ମେଲ୍ବୋର୍ନ,୧୧ା୭: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ୨ ଦିନିଆ ଅଷ୍ଟ୍ରେଲିଆ ଗସ୍ତରେ ଯାଇ ବୁଧବାର ସେଠାରେ ପହଞ୍ଚତ୍ବାର କିଛି ସମୟ ପରେ ମେଲ୍ବୋର୍ନର ଏକ ହୋଟେଲରେ ଜଣେ ଅତି ଦକ୍ଷିଣପନ୍ଥୀ ଆପ୍ରବାସନ ବିରୋଧୀ ବିକ୍ଷୋଭକାରୀ ତାଙ୍କ ବିରୋଧରେ ଅଶ୍ଳୀଳ ଭାଷାରେ ସ୍ଲୋଗାନ ଦେଇଥିଲେ ବୋଲି ଏକ ରିପୋର୍ଟରୁ ଜଣାପଡ଼ିଛି। ଗୁରୁବାର ମେଲ୍ବୋର୍ନର ମାର୍ଭେଲ ଷ୍ଟାଡିୟମ୍ରେ ମୋଦି ପ୍ରବାସୀ ଭାରତୀୟମାନଙ୍କୁ ଉଦ୍ବୋଧନ ଦେଉଥିବାବେଳେ ଉକ୍ତ ବ୍ୟକ୍ତି ବାଧା ସୃଷ୍ଟି କରିବାକୁ ଉଦ୍ୟମ କରିଥିଲେ। ତେବେ ସେଠାରେ ଉଚ୍ଚ ସ୍ବରରେ ବାଜୁଥିବା ସଙ୍ଗୀତ ଯୋଗୁ ତାଙ୍କ ଶବ୍ଦ ଚପିଯାଇଥିଲା। ପରେ ସୁରକ୍ଷା କର୍ମୀ ତାଙ୍କୁ ସେଠାରୁ ତଡ଼ିଦେଇଥିଲେ। ସୋସିଆଲ ମିଡିଆର ଶେୟାର ହୋଇଥିବା ଏକ କ୍ଲିପ୍ରୁ ବିକ୍ଷୋଭକାରୀ ଜଣକ ହ୍ୟୁଗୋ ଲେନନ୍ ଓ ଜଣେ ଅନ୍ଲାଇନ ଅପରେଟର ବୋଲି ଚିହ୍ନଟ ହୋଇଛନ୍ତି। ହୋଟେଲ ଲବିରେ ମୋଦିଙ୍କୁ ରେଡ୍ କାର୍ପେଟ ସ୍ବାଗତ କରାଯାଉଥିବାବେଳେ ଲେନନ୍ ତାଙ୍କୁ ଚାହିଁ ଚିତ୍କାର କରୁଥିବା ଦେଖାଯାଇଥିଲା। ଏହା ଅଷ୍ଟ୍ରେଲିଆ, ଏଠାରେ ଆଉ ଭାରତୀୟଙ୍କ ସ୍ଥାନ ନାହିଁ, ଆମେ ଆଉ ଅଧିକ ଅପ୍ରବାସୀଙ୍କୁ ଚାହୁଁନାହୁଁ, ଏହି ଦେଶ କେବଳ ଅଷ୍ଟ୍ରେଲୀୟମାନଙ୍କ ପାଇଁ ବୋଲି ଲେନନ୍ ଚିତ୍କାର କରି କହୁଥିଲେ। ପ୍ରଥମ ମହଲା ବାଲ୍କୋନିରୁ ଲେନନ୍ଙ୍କୁ ପୋଲିସ ଘୋଷାରି ନେଇଥିଲା। ଲେନନ୍ ମୋଦିଙ୍କ ରହଣି ଓ କାର୍ଯ୍ୟକ୍ରମ ସ୍ଥଳ ସମ୍ପର୍କରେ କିପରି ଜାଣିଲେ ଓ ଏତେ ନିକଟକୁ ଗଲେ କିପରି ବୋଲି ପ୍ରଶ୍ନ ଉଠିଛି। ଗସ୍ତ ବେଳେ ମୋଦି ସହରର କେଉଁ ସ୍ଥାନକୁ ଯିବେ ତାହା କେତେକ ଦକ୍ଷିଣପନ୍ଥୀ ଇନ୍ଫ୍ଲୁଏନ୍ସର ପୂର୍ବରୁ ଶେୟାର କରିଥିଲେ ବୋଲି ସିଡ୍ନୀ ମର୍ନିଂ ହେରାଲ୍ଡ ପ୍ରକାଶ କରିଛି।