ନୂଆଦିଲ୍ଲୀ,୨୭।୨ : ଉତ୍ତରପ୍ରଦେଶର ଜେଲରେ ରହୁଥିବା କଏଦୀମାନଙ୍କ ପାଇଁ ଖୁସି ଖବର ଆସିଛି। ଯେଉଁମାନେ ୧୪ ବର୍ଷ କାରାଦଣ୍ଡ ପୂରଣ କରିଛନ୍ତି କିମ୍ବା ଯେଉଁମାନଙ୍କର ବୟସ ୬୦ ବର୍ଷ କିମ୍ବା ତା’ଠାରୁ ଅଧିକ ସେମାନଙ୍କୁ ମୁକୁଳାଇବା ଲାଗି ସୁପ୍ରିମ୍କୋର୍ଟଙ୍କ ପକ୍ଷରୁ ନିର୍ଦ୍ଦେଶ ଜାରି ହୋଇଛି। ଜେଲରେ ଥିବା କଏଦୀଙ୍କ ସଂଖ୍ୟା ବଢୁଥିବାରୁ ଏବଂ ସେମାନଙ୍କ ବିଚାର ର ଶୁଣାଣି ହୋଇପାରୁ ନଥିବାକୁ ଦୃଷ୍ଟିରେ ରଖି ସୁପ୍ରିମକୋର୍ଟ ଉତ୍ତରପ୍ରଦେଶ ସରକାରଙ୍କୁ ସେମାନଙ୍କ ମୁକ୍ତି ଉପରେ ବିଚାର କରିବାକୁ ନିର୍ଦ୍ଦେଶ ଦେଇଛନ୍ତି।
ଉତ୍ତରପ୍ରଦେଶରେ ସାତ ହଜାରରୁ ଅଧିକ କଏଦୀ ଅଛନ୍ତି, ଯେଉଁମାନେ ଦଶ ବର୍ଷରୁ ଅଧିକ ସମୟ ଜେଲରେ ଅଛନ୍ତି। ଶୀର୍ଷକୋର୍ଟ କହିଛନ୍ତି ଯେ ସରକାର ଦଣ୍ଡ ବିରାମ ଧାରା ୪୩୩-ଏ ଅନ୍ତର୍ଗତ ଏକ କମିଟି ଗଠନ କରି ଏପରି ମାମଲାଗୁଡ଼ିକର ବିଚାର କରିବା ଉଚିତ। ନିକଟରେ ଏକ ମାମଲା ସୁପ୍ରିମକୋର୍ଟଙ୍କ ନଜରକୁ ଆସିଥିଲା ଯେଉଁଥିରେ ଆଇନଜୀବୀ ପ୍ରସ୍ତୁତ ହୋଇ ନ ଥିବାରୁ ହାଇକୋର୍ଟ ଜାମିନ ଶୁଣାଣିକୁ ମନା କରିଦେଇଥିଲେ। ଅଭିଯୁକ୍ତ ୧୭ ବର୍ଷ ଜେଲରେ ଥିବାରୁ କୋର୍ଟ ଏହାର ଶୀଘ୍ର ସମାଧାନ କରିବାକୁ ଚାହୁଁଥିଲେ। କଏଦୀମାନଙ୍କ ଯତ୍ନର ଅଭାବ, ଦାରିଦ୍ରତା, ଆଇନଜୀବୀଙ୍କ ଅନୁପସ୍ଥିତି ଯୋଗୁଁ କୋର୍ଟ ଏହି ନିଷ୍ପତ୍ତି ନେଇଥିଲେ।
ଆହ୍ଲାବାଦ ହାଇକୋର୍ଟରେ ଅଢ଼େଇ ଲକ୍ଷରୁ ଅଧିକ ଅପରାଧିକ ଆବେଦନ ବିଚାରାଧୀନ ଅଛି। ଯଦି ଏହି ପାଇଲଟ ପ୍ରୋଜେକ୍ଟ ଉତ୍ତରପ୍ରଦେଶରେ ସଫଳ ହୁଏ, ତେବେ ଏହା ଅନ୍ୟ ରାଜ୍ୟରେ କାର୍ଯ୍ୟକାରୀ ହୋଇପାରିବ। ରାଜ୍ୟରେ ହାଇକୋର୍ଟରେ ବିଚାରପତିଙ୍କ ପ୍ରାଧିକୃତ କ୍ଷମତା ୧୬୦। କିନ୍ତୁ ସେଥିମଧରୁ ୬୭ଟି ପଦବୀ ଖାଲି ଅଛି।
ଏହି କମିଟି ଗଠନରେ, ଜେଲ ପ୍ରଶାସନର ଭୂମିକା ଗୁରୁତ୍ୱପୂର୍ଣ୍ଣ। କାରଣ ଜେଲର ଜାଣନ୍ତି କେଉଁ କଏଦୀ କେତେ ଦଣ୍ଡ ଭୋଗୁଛନ୍ତି ଏବଂ କେଉଁ କଏଦୀମାନେ ୬୦ ବର୍ଷ କିମ୍ବା ତା’ଠାରୁ ଅଧିକ ବୟସ୍କ । ଏହାକୁ ଦୃଷ୍ଟିରେ ରଖି ସୁପ୍ରିମକୋର୍ଟ ୧୪ ବର୍ଷ କାରାଦଣ୍ଡ ଭୋଗିଥିବା କଏଦୀମାନଙ୍କର ତାଲିକା ପ୍ରସ୍ତୁତ କରିବାକୁ ହାଇକୋର୍ଟଙ୍କୁ ନିର୍ଦ୍ଦେଶ ଦେଇଛନ୍ତି। ଶୀଘ୍ର ମୁକ୍ତି ପାଇଁ ତାଙ୍କ ମାମଲା ରାଜ୍ୟ କାରାଗାର ରିଲିଜ କମିଟିକୁ ପଠାଇବାକୁ ଶୀର୍ଷକୋର୍ଟ କହିଛନ୍ତି।
