ଭରତପୁର,୨୩।୪: ସରକାରୀ ନିଯୁକ୍ତି ଏବଂ ଶିକ୍ଷାନୁଷ୍ଠାନଗୁଡ଼ିକରେ ଅଲଗା ୧୨ ପ୍ରତିଶତ ସ୍ଥାନ ସଂରକ୍ଷଣ ଦାବି ନେଇ ମାଲି ସମ୍ପ୍ରଦାୟର ସଦସ୍ୟମାନେ ଶନିବାର ଜୋର୍ଦାର ବିକ୍ଷୋଭ ପ୍ରଦର୍ଶନ କରିଛନ୍ତି। ରାଜସ୍ଥାନର ଭରତପୁରଠାରେ ସେମାନେ ଜୟପୁର-ଆଗ୍ରା ଜାତୀୟ ରାଜପଥକୁ ଅବରୋଧ କରିଥିଲେ। ଗୁଜବ ପ୍ରଚାର ଆଶଙ୍କାରେ ଭରତପୁର ଜିଲା ପ୍ରଶାସନ ୩ ତହସିଲ୍ ଅଞ୍ଚଳରେ ୨୪ ଘଣ୍ଟା ପାଇଁ ଇଣ୍ଟରନେଟ୍ ସେବା ବନ୍ଦ କରିଦେଇଛି। ବିକ୍ଷୋଭ ଜାରି ରହିଥିବାରୁ ବାଏର, ନାଦବାଇ ଏବଂ ଭୁସାଭର ତହସିଲରେ ଇଣ୍ଟରନେଟ୍ ସେବା ବନ୍ଦ କରାଯାଇଥିବା ଭରତପୁର ଡିଭିଜନାଲ କମିଶନର ସନଓ୍ବାରମଲ ବର୍ମା କହିଛନ୍ତି। ଜାତୀୟ ରାଜପଥରେ ଗହଳି କମାଇବା ପାଇଁ ସେଭାର କ୍ରସିଂରୁ ଗାଡ଼ିଗୁଡ଼ିକୁ ଅନ୍ୟ ରୁଟ୍ରେ ଛଡ଼ାଯାଉଛି।
ସମ୍ପ୍ରଦାୟର ଲୋକମାନେ ଶୁକ୍ରବାର ବିକ୍ଷୋଭ କରିବା ସହ ପୋଲିସ ଉପରକୁ ଟେକାମାଡ଼ କରିଥିଲେ। ସେମାନଙ୍କୁ ଘଉଡ଼ାଇବାକୁ ଯାଇ ପୋଲିସ ଲୁହବୁହା ଗ୍ୟାସ୍ ଛାଡ଼ିଥିଲା। ମାଲି ସମ୍ପ୍ରଦାୟ ଓବିସି ବର୍ଗରେ ଆସୁଛନ୍ତି। ସେମାନେ ୧୨ ପ୍ରତିଶତ ସ୍ବତନ୍ତ୍ର ସଂରକ୍ଷଣ ଲାଗି ଦାବି ଉଠାଇ ଜାତୀୟ ରାଜପଥ ଅବରୋଧ କରିବେ ବୋଲି ଘୋଷଣା କରିଥିଲେ। ଆନ୍ଦୋଳନକୁ ଦୃଷ୍ଟିରେ ରଖି ପୋଲିସ ଜାତୀୟ ରାଜପଥକୁ ସଂଯୋଗ କରୁଥିବା ବିଭିନ୍ନ ରାସ୍ତାରେ ବ୍ୟାରିକେଡ୍ କରିଥିଲା। ଶୁକ୍ରବାର ସାମାଜିକ ନ୍ୟାୟ ଓ ସଶକ୍ତୀକରଣ ବିଭାଗର ଅଧିକାରୀମାନେ ଜୟପୁରରେ ମାଲି ସମ୍ପ୍ରଦାୟର ପ୍ରତିନିଧିମାନଙ୍କ ସହ ବୈଠକ ଡାକି ଆଲୋଚନା କରିଥିଲେ। ପ୍ରତିନିଧିମାନେ ବୈଠକରେ ୧୨% କୋଟା ସାଙ୍ଗକୁ ସ୍ବତନ୍ତ୍ର ଲବକୁଶ କଲ୍ୟାଣ ବୋର୍ଡ, ସେମାନଙ୍କ ପିଲାମାନଙ୍କ ପାଇଁ ହଷ୍ଟେଲ ସୁବିଧା ଆଦି ଦାବି ଉଠାଇଥିଲେ। ଗତବର୍ଷ ଜୁନ୍ରେ ମାଲି ସମ୍ପ୍ରଦାୟ ଅନୁରୂପ ବିକ୍ଷୋଭ କରିଥିବାବେଳେ ପ୍ରତିଶ୍ରୁତି ପରେ ସେମାନେ ଓହରିଯାଇଥିଲେ।
