ନୂଆଦିଲ୍ଲୀ,୧୫।୧୨: ବିହାର ବିଧାନସଭା ନିର୍ବାଚନରେ କଂଗ୍ରେସ ଏବଂ ନିର୍ବାଚନ ରଣନୀତିଜ୍ଞ ପ୍ରଶାନ୍ତ କିଶୋରଙ୍କ ନୂଆ ଦଳ ‘ଜନ ସୁରାଜ’ର ଶୋଚନୀୟ ପରାଜୟ ପରେ ଏବେ ଏକ ବଡ଼ ରାଜନୈତିକ ଖବର ସାମ୍ନାକୁ ଆସିଛି। ସୂତ୍ରରୁ ମିଳିଥିବା ଖବର ଅନୁସାରେ, ଗତ ସପ୍ତାହରେ କଂଗ୍ରେସ ଏମପି ପ୍ରିୟଙ୍କା ଗାନ୍ଧୀ ଭଦ୍ରା ଦିଲ୍ଲୀରେ ସୋନିଆ ଗାନ୍ଧୀଙ୍କ ବାସଭବନରେ ପ୍ରଶାନ୍ତ କିଶୋର (ପିକେ)ଙ୍କୁ ଭେଟି ଦୀର୍ଘ ସମୟ ଧରି ଆଲୋଚନା କରିଛନ୍ତି।
ବିହାର ନିର୍ବାଚନରେ କଂଗ୍ରେସ ୬୧ଟି ଆସନରୁ ମାତ୍ର ୬ଟି ଜିତିଥିବା ବେଳେ ପ୍ରଶାନ୍ତ କିଶୋରଙ୍କ ‘ଜନ ସୁରାଜ’ ୨୩୮ଟି ଆସନରେ ଲଢ଼ି ଗୋଟିଏ ବି ସିଟ୍ ଜିତି ପାରିନଥିଲା। ଉଭୟଙ୍କ ଏହି ଖରାପ ପ୍ରଦର୍ଶନ ପରେ ଭେଟଘାଟ କରିବା ଏବେ କଂଗ୍ରେସ ଓ ପ୍ରଶାନ୍ତ କିଶୋରଙ୍କ ମଧ୍ୟରେ ପୁଣି ସମ୍ପର୍କ ଯୋଡ଼ି ହେବାର ସମ୍ଭାବନାକୁ ନେଇ ଚର୍ଚ୍ଚା ସୃଷ୍ଟି କରିଛି। କାରଣ କଂଗ୍ରେସ ନିର୍ବାଚନରେ ବିଜେପିକୁ ଚ୍ୟାଲେଞ୍ଜ ଦେବାରେ ଅସମର୍ଥ ହେଉଥିବା ବେଳେ ପିକେଙ୍କର ବିଜୟ ଦେବାର ରେକର୍ଡ ରହିଛି।
ଏହି ଭେଟଘାଟ ବିଷୟରେ ପଚରାଯିବାରୁ ପ୍ରିୟଙ୍କା ଗାନ୍ଧୀ କହିଛନ୍ତି, “ମୁଁ କାହାକୁ ଭେଟୁଛି କିମ୍ବା କାହାକୁ ନାହିଁ, ସେଥିରେ କାହାର ଆଗ୍ରହ ନାହିଁ।” ଅନ୍ୟପକ୍ଷରେ ପ୍ରଶାନ୍ତ କିଶୋର (ପିକେ) ଏହି ସାକ୍ଷାତକୁ ସମ୍ପୂର୍ଣ୍ଣ ରୂପେ ଅସ୍ୱୀକାର କରିଛନ୍ତି।
୨୦୨୨ ଏପ୍ରିଲରେ ପିକେ କଂଗ୍ରେସରେ ଯୋଗ ଦେବା ନେଇ ସୋନିଆ, ପ୍ରିୟଙ୍କା ଓ ରାହୁଲ ଗାନ୍ଧୀଙ୍କ ସହ ଆଲୋଚନା କରିଥିଲେ। ପ୍ରିୟଙ୍କା ତାଙ୍କୁ ସ୍ୱାଧୀନତା ଦେବା ସପକ୍ଷରେ ଥିଲେ ମଧ୍ୟ କଂଗ୍ରେସର ବରିଷ୍ଠ ନେତା ଏବଂ ରାହୁଲ ଗାନ୍ଧୀ ତାଙ୍କ ସର୍ତ୍ତରେ ରାଜି ହୋଇନଥିଲେ। ଏହାପରେ ପିକେ ଏହି ପ୍ରସ୍ତାବକୁ ପ୍ରତ୍ୟାଖ୍ୟାନ କରିଥିଲେ।
ସୂତ୍ର ଅନୁଯାୟୀ, ଉଭୟ ପକ୍ଷ ବିହାରରେ ଖରାପ ପ୍ରଦର୍ଶନ କରିବା ପରେ ୨୦୨୬ରେ ତାମିଲନାଡୁ, ବଙ୍ଗଳା ଏବଂ ଆସାମ ଏବଂ ୨୦୨୭ ୟୁପି ନିର୍ବାଚନ ପାଇଁ ପୁଣିଥରେ ସମ୍ପର୍କକୁ ଦେଖିବାକୁ ଚାହୁଁଛନ୍ତି। ୨୦୨୯ ଲୋକସଭା ନିର୍ବାଚନ ପୂର୍ବରୁ ଏହି ଭେଟଘାଟକୁ ଗୁରୁତ୍ୱପୂର୍ଣ୍ଣ ମନେ କରାଯାଉଛି।
