ନୂଆଦିଲ୍ଲୀ,୧୮ ।୧୦: ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲ ଗୋଟିଏ ଦିନ ପୂର୍ବରୁ ମନୀଷ ସିସୋଡିଆଙ୍କୁ ଭଗତ ସିଂଙ୍କ ସହ ତୁଳନା କରିଥିଲେ । ଯାହାକୁ ନେଇ ଏବେ ବିବାଦ ଉଠିଛି । ଭାରତୀୟ ଜନତା ପାର୍ଟି(ଭାଜପା)ର ମହାସଚିବ ଜୀବନ ଗୁପ୍ତା କହିଛନ୍ତି ଏଏପି ସୁପ୍ରିମୋ ଅରବିନ୍ଦ କେଜରିୱାଲ ଦିଲ୍ଲୀର ମନ୍ତ୍ରୀ ମନୀଷ ସିସୋଡିଆଙ୍କୁ ଦେଶର ମହାନାୟକ ଭଗତ ସିଂଙ୍କ ସହ ତୁଳନା କରିବା ଭୁଲ । ସେ କହିଛନ୍ତି ଯାହାଙ୍କ ନାମରେ ଭ୍ରଷ୍ଟାଚାର ଅଭିଯୋଗ ରହିଛି ତାଙ୍କୁ ଦେଶର ଆଦର୍ଶ ଶହୀଦଙ୍କ ସହ ତୁଳନା କରିବା ଶହୀଦଙ୍କ ଅପମାନ ଓ ଏହା ନିନ୍ଦନୀୟ । ଜୀବନ ଗୁପ୍ତା ଆହୁରି ମଧ୍ୟ କହିଛନ୍ତି ଯେଉଁ ବ୍ୟକ୍ତି ଭ୍ରଷ୍ଟାଚାର ଓ ଅନ୍ୟ ମାମଲାରେ ସିବିଆଇ ତଥା ଅନ୍ୟ ଯାଞ୍ଚ ଏଜେନ୍ସିର ସାମ୍ନା କରୁଛନ୍ତି ତାଙ୍କର ତୁଳନା ୨୩ ବର୍ଷ ବୟସରେ ଦେଶପାଇଁ ପ୍ରାଣବଳୀ ଦେଇଥିବା ଶହୀଦ ଭଗତ ସିଂ ସହ କେମିତି କରାଯିପାରିବ ।
କେବଳ ଭାଜପା ନୁହେଁ ଅନ୍ୟ କିଛି ରାଜନୈତିକ ଦଳ ବି କେଜରିୱାଲଙ୍କୁ ବିରୋଧ କରିଛନ୍ତି । କଂଗ୍ରେସ ନେତା ସୁଖପାଲ ସିଂ ଖୈରା କେଜରିୱାଲଙ୍କୁ କ୍ଷମା ମାଗିବାକୁ କହିଛନ୍ତି । ସେ ଟୁଇଟ କରି ଲେଖିଛନ୍ତି, ଅରବିନ୍ଦ କେଜରିୱାଲ ଶହୀଦ ଭଗତ ସିଂ ଓ ଅନ୍ୟ ଶହୀଦଙ୍କ ଅପମାନ କରିଛନ୍ତି । ତେଣୁ ସେ ବିନା ସର୍ତ୍ତରେ କ୍ଷମା ମାଗନ୍ତୁ । କେଜରିୱାଲ ଭାରତକୁ ଲୁଟୁଛନ୍ତି, ହେଲେ ଭଗତ ସିଂ ଭାରତ ପାଇଁ ନିଜ ଜୀବନ ଦେଇ ଦେଇଛନ୍ତି ।
