ନୟାଗଡ଼ ଅଫିସ,୨୫।୧: ନୟାଗଡ଼ ଜିଲା ଦଶପଲ୍ଲା ବ୍ଲକ ଭୋଗବାଡି ପଞ୍ଚାୟତ ପୁଟୁବାରୀ ଗାଁର ଦଳିତ ଲୋକେ ବିକଳ୍ପ ନ ଥିବାରୁ ଫ୍ଲୋରାଇଡ୍ ଯୁକ୍ତ ପାଣି ପିଇ ଦନ୍ତ ଓ ଅସ୍ଥି ଫ୍ଲୋରୋସିସ୍ ରୋଗରେ ଆକ୍ରାନ୍ତ ହେଉଛନ୍ତି। ଫ୍ଲୋରୋସିସ ରୋଗ ଯୋଗୁ ଅକାଳ ବାର୍ଦ୍ଧକ୍ୟ ମାଡି ଆସୁଛି। ସ୍ଥାନୀୟ ଲୋକଙ୍କର ସ୍ବାସ୍ଥ୍ୟାବସ୍ଥା ନେଇ ବିଭିନ୍ନ ସମୟରେ ବ୍ଲକ ଓ ଜିଲା ପ୍ରଶାସନକୁ ଅବଗତ କରାଯାଇଛି। ହେଲେ କେହି ସେମାନଙ୍କ ସମସ୍ୟାର ସମାଧାନ କରୁନାହାନ୍ତି।
୨୦ ପରିବାରର ୧୦୯ ଲୋକଙ୍କୁ ନେଇ ପୁଟୁବାରୀ ଗାଁ ଗଠିତ। ଏଠାକାର ବାସିନ୍ଦା ଦଳିତ ସମ୍ପ୍ରଦାୟର। କୁଲା, ବାଉଁଶିଆ, ଝୁଡି, ଡାଲା ଆଦି ବାଉଁଶ ଉପକରଣ ତିଆରି କରିବା ଏମାନଙ୍କର ବେଉସା। ନିକଟସ୍ଥ ଅଞ୍ଚଳରେ ବିକ୍ରି କରି ଏମାନେ ପରିବାର ପ୍ରତିପୋଷଣ କରିଥାନ୍ତି। ରାସ୍ତା ଓ ପାନୀୟ ଜଳ ସମସ୍ୟା ଗାଁରେ ଲାଗି ରହିଛି। ଗାଁରେ ପୂର୍ବରୁ ୨ଟି ନଳକୂପ ଥିଲା। ୨ ବର୍ଷ ତଳେ ଏକ ନନ୍ଦ କୂଅ ଖୋଳାଯାଇଛି। ନନ୍ଦକୂଅର ଜଳ ପାନୀୟ ଉପଯୋଗୀ ହୋଇଥିଲେ ହେଁ ଏହାସବୁ ଲୋକଙ୍କ ପାଇଁ ପର୍ଯ୍ୟାପ୍ତ ହେଉନାହିଁ। ଶୀତ ଋତୁରେ କୂଅ ଶୁଖିଲା ପଡୁଛି। ଗ୍ରୀଷ୍ମ ଋତୁରେ ନନ୍ଦ କୂଅ କାମରେ ଲାଗୁନି। ଅନ୍ୟପକ୍ଷେ ୨ ନଳକୂପର ଜଳ ଫ୍ଲୋରାଇଡ୍ ଯୁକ୍ତ। ଗାଁ ଲୋକଙ୍କର ଆଣ୍ଠୁ, ଗଣ୍ଠି, ପାଦ, ଗୋଇଠି ବିନ୍ଧା ହେବା ସହ ଛୋଟ ଛୋଟ ପିଲାଙ୍କ ଦାନ୍ତ କସରା ରଙ୍ଗ ପରେ ପାନୀୟ ଜଳକୁ ନେଇ ସନ୍ଦେହ ହୋଇଥିଲା। ପାନୀୟ ଜଳ ପରୀକ୍ଷଣ ପରେ ଏଥିରେ ଅଧିକ ଫ୍ଲୋରାଇଡ୍ ଥିବା ଜଣାପଡିଥିଲା। ଜଗନ୍ନାଥ ପରିଚ୍ଛାଙ୍କ ସୂଚନା ଅନୁସାରେ, ଆମ ଗାଁରେ ପୂର୍ବରୁ ନଳକୂପ ନ ଥିଲା। କୂଅରୁ ପାଣି ବ୍ୟବହାର କରୁଥିଲୁ। ହେଲେ କେହି ଫ୍ଲୋରୋସିସ ରୋଗରେ ଆକ୍ରାନ୍ତ ହୋଇ ନ ଥିଲେ। ଧୀରେ ଧୀରେ ଜଳସ୍ତର ହ୍ରାସ ଯୋଗୁ ପାନୀୟ ଜଳ ସଙ୍କଟ ଦେଖାଦେବାରୁ ନଳକୂପ ଉପରେ ନିର୍ଭର କଲୁ। କୂଅ ବ୍ୟବହାର ନ କରିବାରୁ କାଳକ୍ରମେ ପୋତି ହୋଇଗଲା। ଯଦିଓ ପାନୀୟ ଜଳରେ ଅସୁବିଧା ହୋଇ ନ ଥିଲା ତେବେ ଫ୍ଲୋରୋସିସ ରୋଗ ଆମ ପାଇଁ ଏବେ ଚିନ୍ତାର କାରଣ ପାଲଟିଛି। ସୁରେନ୍ଦ୍ର ମନ୍ତ୍ରୀ କୁହନ୍ତି, ପୂଜା ଗନ୍ତାୟତ(୯), ବାଦଲ ଗନ୍ତାୟତ(୧୦), ଆକାଶ ବେହେରା(୧୦), ଗୌତମ ମନ୍ତ୍ରୀ(୧୩), ଶକ୍ତି ମନ୍ତ୍ରୀ (୧୨) ପ୍ରମୁଖ ପିଲାଙ୍କ ଦାନ୍ତ ଫ୍ଲୋରୋସିସ ରୋଗରେ ଆକ୍ରାନ୍ତ। ସରକାର ଯଦି ଗାଁ ପାଇଁ ପାନୀୟ ଜଳ ଯୋଗାଣର ବ୍ୟବସ୍ଥା କରନ୍ତେ ତେବେ ପ୍ଲୋରାଇଡ୍ ଯୁକ୍ତ ପାଣି ପିଇବାରୁ ମୁକ୍ତି ମିଳନ୍ତା। ପାନୀୟ ଜଳର ଅଭାବ କାରଣରୁ ଲୋକେ ବାଧ୍ୟ ହୋଇ ଫ୍ଲୋରାଇଡ୍ ଯୁକ୍ତ ପାଣି ପିଉଛନ୍ତି। ସେହିପରି ଆମ ଗାଁକୁ ଭଲ ରାସ୍ତାଟିଏ ନାହିଁ। ଜମିର ହୁଡାକୁ ରାସ୍ତା ଭାବେ ବ୍ୟବହାର କରି ଯାତାୟାତ କରୁଛୁ। ଗାଁର ମହିଳାମାନେ ପାନୀୟଜଳ ଓ ରାସ୍ତା ସମସ୍ୟା ନେଇ ପ୍ରଶାସନକୁ ଅବଗତ କରାଇଥିଲେ ମଧ୍ୟ ସୁଫଳ ମିଳୁନି।
