ପାଟଣା,୨୩।୯(ବୀର କିଶୋର ଦାଶ): କେନ୍ଦୁଝର ଜିଲା ପାଟଣା ତହସିଲ ଅଞ୍ଚଳରେ ପ୍ରସ୍ତାବିତ ମେଗା ଷ୍ଟିଲ ନିର୍ମାଣ ପ୍ରତିଷ୍ଠାକୁ ନେଇ ପ୍ଲାଣ୍ଟ ବିରୋଧୀ ଓ ସପକ୍ଷବାଦୀଙ୍କ କାର୍ଯ୍ୟକଳାପ ବୃଦ୍ଧି ପାଇବା ସହ ସର୍ବଦା ଉତ୍ତେଜନାମୂଳକ ପରିସ୍ଥିତି ଦେଖିବାକୁ ମିଳୁଛି।
ରବିବାର ସକାଳେ ଅଚାନକ ଭାବେ ଶତାଧିକ ପୋଲିସ ପ୍ରସ୍ତାବିତ ଜିନ୍ଦଲ-ପୋସ୍କୋ ଚିହ୍ନଟ କରିଥିବା ୧୮ ଟି ଗ୍ରାମ ମଧ୍ୟରୁ ଯମୁନା ପୋଷି ପଞ୍ଚାୟତର ସମସ୍ତ ଗାଁ ଓ ରାଜନଗର ପଞ୍ଚାୟତର ନୁଆଖମଣ ଗାଁରେ ପୋଲିସର ଫ୍ଲାଗମାର୍ଚ୍ଚ ଓ କୋଡ଼ଖମଣ ଗ୍ରାମରେ ଶତାଧିକ ପୋଲିସ ପ୍ରବେଶ କରି ବିନା କାରଣରେ ସୁବାଶିନୀ ମହାନ୍ତଙ୍କୁ ଯେଉଁଭଳି ଜୋରଜବରଦସ୍ତି ଟାଣି ଆଣିବାସହ ଅଶ୍ଳୀଳ ବ୍ୟବହାର କରି ଗାଡ଼ିରେ ବସାଇବା ଘଟଣା କୁ ସୋମବାର ଜିନ୍ଦଲ ପୋସ୍କୋ ପ୍ରତିରୋଧ ମଞ୍ଚର ସଭାପତି ଘନଶ୍ୟାମ ମହାନ୍ତ ଓ ସଂପାଦକ ବେଣୁଧର ସର୍ଦ୍ଦାର ମିଳିତ ଭାବେ ଏକ ପ୍ରେସ ବିବୃତିରେ ଦୃଢ଼ଭାବେ ନିନ୍ଦା କରିଛନ୍ତି।
ଏଥିସହିତ ଜିନ୍ଦଲ-ପୋସ୍କୋ ଷ୍ଟିଲ ପ୍ଲାଣ୍ଟ ପାଇଁ ଚିହ୍ନଟ କରାଯାଇ ଥିବା ୧୮ଟି ଗ୍ରାମରେ ଜଣେ ହେଲେ ସପକ୍ଷବାଦୀ ନ ଥିବାବେଳେ ସପକ୍ଷ ବିପକ୍ଷ ଆଳରେ ପୋଲିସ ଗାଁ ଗାଁରେ ଫ୍ଲାଗମାର୍ଚ୍ଚ କରି ନିରୀହ ନିରସ୍ତ୍ର ଲୋକଙ୍କୁ ତହସିଲଦାରଙ୍କ ଉପସ୍ଥିତିରେ ଭୟଭୀତ କରିବା ଓ ମଦ ମାଂସ ଖୁଆଇ ଲୋକଙ୍କୁ ଗ୍ରାମ ସଭା କରାଇବା ପାଇଁ ପ୍ରଲୋଭିତ କରିବା କାର୍ଯ୍ୟକୁ ମଧ୍ୟ ମଞ୍ଚ ନିନ୍ଦା କରିଛି।
ଭିଟା ମାଟି ଓ ଚାଷଜମି କୌଣସି ପରିସ୍ଥିତିରେ ସେମାନେ ଛାଡ଼ିବେ ନାହିଁ ବୋଲି ଦସ୍ତଖତ ସହ ଜିଲାପାଳ ଓ ତହସିଲଦାରଙ୍କୁ ପ୍ରତ୍ୟେକ ଗ୍ରାମରୁ ଦେବା ସତ୍ତ୍ୱେ ଲୋକଙ୍କୁ ଭୟଭୀତ କରାଇ ବଳପୂର୍ବକ ଜମି ଅଧିଗ୍ରହଣ କରିବା ପାଇଁ ଯେଉଁଭଳି ଭାବେ ପୋଲିସ ଓ ପ୍ରଶାସନର ବଳ ପ୍ରୟାଗ ଘଟଣା ଆରମ୍ଭ ହୋଇଛି। ଏହା ଭାଜପା ସରକାରଙ୍କ ଜନବିରୋଧି କାର୍ଯ୍ୟ ବୋଲି ସମ୍ପାଦକ ଶ୍ରୀ ସର୍ଦ୍ଦାର ଅଭିହିତ କରିଛନ୍ତି। ସରକାର, ଜିଲା ପ୍ରଶାସନ ଓ ପୋଲିସ ପ୍ରଶାସନ ଏତାଦୃଶ କାର୍ଯ୍ୟରୁ ନିବୃତ ନ ରହିଲେ ଆଗାମୀ ଦିନରେ ଅପ୍ରୀତିକର ପରିସ୍ଥିତି ପାଇଁ ସରକାର ଦାୟୀ ରହିବେ ବୋଲି ମଞ୍ଚ ତରଫରୁ ଚେତାବନୀ ଦିଆଯାଇଛି।
