ବୋଲଗଡ଼,୨୩ା୧୨(ଡି.ଏନ୍.ଏ.): ବୋଲଗଡ଼ ବ୍ଲକ ଖଙ୍ଗୁରିଆ ଗ୍ରାମରେ ଆବାସ ଯୋଜନାରେ ଚଞ୍ଚକତା କରାଯାଇଥିବା ନେଇ ଅଭିଯୋଗ ହୋଇଛି। ଚାଳ ଛପର ଘରେ ପରିବାର ସହ ବାସ କରୁଥିବା ୩୭ଜଣ ବିପିଏଲ ହିତାଧିକାରୀଙ୍କ ନାମ ପୂର୍ବରୁ ଆବାସ ଯୋଜନା ତାଲିକାରେ ରହିଥିବା ବେଳେ ଚଳିତ ଥର ଏହି ତାଲିକରୁ ସେମାନଙ୍କ ନାମ ବାଦ୍ ପଡ଼ିଛି। ହିତାଧିକାରୀନେ ଗତ କିଛିଦିନ ହେବ ବ୍ଲକ କାର୍ଯ୍ୟାଳୟକୁ ଆସି ବିଡିଓଙ୍କୁ ଦେଖା ନ ପାଇ ଧାରଣା ଦେବାକୁ ଯାଉଥିବା ବେଳେ ଏବିଡିଓ ରତିକାନ୍ତ ମିଶ୍ର ପହଞ୍ଚି ସେମାନଙ୍କୁ ବୁଝାଶୁୁଝା କରିଥିଲେ। ତେବେ ବୁଧବାର ବିଧାୟକ ରାଜେନ୍ଦ୍ର ସାହୁ ବ୍ଲକ ଆସିଥିବା ବେଳେ ହିତାଧିକାରୀମାନେ ଘଟଣା ବାବଦରେ ଜଣାଇଥିଲେ। ଏହା ପରେ ବିଧାୟକ ସାହୁ ବିଡିଓ ଧୋବେଇ ନାୟକଙ୍କୁ ଏହାର ତଦନ୍ତ ପାଇଁ ନିର୍ଦ୍ଦେଶ ଦେଇଥିଲେ। ତେବେ ଖଙ୍ଗୁରିଆ ଗ୍ରାମର କୀର୍ତ୍ତନ ଉତ୍ତରକବାଟଙ୍କ ସ୍ତ୍ରୀ ପୁଷ୍ପଲତାଙ୍କ ପରିବାର ଚାଳ ଛପର ଘରେ ବସବାସ କରୁଥିବା ବେଳେ ଗତ ୩ବର୍ଷ ଧରି ଆବାସ ଯୋଜନାରେ ଘର ପାଇଁ ଆବେଦନ କରି ନିରାଶ ହୋଇଛନ୍ତି। ପ୍ରଶାସନ ପକ୍ଷରୁ ତୁରନ୍ତ ପଦକ୍ଷେପ ନିଆ ନ ଗଲେ ପରିବାର ସହ ଆସନ୍ତା ୨୭ ତାରିଖରେ ବ୍ଲକ ସମ୍ମୁଖରେ ଆମରଣ ଅନଶନ କରିବେ ବୋଲି ପୁଷ୍ପଲତା କହିଛନ୍ତି। ଏନେଇ ସେ ବିଡିଓ, ଥାନାଧିକାରୀ, ତହସିଲଦାର, ଜିଲାପାଳଙ୍କ ସମେତ ମୁଖ୍ୟମନ୍ତ୍ରୀଙ୍କୁ ପତ୍ର ମାଧ୍ୟମରେ ଜଣାଇଛନ୍ତି।
