ଭୁବନେଶ୍ୱର,୨୯।୨(ସୁନିତ୍ ମିଶ୍ର): ୨୦୨୪ ଲୋକ ସଭା ନିର୍ବାଚନ ପାଇଁ ଆସନ୍ତା ୧୫ ଦିନ ମଧ୍ୟରେ ଆଦର୍ଶ ଆଚରଣ ବିଧି ଲାଗୁ ହୋଇଯାଇପାରେ। ରାଜନୈତିକ ଦଳଗୁଡ଼ିକ ମଧ୍ୟରେ ଟିକେଟବଣ୍ଟା ଓ ଦଳବଦଳ ରାଜନୀତି ଜୋର୍ ଧରିବାରେ ଲାଗିଛି। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନେତୃତ୍ୱରେ ରାଜ୍ୟରେ ଷଷ୍ଠଥର ଲାଗି ସରକାର ଗଢ଼ିବା ପାଇଁ ଏଥର ବିଜେଡି ଅଣ୍ଟା ଭିଡ଼ିଛି। ଦୀର୍ଘବର୍ଷ ସରକାରରେ ରହିସାରିଥିବା କାରଣରୁ ଶାସକ ଦଳରେ ଆଶାୟୀଙ୍କ ସଂଖ୍ୟା ବଢ଼ୁଛି। ସେହି କ୍ରମରେ ଦେଖିଲେ ପୁରୀ, ଭୁବନେଶ୍ୱର ଓ କଟକ ଲୋକ ସଭା ଆସନରେ ବିଜେଡି କେଉଁମାନଙ୍କୁ ପ୍ରାର୍ଥୀ କରୁଛି ଏବଂ ସେନେଇ ନାମ କେବେ ଘୋଷଣା ହେବ, ତା’ ଉପରେ ସମସ୍ତଙ୍କ ନଜର। ଉପକୂଳ ଓଡ଼ିଶାର ଏହି ଚର୍ଚ୍ଚିତ ଲୋକ ସଭା ଆସନରେ ବିଜେଡି ନୂଆ ମୁହଁ ଦେଇପାରେ ବୋଲି ଆଲୋଚନା ହେଉଛି। ଏନେଇ ଶାସକ ଦଳର ଦ୍ୱିତୀୟ, ତୃତୀୟ ଧାଡ଼ିର ନେତା ଓ କର୍ମୀମାନେ ଜାଣିସାରିଥିବା ବେଳେ କେବଳ ବିଧିବଦ୍ଧ ଘୋଷଣାକୁ ସମସ୍ତଙ୍କ ଅପେକ୍ଷା।
ପୁରୀରୁ ବମ୍ବେର ପୂର୍ବତନ ପୋଲିସ କମିଶନର ଅରୂପ ପଟ୍ଟନାୟକ, ଭୁବନେଶ୍ୱରରେ ବିଜେଡି ନେତ୍ରୀ ଶ୍ରୀମୟୀ ମିଶ୍ର ଏବଂ କଟକରୁ ଆଦିତ୍ୟ ବିର୍ଲା ଗ୍ରୁପ୍ ଏଚ୍ଆର୍ ହେଡ୍ ଭାବେ କାର୍ଯ୍ୟ କରିଥିବା ସନ୍ତୃପ୍ତ ମିଶ୍ରଙ୍କୁ ବିଜେଡି ଲୋକ ସଭା ଟିକେଟ ଦେବ ବୋଲି ଦଳ ଭିତରେ ଆଲୋଚନା ହେବା ଆରମ୍ଭ ହୋଇଗଲାଣି। ଏହିସବୁ ଲୋକ ସଭା ଅଧୀନ ବିଧାୟକମାନେ ଦଳରୁ କେଉଁମାନେ ଏମ୍ପି ହେବେ ସେନେଇ ଖୁଲମଖୁଲା ଗପିବା ଆରମ୍ଭ କରିଦେଲେଣି। ପୁରୀରୁ ପିନାକୀ ମିଶ୍ର