ଭୁବନେଶ୍ୱର, ୨୩।୯(ବନ୍ଦନା ସେଠୀ): ଭୁବନେଶ୍ୱର ମହାନଗର ନିଗମାଞ୍ଚଳରେ ଡେଙ୍ଗୁ ସଂକ୍ରମଣ ନିୟନ୍ତ୍ରଣକୁ ଆସୁନାହିଁ। ଗତ କିଛିବର୍ଷ ହେବ ଡେଙ୍ଗୁ ପାଇଁ ଭୁବନେଶ୍ୱର ହଟ୍ସ୍ପଟ୍ ପାଲଟିଥିବାବେଳେ ଚଳିତ ବର୍ଷ ମଧ୍ୟ ସମାନ ଅବସ୍ଥା ଲାଗି ରହିଛି। ଆକ୍ରାନ୍ତଙ୍କ ସଂଖ୍ୟାରେ ରୋକ୍ ଲଗାଇ ପାରୁ ନ ଥିବା ବିଏମ୍ସି ଅଧିକାରୀ ପ୍ରକୃତ ସମସ୍ୟାର ସମାଧାନ ନ କରି ଘନଘନ ବୈଠକ କରି ସମୀକ୍ଷା ଏବଂ କ୍ଷେତ୍ର ପରିଦର୍ଶନରେ ବ୍ୟସ୍ତ ରହୁଛନ୍ତି। ସେପ୍ଟେମ୍ବର ସୁଦ୍ଧା ସହରରେ ଡେଙ୍ଗୁ ସଂକ୍ରମଣ ୩ହଜାର ପାର୍ କରିଥିବାବେଳେ ଶୁକ୍ରବାର ବିଏମ୍ସି ମୁଖ୍ୟାଳୟରେ କମିଶନର ବିଜୟ ଅମୃତା କୁଲାଙ୍ଗେଙ୍କ ଅଧ୍ୟକ୍ଷତାରେ ଡେଙ୍ଗୁ ନିୟନ୍ତ୍ରଣ ସମୀକ୍ଷା ବୈଠକ ଅନୁଷ୍ଠିତ ହୋଇଥିଲା। ଏଥିରେ କେଉଁ ଡାକ୍ତର କେତେ ଘର, ବିଦ୍ୟାଳୟ ଏବଂ ଅଞ୍ଚଳ ବୁଲି ଲୋକଙ୍କୁ ସଚେତନ କରିଛନ୍ତି ସେ ନେଇ ସମୀକ୍ଷା କରାଯାଇଥିଲା। ଡାକ୍ତର, ୱାର୍ଡ ଅଫିସର, ସାନିଟାରୀ ଇନ୍ସପେକ୍ଟର ପ୍ରମୁଖ କେତେ ଅଞ୍ଚଳ ବୁଲିଲେ ସେବୁର ଦୈନିକ ରିପୋର୍ଟ ଦେବାକୁ କମିଶନର ନିର୍ଦ୍ଦେଶ ଦେଇଥିଲେ। ଏଥିସହ ବିଦ୍ୟାଳୟଗୁଡିକରେ ଛାତ୍ରୀଛାତ୍ରଙ୍କୁ ଡେଙ୍ଗୁ ସମ୍ପର୍କରେ ସଚେତନ କରାଇବା, ସମସ୍ତ ୱାର୍ଡରେ ରବିବାର ଡ୍ରାଏ ଡେ’ ପାଳନ କରିବା ଉପରେ ଗୁରୁତ୍ୱାରୋପ କରାଯାଇଥିଲା। ସମ୍ପୃକ୍ତ ୱାର୍ଡର କର୍ପୋରେଟରଙ୍କ ନେତୃତ୍ୱରେ ଡ୍ରାଏ ଡେ’, ବର୍ଜ୍ୟ ପୃଥକୀକରଣ ଏବଂ ଡେଙ୍ଗୁ ସଚେତନତା ପଦଯାତ୍ରା କାର୍ଯ୍ୟକ୍ରମକୁ ଜୋର୍ଦାର କରିବାକୁ ସମସ୍ତ ଜୋନାଲ ଡେପୁଟି କମିଶନର, ୱାର୍ଡ ଅଫିସର ଓ ଏସ୍ଆଇଙ୍କୁ ନିର୍ଦ୍ଦେଶ ଦିଆଯାଇଛି। ସେହିପରି ଦୈନିକ କେଉଁ ସ୍ଥାନରେ ମଶା ଧୂଆଁ ଦିଆଯାଉଛି ଓ ମଶା ତେଲ ସିଞ୍ଚନ କରାଯାଉଛି, ବୁଶ୍ କଟିଂ, ବର୍ଜ୍ୟ ଉଠାଇବା ଠିକ ଭାବେ ହେଉଛି କି ନାହିଁ ୱାର୍ଡ ଅଫିସରମାନେ କ୍ଷେତ୍ର ପରିଦର୍ଶନ କରି ରିପୋର୍ଟ ଦେବେ। ଏଣିକି ସହରର ପ୍ରତ୍ୟେକ ୱାର୍ଡରେ ଥିବା ଗଛ, ଖୁଣ୍ଟ ବା ପୋଲ୍ ତଳେ ଅଳିଆ କିମ୍ବା ବୁଦା ରହିବ ନାହିଁ। ଏହାର ନିରୀକ୍ଷଣ ପାଇଁ ଓ୍ବାର୍ଡ ଅଫିସର ଓ ଏସ୍ଆଇମାନେ ସକାଳ ସନ୍ଧ୍ୟାରେ କ୍ଷେତ୍ର ପରିଦର୍ଶନ କରି ସମ୍ପୃକ୍ତ ସ୍ଥାନର ପୂର୍ବ ଏବଂ ପର ଅବସ୍ଥାର ଫଟୋଚିତ୍ର ସଫା ଭୁବନେଶ୍ୱର ଆପ୍ରେ ଅପଲୋଡ୍ କରିବେ। ସେହିପରି ପ୍ରତ୍ୟେକ କର୍ମଚାରୀ ନିଜ ୱାର୍ଡକୁ ଡେଙ୍ଗୁ ଫ୍ରି ୱାର୍ଡ କରିବାକୁ ଉଦ୍ୟମ କରିବାକୁ କମିଶନର ନିର୍ଦ୍ଦେଶ ଦେଇଥିଲେ। ବୈଠକରେ ଅତିରିକ୍ତ କମିଶନର ଶୁଭେନ୍ଦୁ କୁମାର ସାହୁ, ଏଡିୟୁ ପିଏଚଓ ଇନଚାର୍ଜ ଡା. ସୁମନ ସୁନ୍ଦରାୟ,ଚିଫ ମୁନି୍ୟସିପାଲ୍ ମେଡିକାଲ ଅଫିସର୍ ଡା. ସତ୍ୟବ୍ରତ ଛୋଟରାୟ, ନଗର ସ୍ବାସ୍ଥ୍ୟ ଅଧିକାରୀ ଡା. ଦୀପକ ବିଶୋଇ, ଜୋନାଲ ଡେପୁଟି କମିଶନର, ସମସ୍ତ ୱାର୍ଡ ଅଫିସର ପ୍ରମୁଖ ଉପସ୍ଥିତ ଥିଲେ।
