ଚଣ୍ଡିଗଡ଼,୧୩।୧୦: ଆଗାମୀ ଲୋକ ସଭା ନିର୍ବାଚନ ପୂର୍ବରୁ ପଞ୍ଜାବରେ ଭାରତୀୟ ଜନତା ପାର୍ଟି(ଭାଜପା)କୁ ବଡ ଝଟକା ଲାଗିଛି। ପୂର୍ବତନ ମନ୍ତ୍ରୀ ରାଜ କୁମାର ଭେର୍କା ଏବେ ନିଜ ଘରକୁ ଫେରିବା ଘୋଷଣା କରିଛନ୍ତି। ୨୦୨୨ବିଧାନସଭା ନିର୍ବାଚନରେ ପରାଜୟର ସମ୍ମୁଖୀନ ହେବା ପରେ ହାତ ଛାଡି ପଦ୍ମ ଧରିଥିବା ଭେର୍କା ପୁଣି ଥରେ ଘରକୁ ଫେରିବାକୁ ନିଷ୍ପତ୍ତି ନେଇଛନ୍ତି। ସେ ପୁଣି କଂଗ୍ରେସରେ ଯୋଗଦେବାକୁ ଯାଉଛନ୍ତି। ରାଜ କୁମାର ଭେର୍କା କହିଛନ୍ତି ଯେ ସେ ଅନେକ ଦିନ ଚିନ୍ତା କରିବା ପରେ ଏହି ନିଷ୍ପତ୍ତି ନେଇଛନ୍ତି।
ଭେର୍କା କହିଛନ୍ତି, ଅନେକ ଦିନ ଚିନ୍ତା କରିବା ପରେ ମୁଁ ନିଷ୍ପତ୍ତି ନେଇଛି ଯେ ମୁଁ ଭାଜପା ଛାଡୁଛି। ମୁଁ ଭାଜପାରୁ ଇସ୍ତଫା ଦେଉଛି। ଏହାପରେ ମୁଁ ବର୍ତ୍ତମାନ ଦିଲ୍ଲୀ ଯାଉଛି। ମୁଁ କଂଗ୍ରେସ ପାର୍ଟିରେ ଯୋଗଦେବାକୁ ଯୋଜନା କରୁଛି। ଭେର୍କାଙ୍କ କଂଗ୍ରେସରେ ଯୋଗଦେବା ନେଇ ପଞ୍ଜାବ ଭାଜପା ମୁଖପାତ୍ର ଅନିଲ ସରିନ ପ୍ରତିକ୍ରିୟା ରଖିଛନ୍ତି। ଏହା ଅତ୍ୟନ୍ତ ଦୁର୍ଭାଗ୍ୟଜନକ ବୋଲି ସେ କହିଛନ୍ତି। ଯେତେବେଳେ ସେ ଭାଜପାରେ ଯୋଗ ଦେଇଥିଲେ ସେତେବେଳେ ତାଙ୍କୁ ସମ୍ମାନ ଦିଆଯାଇଥିଲା ବୋଲି ଅନିଲ କହିଛନ୍ତି।