ଏବେ ଏମ୍ପି ଅଛନ୍ତି। ଏଥର ତାଙ୍କ ସ୍ଥାନରେ ଶାସକ ଦଳ ପକ୍ଷରୁ ଅରୂପ ପଟ୍ଟନାୟକଙ୍କୁ ଟିକେଟ ମିଳିପାରେ। ପିନାକୀ ପୁରୀ ଲୋକ ସଭା ଆସନରୁ ୨୦୦୯, ୨୦୧୪ ଏବଂ ୨୦୧୯ରେ ବିଜେଡି ଟିକେଟରେ ଜିତିଥିଲେ। ହେଲେ ୨୦୧୯ ନିର୍ବାଚନରେ ସେ ଭାଜପା ପ୍ରାର୍ଥୀ ସମ୍ବିତ ପାତ୍ରଙ୍କଠାରୁ ୧୧,୭୧୪ ଖଣ୍ଡ ଭୋଟ ବ୍ୟବଧାନରେ ଜିତିଥିଲେ। ତେବେ ଅରୂପଙ୍କ ନିଜ ଗାଁ ପୁରୀ ଜିଲା ପିପିଲି ନିର୍ବାଚନମଣ୍ଡଳୀରେ। ଅନ୍ୟପଟେ ଅରୂପ ଗତଥର ଭୁବନେଶ୍ୱର ଲୋକ ସଭା ଆସନରୁ ବିଜେଡି ଟିକେଟରେ ପ୍ରାର୍ଥୀ ହୋଇଥିଲେ। ଭାଜପା ଏହି ଆସନରୁ ପୂର୍ବତନ ଆଇଏଏସ୍ ଅଧିକାରୀ ଅପରାଜିତା ଷଡ଼ଙ୍ଗୀଙ୍କୁ ପ୍ରାର୍ଥୀ କରିଥିଲା। ଅପରାଜିତା ୨୩,୮୩୯ ଖଣ୍ଡ ଭୋଟ ବ୍ୟବଧାନରେ ଅରୂପଙ୍କୁ ହରାଇଥିଲେ। ଗତଥର ଅରୂପ ଏବଂ ଅପରାଜିତା ସେମାନଙ୍କ ରାଜନୈତିକ କ୍ୟାରିୟରର ପ୍ରଥମ ଇଂନିସ୍ ଆରମ୍ଭ କରିଥିଲେ। ଏବେ ଏହି ଆସନରୁ ଦଳ ଅରୂପଙ୍କ ସ୍ଥାନରେ ଶ୍ରୀମୟୀ ମିଶ୍ରଙ୍କୁ ଟିକେଟ ଦେବ ବୋଲି ଯୋଜନା କରିଥିବା କୁହାଯାଉଛି। ଶ୍ରୀମୟୀ ମଧ୍ୟ ଦୁଇ ମାସରୁ ଅଧିକ ହେଲା ପ୍ରଚାର କାର୍ଯ୍ୟରେ ଲାଗିପଡ଼ିଲେଣି। ଅନୁରୂପ ଭାବେ କଟକ ଲୋକ ସଭା ଆସନରୁ ଭର୍ତ୍ତୃହରି ମହତାବ ୬ ଥର ନିର୍ବାଚନ ଲଢ଼ି ବିଜୟୀ ହୋଇଛନ୍ତି। ଲଗାତର ୨୬ ବର୍ଷ ହେଲା ସେ ଏହି ଆସନରୁ ଏମ୍ପି ଭାବେ ଅଛନ୍ତି। ଏଥର କିନ୍ତୁ ନିକଟରେ ବିଜେଡିରେ ସାମିଲ ହୋଇଥିବା ସନ୍ତୃପ୍ତ ମିଶ୍ର ଟିକେଟ ପାଇବା ନେଇ ଆଲୋଚନା ପ୍ରବଳ ମାତ୍ରାରେ ଚାଲିଛି। ଯଦି ଏଭଳି ଘଟେ, ତେବେ ଭର୍ତ୍ତୃହରିଙ୍କୁ ଦଳ ଟିକେଟ ଦେବ ନା ନାହିଁ ସେକଥା ମଧ୍ୟ ସ୍ପଷ୍ଟ ହୋଇଯିବ ।
