ଭୁବନେଶ୍ୱର,୨୮।୧୧: ଓଡ଼ିଶା ଗସ୍ତରେ ଆସି ଆଜି ଦିଲ୍ଲୀ ଫେରିଛନ୍ତି ରାଷ୍ଟ୍ରପତି ଦ୍ରୌପଦୀ ମୁର୍ମୁ । ପ୍ରଥମ ଥର ଓଡ଼ିଶା ବିଧାନସଭାକୁ ସମ୍ବୋଧିତ କରିଥିଲେ ରାଷ୍ଟ୍ରପତି । ଇତିହାସରେ ପ୍ରଥମ ଥର ଦେଶର ରାଷ୍ଟ୍ରପତି, ଓଡ଼ିଶା ବିଧାନସଭା ଅଧିବେଶନକୁ ସମ୍ବୋଧିତ କରିଥିଲେ । କିଛି ସମୟ ପାଇଁ ରାଷ୍ଟ୍ରପତିଙ୍କ ଗହଣରେ ସମସ୍ତେ ଫଟୋ ଉଠାଇଥିଲେ । ରାଜ୍ୟପାଳ, ବାଚସ୍ପତି, ମୁଖ୍ୟମନ୍ତ୍ରୀ, ବିରୋଧ ଦଳ ନେତାଙ୍କ ସହିତ ରାଷ୍ଟ୍ରପତି କଥାବାର୍ତ୍ତା କରୁଥିବାର ଦେଖାଯାଇଥିଲା । ବିଧାନସଭା ପରିସରରେ ଏହି ମୁହୂର୍ତ୍ତ ସମସ୍ତ ସଦସ୍ୟଙ୍କ ପାଇଁ ଅତ୍ୟନ୍ତ ଗର୍ବ ଓ ଗୌରବ ଅନୁଭୂତି ଆଣି ଦେଇଥିଲା ।
ଦିନେ ସେହି ବିଧାନସଭାର ସଦସ୍ୟ ଥିଲେ । ଏବେ ରାଷ୍ଟ୍ରପତି ଭାବେ ବିଧାନସଭାର ପବିତ୍ର ଗୃହରେ ଦ୍ରୌପଦୀ ମୁର୍ମୁଙ୍କ ପାଦ ପଡିଥିଲା । ଏପରିକି ମନ୍ତ୍ରୀ ଥିବା ବେଳେ ସେ ଯେଉଁ ଚାମ୍ବରରେ ବସିଥିଲେ ସେଠାରେ ମଧ୍ୟ କିଛି ସମୟ ବିତାଇଥିଲେ ରାଷ୍ଟ୍ରପତି । ୨୦୦୦ରୁ୨୦୦୯ ପର୍ଯ୍ୟନ୍ତ ବିଧାୟକ ଥିଲେ ଦ୍ରୌପଦୀ ମୁର୍ମୁ । ମେଣ୍ଟ ସରକାରରେ ମନ୍ତ୍ରୀ ମଧ୍ୟ ଥିଲେ । ତେବେ ଆପଣ ଜାଣି ଆଶ୍ଚର୍ଯ୍ୟ ହେବେ ରାଷ୍ଟ୍ରପତି ଦ୍ରୌପଦୀ ମୁର୍ମୁ ମାତ୍ର ୪୨ ଖଣ୍ଡ ଭୋଟରେ ଜିତି ବିଧାୟକ ଭାବେ ନିର୍ବାଚିତ ହୋଇଥିଲେ ।
୨୦୦୪ ବିଧାନସଭା ନିର୍ବାଚନରେ ବିଜେପିରୁ ପ୍ରାର୍ଥୀ ହୋଇଥିବା ଦ୍ରୌପଦୀ ମୁର୍ମୁ ମୋଟ ୨୯,୨୯୫ ଖଣ୍ଡ ଭୋଟ ପାଇଥିଲେ । ଆଉ ତାଙ୍କୁ ଟକ୍କର ଦେଉଥିବା ଜେଏମ୍ଏମ୍ ପ୍ରାାର୍ଥୀ ରାମ ଚନ୍ଦ୍ର ମୁର୍ମୁ ୨୯,୨୫୩ ଖଣ୍ଡ ଭୋଟ ପାଇ ୨ୟ ସ୍ଥାନରେ ରହିଥିଲେ । ଉଭୟଙ୍କ ମଧ୍ୟରେ ଭୋଟ ବ୍ୟବଧାନ ଥିଲା ମାତ୍ର ୪୨ ଖଣ୍ଡ । ସେହି ୪୨ ଖଣ୍ଡ ଭୋଟ ହିଁ ଦ୍ରୌପଦୀ ମୁର୍ମୁଙ୍କୁ ବିଧାନସଭାକୁ ପଠାଇଥିଲା । ଆଉ ସେ ମନ୍ତ୍ରୀ ଭାବେ ମଧ୍ୟ ଦାୟିତ୍ବ ତୁଲାଇଥିଲେ । ଏବେ ସେ ଭାରତର ପ୍ରଥମ ନାଗରିକ ଅର୍ଥାତ ରାଷ୍ଟ୍ରପତି ପଦରେ ରହିଛନ୍ତି ।
