ଚଣ୍ଡିଗଡ଼,୧୧।୬: ପଞ୍ଜାବ ସରକାର ଏକ ବଡ ନିଷ୍ପତ୍ତି ନେଇ ପେଟ୍ରୋଲ ଏବଂ ଡିଜେଲ ଉପରେ ଭାଟ ବୃଦ୍ଧି କରିଛନ୍ତି। ଏହାର ଅର୍ଥ ହେଉଛି ବର୍ତ୍ତମାନ ପଞ୍ଜାବର ଲୋକଙ୍କୁ ଏକ ଲିଟର ପେଟ୍ରୋଲ ପାଇଁ ଅଧିକ ଟଙ୍କା ଦେବାକୁ ପଡିବ। ଏଥି ସହିତ ଡିଜେଲର ମୂଲ୍ୟ ମଧ୍ୟ ବୃଦ୍ଧି ପାଇଛି। ବର୍ତ୍ତମାନ ରାଜ୍ୟରେ ଗୋଟିଏ ଲିଟର ପେଟ୍ରୋଲର ମୂଲ୍ୟ ୯୮ ଟଙ୍କା ୬୫ ପଇସା ହେବ। ଏଥି ସହିତ ଡିଜେଲର ମୂଲ୍ୟ ଲିଟର ପିଛା ୮୮ ଟଙ୍କା ୯୫ ପଇସାକୁ ବୃଦ୍ଧି ପାଇଛି।
ପଞ୍ଜାବ ସରକାର ଏପରି ନିଷ୍ପତ୍ତି ନେଇଛନ୍ତି ଯେଉଁ ସମୟରେ ଗତ ବର୍ଷ ଠାରୁ ପେଟ୍ରୋଲ ଏବଂ ଡିଜେଲ ମୂଲ୍ୟରେ କୌଣସି ପରିବର୍ତ୍ତନ ହୋଇନାହିଁ।ଏପ୍ରିଲ ୨୦୨୨ରୁ ପେଟ୍ରୋଲ ଓ ଡିଜେଲର ଦାମ ସ୍ଥିର ରହିଥିଲା। ନୂଆଦିଲ୍ଲୀ ସମେତ ସମସ୍ତ ମହାନଗରରେ ଏହାର ଦାମରେ କୌଣସି ପରିବର୍ତ୍ତନ ହୋଇନାହିଁ।
ପେଟ୍ରୋଲ ଭାଟ ହାର ପ୍ରାୟ ୧.୮ ପ୍ରତିଶତ ବୃଦ୍ଧି କରାଯାଇଛି। ଏହି କାରଣରୁ ପେଟ୍ରୋଲ ଲିଟର ପିଛା ୯୨ ପଇସା ମହଙ୍ଗା କରାଯାଇଛି। ଏଥି ସହିତ ଡିଜେଲ ଭାଟ ହାର ୧.୧୩ ପ୍ରତିଶତ ବୃଦ୍ଧି ପାଇଛି। ଏଥିରେ ଲିଟର ପିଛା ୯୦ ପଇସା ବୃଦ୍ଧି ହୋଇଛି । ବର୍ଦ୍ଧିତ ମୂଲ୍ୟ ଶନିବାର ମଧ୍ୟରାତ୍ରିରୁ କାର୍ଯ୍ୟକାରୀ ହୋଇଛି।
