ବରଗଡ଼,୧୪।୨(ପ୍ରେମାନନ୍ଦ ଖମାରୀ):ରବି ଚାଷକାର୍ଯ୍ୟ ସମୟ ଗଡ଼ି ଚାଲିଛି। କିଛି ଚାଷୀ ତଳିପକା କାର୍ଯ୍ୟ ସାରିଥିବାବେଳେ ଆଉ କିଛି ବିଲରେ ଧାନପହ୍ଲା ରୋଇ ସାରିଛନ୍ତି। ମାତ୍ର ଜିଲାରେ ଏବେ ମଧ୍ୟ ଅନେକ ଚାଷୀ ଗତ ଖରିଫ ଧାନକୁ ଏପର୍ଯ୍ୟନ୍ତ ବିକ୍ରି କରି ପାରିନାହାନ୍ତି। ବିଭିନ୍ନ ମଣ୍ଡିରେ ଶହ ଶହ କୁଇଣ୍ଟାଲ ଧାନ ବିକ୍ରି ଅପେକ୍ଷାରେ ରହିଛି। କିଛି ଚାଷୀ ଟୋକନ ସମସ୍ୟା ଯୋଗୁ ସେମାନଙ୍କ ଅମଳ ଧାନ ମଣ୍ଡିକୁ ଆଣି ପାରୁନାହାନ୍ତି। ବରଗଡ଼ ଜିଲାରେ ଏଥର ଖରିଫ୍ ଧାନ କିଣାବିକାରେ ଜିଲାର ଚାଷୀମାନଙ୍କୁ ଏଭଳି ସମସ୍ୟାରେ ଛନ୍ଦି ହେବାକୁ ପଡ଼ିଛି ଏବଂ ଏହାକୁ ନେଇ ଅସନ୍ତୋଷ ଲାଗି ରହିଛି। ଏହି କ୍ରମରେ ଗତ ୧୦ତାରିଖରୁ ଜିଲାର ଅମ୍ବାଭୋନା ବ୍ଲକ ବାରପାହାଡ଼ କୃଷକ ସଙ୍ଗଠନ ଏବଂ ଲାଲ୍ ବାହାଦୁର ଶାସ୍ତ୍ରୀ କୃଷକ ସଙ୍ଗଠନ ନେତୃତ୍ୱରେ ଧାନବିକ୍ରିରୁ ବଞ୍ଚତ୍ତ ଚାଷୀମାନେ ଆନ୍ଦୋଳନକୁ ଓହ୍ଲାଇଥିଲେ। ସେମାନେ ସ୍ଥାନୀୟ ବିଡ଼ିଓଙ୍କ କାର୍ଯ୍ୟାଳୟ ଆଗରେ ଧାନଗଦା କରି ଧାନବିକ୍ରି ଅବ୍ୟବସ୍ଥାର ପ୍ରତିବାଦ କରିଥିଲେ। ଚାଷୀଙ୍କ ଅଭିଯୋଗ ଅନୁଯାୟୀ, ଅମ୍ବାଭୋନା ବ୍ଲକରେ ଏପର୍ଯ୍ୟନ୍ତ କେବଳ ୬୦ପ୍ରତିଶତ ଧାନ ବିକ୍ରି ହୋଇଛି। ଉକ୍ତ ବ୍ଲକର ବରା ମଣ୍ଡିରେ ସର୍ବାଧିକ ୧୧ହଜାର ପ୍ୟାକେଟ୍ ଧାନ ବିକ୍ରି ଅପେକ୍ଷାରେ ପଡ଼ି ରହିଛି। ଉକ୍ତ ବ୍ଲକରେ ପଞ୍ଜୀକରଣରୁ ବାଦ୍ ପଡ଼ିଥିବା ୧୪୪ଜଣ ଚାଷୀଙ୍କ ମଧ୍ୟରୁ କେବଳ ୩୦ଜଣଙ୍କ ଟୋକନ ଆସିଛି। ଆହୁରି ୧୧୪ଜଣ ଚାଷୀଙ୍କୁ ଏପର୍ଯ୍ୟନ୍ତ ଟୋକନ ମିଳିପାରିନାହିଁ।
