ନୂଆଦିଲ୍ଲୀ,୩୦ା୯:ହାଇକୋର୍ଟ ବିଚାରପତିମାନଙ୍କ ପ୍ରଦର୍ଶନ ଆଧାରରେ ସେମାନଙ୍କୁ ସୁପ୍ରିମକୋର୍ଟକୁ ପଦୋନ୍ନତି ଦିଆଯିବ। ବିଚାରପତିମାନେ କେତେ ସଂଖ୍ୟକ ମାମଲାର ଫଇସଲା କିଭଳି ଭାବେ କରିଛନ୍ତି ତାହା ଦେଖାଯିବ। ସିଜେଆଇ ୟୁ.ୟୁ. ଲଳିତଙ୍କ ଅଧ୍ୟକ୍ଷତାରେ ବୁଧବାର ଅନୁଷ୍ଠିତ କଲେଜିୟମ୍ରେ ପ୍ରଥମ ଥର ପାଇଁ ଏଭଳି ନିଷ୍ପତ୍ତି ନିଆଯାଇଛି। କଲେଜିୟମ୍ରେ ବିଚାରପତିମାନଙ୍କ ଅତୀତର ଜୁଡିସିଆଲ ପରଫର୍ମାନ୍ସକୁ ଅନୁଧ୍ୟାନ କରାଯାଇ ସର୍ବୋଚ୍ଚ ଅଦାଲତକୁ ପ୍ରମୋଶନ ଲାଗି ସୁପାରିସ କରାଯାଇଛି। ଗତ ୨୬ରେ ଅନୁଷ୍ଠିତ ୫ ସଦସ୍ୟ ବିଶିଷ୍ଟ କଲେଜିୟମ୍ ଏହି ଆଧାରରେ ବମ୍ବେ ହାଇକୋର୍ଟ ମୁଖ୍ୟ ବିଚାରପତି ଜଷ୍ଟିସ୍ ଦୀପଙ୍କର ଦତ୍ତାଙ୍କୁ ସୁପ୍ରିମକୋର୍ଟ ବିଚାରପତି ରୂପେ ପଦୋନ୍ନତି ପାଇଁ ସୁପାରିସ କରିଥିବା ଜଣାପଡ଼ିଛି। ଅଗଷ୍ଟ ୨୭ରେ ଜଷ୍ଟିସ୍ ଲଳିତ ସିଜେଆଇ ରୂପେ ଦାୟିତ୍ୱ ଗ୍ରହଣ କରିବା ପରେ କଲେଜିୟମ୍ ପକ୍ଷରୁ ସୁପ୍ରିମକୋର୍ଟକୁ କୌଣସି ବିଚାରପତିଙ୍କୁ ପଦୋନ୍ନତି ଦେବାରେ ଏହା ହେଉଛି ପ୍ରଥମ। ସୁପ୍ରିମକୋର୍ଟରେ ୩୪ ବିଚାରପତିଙ୍କ ସ୍ଥାନରେ ସିଜେଆଇଙ୍କୁ ମିଶାଇ ୨୯ ଜଣ ଅଛନ୍ତି। ଜଷ୍ଟିସ ହେମନ୍ତ ଗୁପ୍ତା ଅକ୍ଟୋବର ୧୬ରେ ଅବସର ନେବାକୁ ଥିବାବେଳେ ସିଜେଆଇଙ୍କ କାର୍ଯ୍ୟକାଳ ନଭେମ୍ବର ୮ରେ ଶେଷ ହେବ।
