ନ୍ୟୁୟର୍କ,୧୬।୨: ରିପବ୍ଲିକାନ ପାର୍ଟି ପକ୍ଷରୁ ୨୦୨୪ ରାଷ୍ଟ୍ରପତି ପଦ ପାଇଁ ନିର୍ବାଚନ ପ୍ରତିଦ୍ୱନ୍ଦ୍ୱିତା କରିବାକୁ ଘୋଷଣା ହେବା ପରେ ଭାରତୀୟ ବଂଶୋଦ୍ଭବ ଆମେରିକୀୟ ନେତା ନିକ୍କି ହାଲି ଆନୁଷ୍ଠାନିକ ଭାବେ ପ୍ରଚାର ଆରମ୍ଭ କରିଛନ୍ତି। ସେ ଦକ୍ଷିଣ କାରୋଲିନାରୁ ନିଜର ଅଭିଯାନ ଆରମ୍ଭ କରିଥିଲେ। ଏହି ଅବସରରେ ହାଲି କହିଛନ୍ତି, ସେ ନିଜ ଜୀବନକୁ ଏହି ନିର୍ବାଚନ ଯୁଦ୍ଧରେ ଉତ୍ସର୍ଗ କରିଛନ୍ତି। ସେ ଏକ ଶକ୍ତିଶାଳୀ ତଥା ଗର୍ବିତ ଆମେରିକା ପାଇଁ ରାଷ୍ଟ୍ରପତି ପ୍ରାର୍ଥୀ ହେଉଛନ୍ତି।
ହାଲି କହିଛନ୍ତି, ମୁଁ ପ୍ରବାସୀ ଭାରତୀୟ ଝିଅ, ଜଣେ ଯୁଦ୍ଧ ଯୋଦ୍ଧାଙ୍କ ସ୍ତ୍ରୀ ଏବଂ ଦୁଇ ସନ୍ତାନର ମା’ ଭାବରେ ଆପଣଙ୍କ ସମ୍ମୁଖରେ ଠିଆ ହୋଇଛି। ମୁଁ ଦକ୍ଷିଣ କାରୋଲିନାର ରାଜ୍ୟପାଳ ତଥା ମିଳିତ ଜାତିସଂଘରେ ଆମେରିକାର ରାଷ୍ଟ୍ରଦୂତ ଭାବରେ କାର୍ଯ୍ୟ କରିଛି। ସର୍ବୋପରି, ମୁଁ ଜଣେ ଗର୍ବିତ ଆମେରିକୀୟ ନାଗରିକ। ମୋ ମାତାପିତା ଏକ ଭଲ ଜୀବନ ଖୋଜିବା ପାଇଁ ଭାରତରୁ ଆମେରିକା ଆସିଥିଲେ ଏବଂ ଦକ୍ଷିଣ କାରୋଲିନାର ବାମବର୍ଗରେ ଅବସ୍ଥାନ କରିଥିଲେ। ଆମର ଖରାପ ଦିନରେ ଆମେରିକା ଆମ ପାଖରେ ଛିଡା ହୋଇଛି। ଏଥିପାଇଁ ଆମେ କୃତଜ୍ଞ।
ଆମେରିକାର ରାଷ୍ଟ୍ରପତି ଜୋ ବାଇଡେନଙ୍କୁ ଟାର୍ଗେଟ୍ କରି ହାଲି କହିଛନ୍ତି, ଆଜି ଆମେରିକା ପଛରେ ଅଛି। ବାଇଡେନ୍ ହେଉଛନ୍ତି ଏହି ବିଫଳତାର ଉଦାହରଣ।
୨୦୨୪ ରାଷ୍ଟ୍ରପତି ନିର୍ବାଚନ ପାଇଁ ହାଲି ଆନୁଷ୍ଠାନିକ ଭାବେ ତାଙ୍କ ପ୍ରାର୍ଥୀପତ୍ର ଉପସ୍ଥାପନ କରିଛନ୍ତି। ରିପବ୍ଲିକାନ ପାର୍ଟି ମଧ୍ୟରେ ସେ ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ସହ ପ୍ରତିଦ୍ୱନ୍ଦ୍ୱିତା କରିବେ।