ଏଭଳି ଅଭିଯୋଗ କରି ଚାଷୀମାନେ ବିଡ଼ିଓଙ୍କ କାର୍ଯ୍ୟାଳୟ ଆଗରେ ଧାନ ଗଦା କରି ଆନ୍ଦୋଳନକୁ ଓହ୍ଲାଇଥିବାବେଳେ ଆନ୍ଦୋଳନର ଶୁକ୍ରବାର ଚତୁର୍ଥ ଦିବସରେ ଅତିରିକ୍ତ ଯୋଗାଣ ଅଧିକାରୀ(ଏସିଏସ୍ଓ) ବ୍ୟୋମକେଶ ମାଝି, ସମବାୟ ଉପନିବନ୍ଧକ (ଡିଆର୍ସିଏସ୍) ଯୁଗଳ କିଶୋର ଦାଶ, ତହସିଲଦାର ରଘୁନାଥ ପାଣିଗ୍ରାହୀ ସେଠାକୁ ଯାଇ ଚାଷୀ ପ୍ରତିନିଧିଙ୍କ ସହିତ ଆଲୋଚନା କରିଥିଲେ। ଆନ୍ଦୋଳନସ୍ଥଳରେ ଗଦା ହୋଇଥିବା ପ୍ରାୟ ୭୦୦ ପ୍ୟାକେଟ୍ ଧାନକୁ ସମ୍ପୃକ୍ତ ଅଧିକାରୀମାନେ ନିଜ ହେପାଜତକୁ ନେଇ ନିୟନ୍ତ୍ରିତ ବଜାର କମିଟି ଅଧୀନରେ ରଖିଥିଲେ ଏବଂ ତାହା ଯେଭଳି ତ୍ୱରିତ ବିକ୍ରି ହୋଇପାରିବ ସେ ଦିଗରେ ପଦକ୍ଷେପ ନେବେ ବୋଲି ପ୍ରତିଶ୍ରୁତି ଦେଇଥିଲେ। ସେହିପରି ଉପରିସ୍ଥ ଅଧିକାରୀଙ୍କ ସହିତ ଆଲୋଚନା କରି ଟୋକନ ସମସ୍ୟାର ତୁରନ୍ତ ସମାଧାନ କରାଯିବ ଏବଂ ବିକ୍ରି ଅପେକ୍ଷାରେ ରହିଥିବା ଚାଷୀଙ୍କ ସମସ୍ତ ଧାନ କିଣାଯିବ ବୋଲି ନିର୍ଭର ପ୍ରତିଶ୍ରୁତି ଦେଇଥିଲେ। ଏହାପରେ ଆନ୍ଦୋଳନ ହଟିଥିଲା। ଆଲୋଚନା ସମୟରେ ସଂଯୁକ୍ତ କୃଷକ ସଙ୍ଗଠନର ଉପଦେଷ୍ଟା ରମେଶ ମହାପାତ୍ରଙ୍କ ସମେତ ବାରପାହାଡ଼ କୃଷକ ସଙ୍ଗଠନ ଏବଂ ଲାଲ ବାହାଦୁର କୃଷକ ସଙ୍ଗଠନର ପ୍ରତିନିଧିମାନେ ଉପସ୍ଥିତ ଥିଲେ। ତେବେ ବିଭାଗୀୟ ଅଧିକାରୀଙ୍କ ପ୍ରତିଶ୍ରୁତି ମୁତାବକ ଧାନ ଉଠାଣ କରା ନ ଗଲେ ଚାଷୀମାନେ ପୁଣି ଆନ୍ଦୋଳନକୁ ଓହ୍ଲାଇବେ ବୋଲି ଚେତାବନୀ ଦେଇଛନ୍ତି।
Dharitri – Odisha’s No.1 Odia Daily
