କଟକ,୧୪ା୧(କାର୍ତ୍ତିକ ସାହୁ)ଓଡ଼ିଆ ସଂସ୍କୃତିର ମହାନ୍ ପର୍ବ ମକର ସଂକ୍ରାନ୍ତିରେ ଗୁଡ଼ି ଉଡ଼ାଇବାର ପରମ୍ପରା ରହିଆସିଛି। ଏହି ଉପଲକ୍ଷେ ବଜାରରେ ବିକ୍ରି ହେଉଥିବା ରଙ୍ଗବେରଙ୍ଗର ଗୁଡ଼ି ଯୁବବର୍ଗଙ୍କୁ ଆକୃଷ୍ଟ କରୁଛି। କାହା ଗୁଡ଼ି କେତେ ଉଚ୍ଚକୁ ଯିବ ତାହାକୁ ନେଇ ପ୍ରତିଦ୍ୱନ୍ଦ୍ୱିତା। ଗୁଡ଼ି ଉଡ଼ାଇବାବେଳେ ଅନ୍ୟ ଜଣଙ୍କର ଗୁଡ଼ିକୁ ଯଦି କାଟି ଦିଆଯାଇପାରେ ତା’ହେଲେ ସିଏ ନେବ ଜିତାପଟ। ଏହି ପ୍ରତିଦ୍ୱନ୍ଦ୍ୱିତାରେ ମୁଖ୍ୟ କାର୍ପଟଦାର ହେଲା ଗୁଡ଼ି ଉଡ଼ାରେ ବ୍ୟବହୃତ ମାଞ୍ଜାସୂତା। ପ୍ରତିବର୍ଷ ମାଞ୍ଜାସୂତା ଲାଗି ଲୋକଙ୍କ ବେକ ଓ ଅନ୍ୟାନ୍ୟ ଅଙ୍ଗ କଟି ଯାଉଥିବାବେଳେ ପ୍ରାଣହାନିର ଆଶଙ୍କା ରହିଛି। ତେବେ ଦିନକ ପରେ ରାଜ୍ୟରେ ମକର ପର୍ବ ପାଳନ କରାଯିବ। କଟକ ସହରରେ କମିଶନରେଟ ପୋଲିସକୁ ଅଡୁଆ କଲାଣି ମାଞ୍ଜାସୂତା। ଗତ ଗୁରୁବାର ମାଞ୍ଜାସୂତା ଲାଗି ଦୁଇଜଣ ବାଇକ ଆରୋହୀ ଆହତ ହୋଇଛନ୍ତି। ଏହାପରେ କମିଶନରେଟ ପୋଲିସ ପଦକ୍ଷେପ ନେବା ଆରମ୍ଭ କରିଛି। ମାଞ୍ଜାସୂତା ଗୋଦାମରେ ଚଢ଼ାଉ କରାଯିବା ସହ ଡାକବାଜି ଯନ୍ତ୍ରରେ ସତର୍କ କରାଯାଉଛି। ଚଢ଼ାଉ ସତ୍ତ୍ୱେ ମାଞ୍ଜାସୂତା ଜବତ କରାଯାଇପାରୁ ନାହିଁ। ଫଳରେ ପୋଲିସ ଏବେ ଅଧିକ ତତ୍ପରତା ଦେଖାଇଛି। ସୂଚନା ଅନୁସାରେ, ପ୍ରତିବର୍ଷ ମାଞ୍ଜାସୂତାଜନିତ ଅଘଟଣ ଘଟୁଥିଲେ ମଧ୍ୟ ଲୋକେ ସଚେତନ ହେଉନାହାନ୍ତି। ଫଳରେ ନିରୀହ ଲୋକଙ୍କ ଜୀବନ ସଙ୍କଟରେ ପଡୁଛି। ଏଥର ବି ଅନୁରୂପ ଘଟଣା ଘଟିସାରିଲାଣି। ମାଞ୍ଜାସୂତା ଲାଗି ମର୍କତନଗର ସେକ୍ଟର-୧୦ ଅଞ୍ଚଳର ପ୍ରମୋଦ ସାମନ୍ତରାୟ ଓ ବିରିବାଟୀ ଅଞ୍ଚଳର ଭୋଳାଶଙ୍କର ପରିଡ଼ାଙ୍କ ଗଳା କଟି ଯାଇଥିଲା। ବାରମ୍ବାର ଏଭଳି ଘଟଣା ଘଟୁଥିବାରୁ ରାସ୍ତାରେ ଯାତାୟାତ କରୁଥିବା ଲୋକଙ୍କ ମନରେ ଭୟ ସୃଷ୍ଟି ହୋଇଛି। ପୋଲିସ ବିଭିନ୍ନ ଅଞ୍ଚଳରେ ଚଢ଼ାଉ କରୁଥିଲେ ମଧ୍ୟ ଆଖିଦୃଶିଆ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇପାରୁ ନାହିଁ। ଗତ ୨ ଦିନ ଧରି ପୋଲିସ ବିଭିନ୍ନ ସ୍ଥାନରେ ଚଢ଼ାଉ କରିଛି। ପୁରୀଘାଟ ଥାନା ପୋଲିସ ନନ୍ଦିସାହି, କେଉଟ ସାହି, ଚୌଧୁରୀ ବଜାର, ମଠସାହି ଅଞ୍ଚଳରେ ଥିବା ପ୍ରାୟ ୯ଟି ମାଞ୍ଜାସୂତା ଗୋଦାମରେ ଚଢ଼ାଉ କରିଥିଲା। କିନ୍ତୁ କୌଣସି ଗୋଦାମରୁ ମାଞ୍ଜାସୂତା ମିଳି ନ ଥିଲା। କେବଳ ଗୁଡି ଥିବା ଦେଖିବାକୁ ମିଳିଥିଲା। ଲାଲବାଗ ଥାନା ପୋଲିସ ନୟାସଡ଼କ ଅଞ୍ଚଳର କେତେକ ଗୋଦାମରେ ଚଢ଼ାଉ କରିଥିଲା। ବିଡ଼ାନାସୀ ଥାନା ପୋଲିସ କନିକା ଛକ, ସେଲ୍ଟର ଛକ, ତୁଳସୀପୁର ପଞ୍ଚମୁଖୀ ହନୁମାନ ଛକ, ବିଡ଼ାନାସୀ ବନ୍ଧ ଛକ ଅଞ୍ଚଳରେ ଥିବା ମାଞ୍ଜାସୂତା ଦୋକାନରେ ଚଢ଼ାଉ କରିଥିଲା। ସେଠାରେ ବି କୌଣସି ସୂତା ମିଳି ନ ଥିଲା। ଜଗତପୁର, ଚୌଦ୍ୱାର, କଟକ ସଦର ଥାନା ଅଞ୍ଚଳର କେତୋଟି ଖୁଚୁରା ଦୋକାନରେ ଚଢ଼ାଉବେଳେ କିଛି ମାଞ୍ଜାସୂତା ଜବତ କରାଯାଇଛି। ପୋଲିସ ଚଢ଼ାଉ ସୂଚନା ପାଇ ଗୋଦାମ ମାଲିକମାନେ ଆଗୁଆ ମାଞ୍ଜାସୂତା ଗାଏବ କରିଦେଇଥିବା ସାଧାରଣରେ ଚର୍ଚ୍ଚା ହେଉଛି।
ଏନେଇ ଡିସିପି ପିନାକ ମିଶ୍ର କହିଛନ୍ତି, ମାଞ୍ଜାସୂତା ବିକ୍ରି ରୋକିବା ନିମନ୍ତେ କଟକ ସହରାଞ୍ଚଳର ସବୁ ଥାନା ଅଧିକାରୀଙ୍କୁ ନିଜ ଅଞ୍ଚଳରେ ଚଢ଼ାଉ ଜୋର୍ଦାର କରିବାକୁ ନିର୍ଦ୍ଦେଶ ଦିଆଯାଇଛି। ପୋଲିସ ପକ୍ଷରୁ ଡାକବାଜି ଯନ୍ତ୍ର ମାଧ୍ୟମରେ ଲୋକଙ୍କୁ ସତର୍କ କରାଯାଉଛି। ଜନଗହଳିପୂର୍ଣ୍ଣ ଅଞ୍ଚଳରେ ଗୁଡ଼ି ନ ଉଡ଼ାଇବା ଓ ମାଞ୍ଜାସୂତା ବ୍ୟବହାର ନ କରିବାକୁ ପରାମର୍ଶ ଦିଆଯାଇଛି। ଏପରିକି ନିୟମ ଖିଲାପକାରୀଙ୍କୁ ଗିରଫ କରାଯିବ ବୋଲି କଡ଼ା ଚେତାବନୀ ଦିଆଯାଇଛି। ଏଥିସହ ବିଭିନ୍ନ ଅଞ୍ଚଳରେ ଚଢ଼ାଉ କରାଯାଇ ମାଞ୍ଜାସୂତା ଜବତ କରାଯାଉଛି ବୋଲି ସେ କହିଛନ୍ତି।
