କଟକ ଅଫିସ,୭।୧୨: ଫି ଛାଡ଼ ପ୍ରସଙ୍ଗରେ ସୋମବାର ହାଇକୋର୍ଟରେ ଘରୋଇ ସ୍କୁଲ ସଂଘ ତରଫରୁ ଜବାବୀ ସତ୍ୟପାଠ ଦାଖଲ କରାଯାଇଛି । ଏହି ସତ୍ୟପାଠରେ ଦର୍ଶାଯାଇଛି ଯେ, ୨୩।୦୯।୧୯୯୬ରେ ସରକାର ଓ ଘରୋଇ ସ୍କୁଲ ସଂଘକୁ ନେଇ ଏକ ରିଜୋଲୁଶନ ଅଣାଯାଇଥିଲା । ଉକ୍ତ ରିଜୋଲୁଶନର ସେକ୍ଶନ୪(ଆଇ)ରେ ସ୍ପଷ୍ଟ ଭାବେ ଘରୋଇ ସ୍କୁଲ ଉପରେ ସରକାରଙ୍କ ନିୟନ୍ତ୍ରଣ ଥିବା ବିଷୟ ଉଲେଖ ରହିଛି । ଘରୋଇ ସ୍କୁଲଗୁଡ଼ିକ ଫି ବଢ଼ାଇବା କିମ୍ବା କମାଇବା ନିଷ୍ପତ୍ତି ସମ୍ପର୍କରେ ରାଜ୍ୟ ସରକାରଙ୍କ ପରାମର୍ଶ ନେବା ଜରୁରୀ ବୋଲି ଉଲ୍ଲେଖ ରହିଛି।
ସେହିପରି ସେକ୍ଶନ ୯ରେ ଉଲ୍ଲେଖ ରହିଛି ଯେ, ଘରୋଇ ସ୍କୁଲ କର୍ତ୍ତୃପକ୍ଷ ସରକାରଙ୍କ ଫି ସମ୍ବନ୍ଧୀୟ ନିଷ୍ପତ୍ତିକୁ ମାନିବା ଉଚିତ୍ । ଯଦି କୌଣସି ସ୍କୁଲ କର୍ତ୍ତୃପକ୍ଷ ଏହାକୁ ଉଲ୍ଲଂଘନ କରନ୍ତି, ତେବେ ଉକ୍ତ ସ୍କୁଲର ସ୍ବୀକୃତି ପ୍ରମାଣପତ୍ର(ସିଓଆର)ପ୍ରତ୍ୟାହାର କରାଯିବ । ଏସବୁ ତଥ୍ୟ ଥାଇ ବି ଯଦି ସରକାର ନିୟନ୍ତ୍ରଣ ନଥିବା ବିଷୟ କହୁଛନ୍ତି, ତେବେ ନିୟନ୍ତ୍ରଣ ଆଣିବା ପାଇଁ ବ୍ୟବସ୍ଥା କରନ୍ତୁ ବୋଲି ହାଇକୋର୍ଟରେ ବେସରକାରୀ ସ୍କୁଲ ସଂଘ ଓକିଲ ବିଭୂତି ଭୂଷଣ ଚୌଧିରୀ ପ୍ରାର୍ଥନା କରିଥିଲେ।
ଅନ୍ୟପକ୍ଷେ ଫି ଛାଡ଼ ନେଇ ଷ୍ଟେକହୋଲଡରମାନଙ୍କ ଦ୍ୱାରା ହୋଇଥିବା ଏମ୍ଓୟୁରେ ୫ ରୁ ୩୦ ପ୍ରତିଶତ ପର୍ଯ୍ୟନ୍ତ ଉଲ୍ଲେଖ ରହିଛି । ଅଦାଲତ ଚାହିଁଁଲେ ବିଚାରକୁ ନେଇ ପାରିବେ ବୋଲି ସତ୍ୟପାଠରେ ଦର୍ଶାଯାଇଥିଲା ।
ସରକାରଙ୍କ ତରଫରୁ ଆଡ୍ଭୋକେଟ ଜେନେରାଲ କହିଥିଲେ ଯେ, ଅନ୍ୟ ରାଜ୍ୟ ଅପେକ୍ଷା ଓଡ଼ିଶା ହାଇକୋର୍ଟ ମାମଲାକୁ ଅଧିକ ଗୁରୁତ୍ୱ ଦେଉଛନ୍ତି । ତେଣୁ ଖୁବ୍ଶୀଘ୍ର ଆମକୁ ଏହାର ନିଷ୍କର୍ଷ ମିଳିବ । ମୁଖ୍ୟ ବିଚାରପତି ଜଷ୍ଟିସ ମହମ୍ମଦ ରଫିକ୍ ଓ ଜଷ୍ଟିସ ବିଶ୍ୱନାଥ ରଥଙ୍କୁ ନେଇ ଗଠିତ ଖଣ୍ଡପୀଠ ମାମଲାର ଶୁଣାଣି କରିଥିଲେ । ଉଭୟ ପକ୍ଷର ଅଭିଯୋଗ ଶୁଣିବା ପରେ ଅଦାଲତ ମାମଲାର ପରବର୍ତ୍ତୀ ଶୁଣାଣି ଆଗାମୀ ୧୦ ତାରିଖରେ କରାଯିବା ପାଇଁ ନିଷ୍ପତ୍ତି ନେଇଥିଲେ ।
