ନୂଆଦିଲ୍ଲୀ,୨୨।୮: ଉତ୍ତରପ୍ରଦେଶର ଝାନ୍ସି ଜିଲାର କିଶୋରପୁରା ଗାଁରେ ଜଣେ ମହିଳାଙ୍କ ଖଣ୍ଡିତ ଶରୀର କୂଅରୁ ଉଦ୍ଧାର ହୋଇଛି। ପୋଲିସ ଏହି ହତ୍ୟା ମାମଲାରେ ପୂର୍ବତନ ଗାଁ ମୁଖିଆ ସଞ୍ଜୟ ପଟେଲ ଓ ତାଙ୍କ ଭାଇ ସନ୍ଦୀପ ପଟେଲଙ୍କୁ ଗିରଫ କରିଛି। ତୃତୀୟ ଅଭିଯୁକ୍ତ ପ୍ରଦୀପ ଅହିରୱାର ଫେରାର ଅଛନ୍ତି।
ଅଗଷ୍ଟ ୮ରେ ସଞ୍ଜୟ ଓ ତାଙ୍କ ସହଯୋଗୀମାନେ ପ୍ରେମିକା ରଚନା ୟାଦବଙ୍କୁ ଗଳା ଟିପି ହତ୍ୟା କରିଥିଲେ। ବିବାହ ପାଇଁ ରଚନାଙ୍କ ବାରମ୍ବାର ଚାପ ଯୋଗୁଁ ସଞ୍ଜୟ ଏହି ହତ୍ୟାକାଣ୍ଡ ଘଟାଇଥିବା ପୁଲିସ ଅନୁସନ୍ଧାନରୁ ଜଣାପଡ଼ିଛି। ଶରୀରକୁ ୭ ଖଣ୍ଡ କରି ବସ୍ତାରେ ଭର୍ତ୍ତି କରି କୂଅ ଓ ପୋଲ ନିକଟରେ ଫୋପାଡ଼ି ଦିଆଯାଇଥିଲା।
ଅଗଷ୍ଟ ୧୩ରେ ଜଣେ କୃଷକ କୂଅରୁ ଦୁର୍ଗନ୍ଧ ଆସୁଥିବା ଦେଖି ପୋଲିସକୁ ଖବର ଦେଇଥିଲେ। କୂଅରୁ ଦୁଇଟି ବସ୍ତାରେ ମହିଳାଙ୍କ ଶରୀରର ଅଂଶ ମିଳିଥିଲା। ଅଗଷ୍ଟ ୧୭ରେ ହାତ ଉଦ୍ଧାର ହୋଇଥିଲା, କିନ୍ତୁ ମୁଣ୍ଡ ଓ ଗୋଡ଼ ମିଳିନଥିଲା। ଗୁରୁବାର ଦିନ ଲଖେରୀ ନଦୀରୁ ମୁଣ୍ଡ ଉଦ୍ଧାର ହୋଇଛି।
ଝାନ୍ସି ଏସଏସପିଙ୍କ ନେତୃତ୍ୱରେ ୮ଟି ତଦନ୍ତ ଟିମ୍ ଗଠନ କରାଯାଇଥିଲା। ୧୦୦ରୁ ଅଧିକ ଗାଁଲୋକଙ୍କୁ ପଚରାଉଚରା ଓ ୨୦୦ରୁ ଅଧିକ ସିସିଟିଭି ଫୁଟେଜ ଯାଞ୍ଚ ପରେ ହଜାର ହଜାର ପୋଷ୍ଟର ବାଣ୍ଟି ମୃତାଙ୍କୁ ଟିକମଗଡ଼ର ବିଧବା ରଚନା ୟାଦବ ବୋଲି ଚିହ୍ନଟ କରାଯାଇଛି। ରଚନାଙ୍କ ଭାଇ ପୋଷ୍ଟର ଦେଖି ତାଙ୍କୁ ଚିହ୍ନିଥିଲେ।
ପୋଲିସ ଅନୁସାରେ, ରଚନା ଓ ସଞ୍ଜୟଙ୍କ ମଧ୍ୟରେ ଏକ ଆଇନଗତ ବିବାଦ ସମୟରେ ଘନିଷ୍ଠ ସମ୍ପର୍କ ଗଢ଼ି ଉଠିଥିଲା। ତଦନ୍ତ ଟିମ୍ ପାଇଁ ୫୦,୦୦୦ ଟଙ୍କା ଓ ଫେରାର ଅଭିଯୁକ୍ତ ପ୍ରଦୀପଙ୍କ ପାଇଁ ୨୫,୦୦୦ ଟଙ୍କାର ପୁରସ୍କାର ଘୋଷଣା କରାଯାଇଛି।
