ନୂଆଦିଲ୍ଲୀ,୧୮।୪: ଚେତେଶ୍ୱର ପୂଜାରା (୨୦୧*)ଙ୍କ ଅପରାଜିତ ଦ୍ୱିଶତକ ଯୋଗୁ ସସେକ୍ସ ଏବଂ ଡର୍ବିଶାୟାର ମଧ୍ୟରେ ଚାଲିଥିବା କାଉଣ୍ଟି ଚାମ୍ପିୟନଶିପ୍ ଡିଭିଜନ ୨ ମ୍ୟାଚ୍ ଅମୀମାଂସିତ ରହିଛି। କାଉଣ୍ଟି ଚାମ୍ପିୟନଶିପ୍ରେ ଦ୍ୱିଶତକ ହାସଲ କରିବାରେ ସେ ହେଉଛନ୍ତି ଦ୍ୱିତୀୟ ଭାରତୀୟ ବ୍ୟାଟର। ତାଙ୍କ ପୂର୍ବରୁ ଏକମାତ୍ର ଭାରତୀୟ ବ୍ୟାଟର ଭାବେ ପୂର୍ବତନ ଅଧିନାୟକ ମହମ୍ମଦ ଆଜାରୁଦ୍ଦିନ ଏହି ସଫଳତା ହାସଲ କରିଥିଲେ। ତେବେ ଆଜାରୁଦ୍ଦିନ ଦୁଇଥର କାଉଣ୍ଟି କ୍ରିକେଟରେ ଦ୍ୱିଶତକ କରିଥିଲେ। ଡର୍ବିଶାୟାର ପକ୍ଷରୁ ପ୍ରତିନିଧିତ୍ୱ କରି ୧୯୯୧ରେ ଲେସିଷ୍ଟରଶାୟାର ବିପକ୍ଷରେ ୨୧୨ ଏବଂ ୧୯୯୪ରେ ଡର୍ହାମ ବିପକ୍ଷରେ ୨୦୫ ରନ୍ର ପାଳି ଖେଳିଥିଲେ।
ତେବେ ୨୦୧* ରନ୍ର ଇନିଂସ ପୂଜାରାଙ୍କ ପାଇଁ ଥିଲା ପ୍ରଥମ ଶ୍ରେଣୀ କ୍ୟାରିୟରର ୧୪ତମ ଦ୍ୱିଶତକ। ଏଥିସହିତ ସେ ଏସିଆର ସର୍ବାଧିକ ପ୍ରଥମ ଶ୍ରେଣୀ ଦ୍ୱିଶତକ ହାସଲ କରିବାରେ ଶ୍ରୀଲଙ୍କାର ପୂର୍ବତନ ଅଧିନାୟକ କୁମାର ସଙ୍ଗାକାରା(୧୩)ଙ୍କୁ ପଛରେ ପକାଇଛନ୍ତି। ମ୍ୟାଚ୍ର ପ୍ରଥମ ଇନିଂସରେ ଡର୍ବିଶାୟାର ୫୦୫/୮ ରନ୍ କରିଥିଲା। ଜବାବରେ ୧୭୪ରେ ସୀମିତ ରହିଥିଲା ସସେକ୍ସର ପ୍ରଥମ ଇନିଂସ। କିନ୍ତୁ ଦ୍ୱିତୀୟ ଇନିଂସରେ ପୂଜାରାଙ୍କ ୨୦୧* ଏବଂ ଅଧିନାୟକ ଟମ୍ ହେନ୍ସ (୨୪୩)ଙ୍କ ଯୋଗୁ ସସେକ୍ସ ଅନ୍ତିମ ଦିନ ଶେଷ ପର୍ଯ୍ୟନ୍ତ ବ୍ୟାଟିଂ କରି ୩ ଉଇକେଟ ହରାଇ ୫୧୩ ରନ୍ କରିଥିଲା।
