ଧରାକୋଟ,୨୧ା୨(ବିଷ୍ଣୁ କେଶରୀ ଆଚାର୍ଯ୍ୟ): ଋଷିକୁଲ୍ୟା କ୍ରିୟାନୁଷ୍ଠାନ କମିଟି ପକ୍ଷରୁ ନଦୀ ସୁରକ୍ଷା ଅଭିଯାନ ଆରମ୍ଭ ହୋଇଛି। ଗଞ୍ଜାମ ଜିଲାର ସୋରଡା ବ୍ଲକ ଅଧୀନ ଗାଜଲବାଡ଼ି ପଞ୍ଚାୟତ ପିପଳପଙ୍କାରେ ୧୦୧୩ କୋଟି ଟଙ୍କା ବ୍ୟୟରେ ସରକାର ଏକ ବୃହତ ଡ୍ୟାମ୍ ନିର୍ମାଣ ଯୋଜନା କରୁଛନ୍ତି। ଏହା ନିର୍ମାଣ ହେଲେ ନିକଟସ୍ଥ ୨୩ଟି ଗାଁର ହଜାର ହଜାର ଏକର ଚାଷ ଜମି ଓ ଜଙ୍ଗଲ ପାଣିରେ ବୁଡ଼ି ନଷ୍ଟ ହୋଇଯିବ।
ଏହାର ପ୍ରତିକୂଳ ପ୍ରଭାବ ପରିବେଶ ପ୍ରତି ବିପଦ ସୃଷ୍ଟି କରିବ। କୃଷି, କୃଷକ, ଗୃହ ପାଳିତ ପଶୁଙ୍କ ଜୀବନ ଜୀବିକା ମଧ୍ୟ ନଷ୍ଟ ହୋଇଯିବ। ଅନ୍ୟପକ୍ଷରେ ନଦୀ ଶଯ୍ୟାରୁ ଅବାଧରେ ବାଲି ଚାଲାଣ ବୃଦ୍ଧି ପାଇବ। ଲୋକଙ୍କ ଜୀବନ ଜୀବିକା ନଷ୍ଟ ହେବା ସହ ପରିବେଶ ଉପରେ ପ୍ରଭାବ ପଡ଼ିବ।
ଏହା ବିରୋଧରେ ଲୋକଙ୍କୁ ସଚେତନ କରିବା ଉଦ୍ଦେଶ୍ୟରେ ଋଷିକୁଲ୍ୟା କ୍ରିୟାନୁଷ୍ଠାନ କମିଟି ପକ୍ଷରୁ ଗାଁଗାଁ ବୁଲି ଲୋକଙ୍କୁ ସଚେତନ ଅଭିଯାନ ଆରମ୍ଭ ହୋଇଛି। କମିଟି ପକ୍ଷରୁ ଶନିବାର ଧରାକୋଟରେ ଏକ ସଚେତନତା କାର୍ଯ୍ୟକ୍ରମ କରାଯାଇଥିଲା। ଏଥିରେ କମିଟି ସଭାପତି ଆଦିତ୍ୟ ନାରାୟଣ ରଥ, ସଦସ୍ୟ ସୀମାଞ୍ଚଳ ନାହାକ, ସୁଧୀର ରାଉତ ପ୍ରମୁଖ ଉପସ୍ଥିତ ରହି ସରକାର ଗୋପାଳପୁର ଓ ଛତ୍ରପୁର ନିକଟରେ ଅବସ୍ଥିତ ଟାଟା ଓ ଆଦାନୀ କମ୍ପାନୀକୁ ଋଷିକୁଲ୍ୟା ନଦୀର ପାଣି ବିକ୍ରି ପାଇଁ ମସୁଧା କରୁଥିବା ସହ ନଦୀର ଜୀବନ ବଞ୍ଚାଇବା ପାଇଁ ସମସ୍ତେ ଆଗଭର ହେବାକୁ ଆହ୍ବାନ ଦେଇଥିଲେ।
