ଭୁବନେଶ୍ୱର, ୭।୧୨: ପଞ୍ଜାବ ଆଣ୍ଡ ସିନ୍ଧ୍ ବ୍ୟାଙ୍କର ଭୁବନେଶ୍ୱର ଆଞ୍ଚଳିକ କାର୍ଯ୍ୟାଳୟ ପକ୍ଷରୁ ମଙ୍ଗଳବାର ସ୍ଥାନୀୟ ଜୟଦେବ ବିହାର ନିକଟସ୍ଥ ଏକ ହୋଟେଲରେ ବ୍ୟାଙ୍କର ଓଡିଶା କ୍ଷେତ୍ରର କାରବାର ସମ୍ପର୍କିତ ଏକ ସମୀକ୍ଷା ବୈଠକ ଆୟୋଜିତ ହୋଇଥିଲା। ଏଥିରେ ପଞ୍ଜାବ ଆଣ୍ଡ ସିନ୍ଧ୍ ବ୍ୟାଙ୍କର ପରିଚାଳନା ନିର୍ଦ୍ଦେଶକ ତଥା ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ସ୍ବରୂପ କୁମାର ସାହା ସମ୍ମାନିତ ଅତିଥି ଭାବେ ଯୋଗ ଦେଇଥିଲେ। ଏହି ପରିପ୍ରେକ୍ଷୀରେ ସେ ବ୍ୟାଙ୍କର କର୍ମଚାରୀଙ୍କୁ ଚଳିତ ଆର୍ଥିକ ବର୍ଷ ଶେଷ ସୁଦ୍ଧା ଧାର୍ଯ୍ୟ ଲକ୍ଷ୍ୟ ହାସଲ ପାଇଁ ଥିବା ବିଭିନ୍ନ ଦିଗ ଉପରେ ସୂଚନା ଦେଇଥିଲେ। ଏପରିକି ବ୍ୟାଙ୍କର ଚଳିତ ଆର୍ଥିକ ବର୍ଷ ଶେଷ ସୁଦ୍ଧା ରାମ୍ (ଆର୍ଏଏମ୍) କ୍ଷେତ୍ରରେ ୧୫% ଏବଂ କର୍ପୋରେଟ୍ କ୍ଷେତ୍ରରେ ୭ରୁ ୮% ଅଭିବୃଦ୍ଧି ହାର ହାସଲ ପାଇଁ ଲକ୍ଷ୍ୟ ଧାର୍ଯ୍ୟ ରହିଛି। ସେହିଭଳି ଗତ ଆର୍ଥିକ ବର୍ଷରେ ହୋଇଥିବା ଲାଭକୁ ପୁଣି ଥରେ ଦୋହରାଇବା ସହ ସାରା ଦେଶରେ ବ୍ୟାଙ୍କର ଶାଖା ସଂଖ୍ୟାକୁ ବୃଦ୍ଧି କରିବା ସହିତ ଗୁଣାତ୍ମକଭାବେ ଏହାର କଳେବର ବୃଦ୍ଧି ସମ୍ପର୍କରେ ସେ ଆଲୋକପାତ କରିଥିଲେ। ସେହିପରି ଚଳିତ ଆର୍ଥିକ ବର୍ଷରେ ବ୍ୟାଙ୍କର କାସା ପରିମାଣକୁ ୩୫% ରଖିବା ସହ ଏହାର ବର୍ତ୍ତମାନ ଥିବା ନିମ୍କୁ ରିଫାଇନ୍ କରିବା ଓ ଏନ୍ଏଆରସିଏଲ୍କୁ ଅଣକାର୍ଯ୍ୟକାରୀ ସମ୍ପତ୍ତି ବିକ୍ରୟ କରିବା ପାଇଁ ଧ୍ୟାନ ଦେଉଥିବା ବିଷୟରେ ମଧ୍ୟ ସେ ଉଲ୍ଲେଖ କରିଛନ୍ତି। ଅନ୍ୟମାନଙ୍କ ମଧ୍ୟରେ ବ୍ୟାଙ୍କ୍ର ବିଜୟୱାଡା ଆଞ୍ଚଳିକ କାର୍ଯ୍ୟାଳୟର ମୁଖ୍ୟ ଜି. ଶ୍ରୀନିବାସ, ଭୁବନେଶ୍ୱର ମୁଖ୍ୟ ଶାଖାର ମୁଖ୍ୟ ସଞ୍ଜୀବ ସୁମନ୍ଙ୍କ ସମେତ ବହୁ ବରିଷ୍ଠ ଅଧିକାରୀ ଓ ଅନ୍ୟମାନେ ମଧ୍ୟ ଉପସ୍ଥିତ ଥିଲେ। ଉଲ୍ଲେଖଯୋଗ୍ୟ ଯେ ସାହା ଓଡିଶା ଗସ୍ତରେ ଆସିଥିବା ବେଳେ ବ୍ୟାଙ୍କର ବିଭିନ୍ନ କାର୍ଯ୍ୟକଳାପ, ଅଧିକାରୀମାନଙ୍କ ସହ ବୈଠକ ଏବଂ ରାଜ୍ୟର ବିଭିନ୍ନ ଶିଳ୍ପ ସଂସ୍ଥା ଓ ଅନ୍ୟମାନଙ୍କ ସହ ସ୍ବତନ୍ତ୍ର ବୈଠକରେ ଯୋଗଦେବାର କାର୍ଯ୍ୟକ୍ରମ ରହିଛି ବୋଲି ବ୍ୟାଙ୍କ ପକ୍ଷରୁ କୁହାଯାଇଛି।
