ନୂଆଦିଲ୍ଲୀ,୧୮।୧୦: ଉତ୍ତର ପ୍ରଦେଶରେ ଆସନ୍ତା ଫେବୃୟାରୀ-ମାର୍ଚ୍ଚ ଆଡ଼କୁ ବିଧାନସଭା ନିର୍ବାଚନ ହେବ। ଏଥିଲାଗି ତାରିଖ ଘୋଷଣାକୁ ଅନେକ ଦିନ ବାକି ଥିବାବେଳେ ସବୁ ରାଜନୈତିକ ଦଳ ପକ୍ଷରୁ ରଣନୀତି ପ୍ରସ୍ତୁତି ଚାଲିଛି। ଏହିକ୍ରମରେ ନିସ୍ତେଜ ଅବସ୍ଥାରେ ପଡ଼ିରହିଥିବା କଂଗ୍ରେସ ପାଇଁ ଲଖିମପୁର ଖେରି ହିଂସା ବ୍ରହ୍ମାସ୍ତ୍ର ଭାବେ ଉଭା ହୋଇଛି। କଂଗ୍ରେସ ସାଧାରଣ ସମ୍ପାଦିକା ପ୍ରିୟଙ୍କା ଗାନ୍ଧୀ ଭଦ୍ରା ହିଂସା ପ୍ରଭାବିତ ଅଞ୍ଚଳ ଗସ୍ତ କରି ଭାଜପାକୁ ଘେରିବା ପାଇଁ କେନ୍ଦ୍ରମନ୍ତ୍ରୀ ଅଜୟ ମିଶ୍ରାଙ୍କୁ ଟାର୍ଗେଟ କରିଥିଲେ। କାରଣ ଅଜୟଙ୍କ ପୁଅ ଆଶିଷ ମିଶ୍ରାଙ୍କ ଗାଡ଼ି ଧକ୍କାରେ ଆନ୍ଦୋଳନରତ ୪ କୃଷକଙ୍କ ଜୀବନ ଯାଇଥିଲା। ପ୍ରିୟଙ୍କା ହିଁ ଉତ୍ତର ପ୍ରଦେଶରେ କଂଗ୍ରେସର ପ୍ରଚାର ମଙ୍ଗ ଧରିବେ ବୋଲି ପ୍ରଚାର କମିଟିର ନବନିଯୁକ୍ତ ଅଧ୍ୟକ୍ଷ ପି.ଏଲ୍. ପୁନିଆ ସ୍ପଷ୍ଟ କରିଛନ୍ତି।
ଉତ୍ତର ପ୍ରଦେଶ ନିର୍ବାଚନ ପୂର୍ବରୁ ଏଆଇସିସି ପକ୍ଷରୁ ରାଜ୍ୟରେ ପ୍ରଚାର କମିଟି ଗଠନ କରାଯାଇଛି। ଏହି ଅବସରରେ ଦଳର ବରିଷ୍ଠ ନେତା ପି.ଏଲ୍. ପୁନିଆ କହିଛନ୍ତି, ବର୍ତ୍ତମାନ ୟୁପିରେ ପ୍ରିୟଙ୍କାଙ୍କ ଲୋକପ୍ରିୟତା ବଢ଼ିବାରେ ଲାଗିଛି। ନିର୍ବାଚନ ପୂର୍ବରୁ କଂଗ୍ରେସ ପ୍ରାୟତଃ ନିଜର ମୁଖ୍ୟମନ୍ତ୍ରୀ ପ୍ରାର୍ଥୀଙ୍କ ନାମ ଘୋଷଣା କରି ନ ଥାଏ। ୟୁପି ପାଇଁ ମଧ୍ୟ ଆମେ ଘୋଷଣା କରିନାହୁଁ। କାରଣ ଆମ ପାଖରେ ପ୍ରିୟଙ୍କା ଗାନ୍ଧୀ ଭଦ୍ରାଙ୍କ ଭଳି ଲୋକପ୍ରିୟ ଚେହେରା ଅଛନ୍ତି, ଯିଏକି ଭାଜପାକୁ ଟକ୍କର ଦେବା ପାଇଁ ସକ୍ଷମ। ସେ ଲୋକଙ୍କ ପାଇଁ ଲଢ଼େଇ କରୁଛନ୍ତି। ଲଖିମପୁର ଖେରି ହିଂସାରେ ସତ କିପରି ପଦାକୁ ଆସିବ ସେଥିଲାଗି ପ୍ରିୟଙ୍କା ସଂଗ୍ରାମ ଜାରି ରଖିଛନ୍ତି। ସେ ମୃତକଙ୍କ ପରିବାରକୁ ନ୍ୟାୟ ଦେବା ପାଇଁ ସୀତାପୁର ଗେଷ୍ଟହାଉସରେ ଅଟକ ରହିଥିଲେ। ତାଙ୍କ ଲଢ଼େଇ ସଫଳ ହୋଇଛି ବୋଲି ପୁନିଆ କହିଛନ୍ତି।
ଯୋଗୀ ନୁହେଁ, ଯୋଗ୍ୟ ସରକାର ଲୋଡ଼ା
ୟୁପି ବିଧାନସଭା ନିର୍ବାଚନକୁ କେଇମାସ ବାକିଥିବାବେଳେ ଯୋଗୀ ସରକାରଙ୍କ ହାତରୁ କ୍ଷମତା ଛଡ଼ାଇବା ପାଇଁ ଏସ୍ପି ଅଧ୍ୟକ୍ଷ ଅଖିଳେଶ ଯାଦବ ଅଣ୍ଟା ଭିଡ଼ିଛନ୍ତି। ଲକ୍ଷ୍ନୌର ଦଳୀୟ ମୁଖ୍ୟାଳୟରେ ରବିବାର ସେ କହିଛନ୍ତି, ରାଜ୍ୟକୁ ଯୋଗୀ ନୁହେଁ, ବରଂ ଯୋଗ୍ୟ ସରକାର ଲୋଡ଼ା। ନାମ ବଦଳାଇବା ବ୍ୟତୀତ ଭାଜପାର ଅନ୍ୟ କୌଣସି କାମ ନାହିଁ।
ଦଙ୍ଗା ଉସୁକାଉଥିଲେ ପୂର୍ବ ସରକାର
ୟୁପିରେ କ୍ଷମତାସୀନ ପୂର୍ବ ସରକାରଗୁଡ଼ିକ କେବଳ ନିଜ ସ୍ବାର୍ଥ ପାଇଁ କାର୍ଯ୍ୟ କରୁଥିଲେ। ଏଥିଯୋଗୁ ରାଜ୍ୟ ପଛରେ ପଡ଼ି ଯାଇଥିଲା ବୋଲି ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଏସ୍ପି ଏବଂ ବିଏସ୍ପିକୁ ଟାର୍ଗେଟ କରିଛନ୍ତି। ସେ କହିଛନ୍ତି, କ୍ଷମତାରେ ଥିବାବେଳେ ସମାଜ ଓ ରାଷ୍ଟ୍ର ପାଇଁ ଏହି ଦୁଇ ଦଳର ଚିନ୍ତା ନ ଥିଲା।
