ସିଡ୍ନୀ, ୧୨ା୧ (ପି.ଟି.)-ଭାରତ ବିପକ୍ଷ ତୃତୀୟ ଡ୍ର’ ଟେଷ୍ଟ ମ୍ୟାଚରେ ଅଷ୍ଟ୍ରେଲିଆର ପଦାର୍ପଣକାରୀ ବ୍ୟାଟ୍ସମ୍ୟାନ ଓ୍ବିଲ୍ ପୁକୋଭସ୍କି ଆହତ ହୋଇଛନ୍ତି। ସ୍କାନ ପାଇଁ ତାଙ୍କୁ ସ୍ଥାନୀୟ ଏକ ହସ୍ପିଟାଲକୁ ନିଆଯାଇଥିଲା। ସିଡ୍ନୀ କ୍ରିକେଟ ଗ୍ରାଉଣ୍ଡ ଚତୁର୍ଥ ଦିବସ ଖେଳ ବେଳେ ଭାରତ ଇନିଂସର ୮୬ତମ ଓଭରରେ ମିଡ୍ଉଇକେଟ ଅଞ୍ଚଳରେ ବଲ୍ ପାଇଁ ଡାଇଭ୍ ମାରୁଥିବାବେଳେ ଏହି ୨୨ବର୍ଷୀୟ ଖେଳାଳିଙ୍କ ଡାହାଣ କାନ୍ଧରେ ଆଘାତ ଲାଗିଛି। ଡାଇଭ୍ ମାରି ଆହତ ହେବା ପରେ ପୁକୋଭସ୍କି କିଛି ସମୟ ତାଙ୍କ କାନ୍ଧକୁ ଚାପି ଧରିଥିଲେ। ଓଭର ଶେଷରେ ଏହି ଯୁବ ଖେଳାଳି ପଡ଼ିଆ ଛାଡ଼ିଥିଲେ। ଫଳରେ ତାଙ୍କର ଅନ୍ତିମ ଟେଷ୍ଟ ଖେଳିବା ନେଇ ସନ୍ଦେହ ସୃଷ୍ଟି ହୋଇଛି। ପୁକୋଭସ୍କି ତାଙ୍କ ପଦାର୍ପଣ ମ୍ୟାଚର ପ୍ରଥମ ଇନିଂସରେ ୬୨ ରନ ସଂଗ୍ରହ କରି ଦୃଷ୍ଟି ଆକର୍ଷଣ କରିଥିଲେ। କିନ୍ତୁ ଦ୍ୱିତୀୟ ଇନିଂସରେ ମାତ୍ର ୧୦ରନ କରି କଟ୍ ବିହାଇଣ୍ଡ ହୋଇଥିଲେ। ଅନ୍ୟପକ୍ଷରେ ପୁକୋଭସ୍କିଙ୍କ ଫିଟ୍ନେସ୍ ଉପରେ କୌଣସି ବିଧିବଦ୍ଧ ସୂଚନା ମିଳିନାହିଁ।
