କୋଡ଼ିଙ୍ଗା, ୪।୫(ଡି.ଏନ୍.ଏ.): ନବରଙ୍ଗପୁର ଜିଲା କୋଡ଼ିଙ୍ଗା ଥାନା ଅଧୀନ ଡାଡିଆ ମଝିଗୁଡା ଗାଁରେ ଦେଶୀମଦ ଭାଟିକୁ ଗ୍ରାମବାସୀ ଭାଙ୍ଗି ଦେଇଛନ୍ତି। ଶୋଭାଯାତ୍ରାରେ ଶତାଧିକ ମହିଳା ପୁରୁଷ ଆସି ମଦ ଭାଟି ଭିତରେ ପ୍ରବେଶ କରି ରନ୍ଧା ଦେଶୀ ମଦ, ମଦ, ମହୁଲ ପୋଚ ଆଦି ନଷ୍ଟ କରିଦେଲେ। ଏହି ଘଟଣାରେ ଥାନାରେ ମାମଲା ହୋଇଛି। ଏନେଇ କୋଡିଙ୍ଗା ଥାନାରେ ଏକ ମାମଲା ରୁଜୁ କରାଯାଇ ୩ ଜଣକୁ ଅଟକ ରଖାଯାଇ ତଦନ୍ତ ଚାଲିଥିବା ପାପଡାହାଣ୍ଡି ଏସ୍ଡିପିଓ ଆଦିତ୍ୟ ସେନ ସୂଚନା ଦେଇଛନ୍ତି।
ନବରଙ୍ଗପୁର ଜିଲା କୋଷାଗୁମୁଡା ବ୍ଲକ ବିଏମ୍ ସେମଳା ପଞ୍ଚାୟତ ଦାଡିଆ ମାଝିଗୁଡା ଗ୍ରାମରେ ବହୁ ବର୍ଷ ହେଲା ଗୋଟିଏ ଦେଶୀ ମଦ ଭାଟି ରହିଥିଲା। ଏଥିରେ ମଦ ତିଆରି ହେବାକୁ ନିୟମ ଥିବାବେଳେ ପାଉଚ ମାଧ୍ୟମରେ ଗାଁ ଗାଁକୁ ନେଇ ଭାଟି ମାଲିକ, କର୍ମଚାରୀ ବିକ୍ରୀ କରୁଥିବା ନେଇ ଗ୍ରାମବାସୀ ଦୀର୍ଘଦିନରୁ ଅଭିଯୋଗ କରିଆସୁଥିଲେ। ଦୀର୍ଘ ଦିନଧରି ଗ୍ରାମବାସୀ ଏହି ଦେଶୀମଦ ଭାଟି ବନ୍ଦ କରିବା ପାଇଁ ବାରମ୍ବାର ଦାବି କରିଆସୁଥିଲେ। ପ୍ରଶାସନ ଏହାକୁ କର୍ଣ୍ଣପାତ କରୁ ନ ଥିବାରୁ ଗ୍ରାମର ଶତାଧିକ ମହିଳା ଓ ପୁରୁଷ ହାତରେ ପ୍ଲା କାର୍ଡ ସହ ଠେଙ୍ଗାବାଡି ଧରି ମଦଭାଟି ବିରୋଧୀ ସ୍ଲୋଗାନ ଦେଇ ଭାଟି ନିକଟରେ ପହଞ୍ଚିଥିଲେ। ସେମାନେ ପୋଲିସର ଉପସ୍ଥିତିରେ ମଦ ଭାଟିର କବାଟ ଭାଙ୍ଗି ଭିତରେ ଧସେଇ ପଶି ମଦ ନଷ୍ଟ କରିବା ସହ ଆସବାହ ପତ୍ର, ମଦ ତିଆରି ପାଇଁ ବ୍ୟବହୁତ ଯନ୍ତ୍ରାଂଶ ଭାଙ୍ଗି ନଷ୍ଟ କରିଥିଲେ। କୋଡ଼ିଙ୍ଗା ତହସିଲଦାର ଟିକୁନୁ ପୁଟା, ପାପଡ଼ାହାଣ୍ଡି ଏସ୍ଡିପିଓ ଆଦିତ୍ୟ ସେନ, କୋଷାଗୁମୁଡ଼ା ଥାନା ଭାରପ୍ରାପ୍ତ ଅଧିକାରୀ ପ୍ରେମାନନ୍ଦ ସୁନାନୀ ସେଠାରେ ପହଞ୍ଚତ୍ ଲୋକଙ୍କୁ ବୁଝାଶୁଝା କରିଥିଲେ। ଏ ନେଇ କୋଡ଼ିଙ୍ଗା ଥାନାରେ ଏକ ମାମଲା ରୁଜୁ କରାଯାଇ ୩ଜଣକୁ ଅଟକ ରଖି ପୋଲିସ ତଦନ୍ତ କରୁଥିବା ଏସ୍ଡିପିଓ ସୂଚନା ଦେଇଛନ୍ତି।
