଗିଖ ନାମକ ଏକ ସଫେଇ କର୍ମୀଙ୍କ ସହ ସମ୍ପର୍କରେ ଥିଲେ । ସେତେବେଳେ ମହିଳା ଜଣକ ରୁଷିଆର ସେଣ୍ଟ ପିଟର୍ସବର୍ଗ ନିକଟରେ ରହୁଥିବା ବେଳେ ଏହା ପୁତିନଙ୍କ ପାଖ ଲୋକଙ୍କ ପାଇଁ ସୁରକ୍ଷିତ ସ୍ଥାନ ବୋଲି କୁହାଯାଉଥିଲା ।ରୁଷିଆ ଗଣମାଧ୍ୟମ ଅନୁଯାୟୀ ୧୭ ବର୍ଷୀୟା ଏଲିଜାବେଟାଙ୍କୁ ୬୮ ବର୍ଷିୟ ପୁତିନଙ୍କ ସିକ୍ରେଟ କନ୍ୟା ବୋଲି କୁହାଯାଏ । ଏକ ଫେସ୍ ରିକଗନିଶନ ଏକ୍ସପର୍ଟଙ୍କ ଅନୁଯାୟୀ ପୁତିନ ଓ ତାଙ୍କ ଝିଅଙ୍କ ଚେହେରା ୭୦ ପ୍ରତିଶତ ମିଶୁଥିବା କୁହାଯାଏ । ହେଲେ ତାଙ୍କ ଝିଅଙ୍କ ଜନ୍ମ ପ୍ରମାଣ ପତ୍ରରେ କେଉଁଠି ପୁତିନଙ୍କ ନାଁ ନ ଥିବା କୁହାଯାଏ । ପ୍ରଥମେ ସଫେଇ କର୍ମୀଭାବେ କାମ କରୁଥିବା ପୁତିନଙ୍କ ଏହି ପ୍ରେମିକା ଏବେ ଏକ କମ୍ପାନୀର ମାଲିକ ହୋଇଥିବା ବେଳେ ବିଭିନ୍ନ ସହରରେ ତାଙ୍କ ନାଁରେ ଘର ରହିଛି । ଉକ୍ତ କମ୍ପାନୀର କିଛି ଶେୟାର ପୁତିନଙ୍କ ସହ ଜଡିତ ରୋଜିୟା ବ୍ୟାଙ୍କରେ ରହିଛି । ଆହୁରି ମଧ୍ୟ ଉକ୍ତ ରିପୋର୍ଟରେ ଦାବି କରାଯାଇଛି କି ପୁତିନ ଯେଉଁ ବିମାନରେ ଯାତ୍ରା କରନ୍ତି ଶ୍ୱେତାଲିନା ବି ସେହି ବିମାନରେ ଯାତ୍ରା କରନ୍ତି । ହେଲେ ଗତଦଶନ୍ଧି ଶେଷ ବେଳକୁ ଏମାନଙ୍କ ସମ୍ପର୍କ ଛିନ୍ନ ହୋଇ ଯାଇଛି ବୋଲି କୁହାଯାଏ ।
