ବନ୍ତ,୨୩।୧୦(ଡି.ଏନ.ଏ.): ଭଦ୍ରକ ଜିଲା ବନ୍ତ ବ୍ଲକ ଅଧୀନ ନିଳୋକ ପଞ୍ଚାୟତ ତାଳବାଙ୍କ ଆଦିବାସୀ ସାହିକୁ ଆମ୍ବୁଲାନ୍ସ ଆସି ନ ପାରିବାରୁ ଜଣେ ଗର୍ଭବତୀ ମହିଳାଙ୍କୁ ଚାଲି ଚାଲି ମୁଖ୍ୟରାସ୍ତା ପର୍ଯ୍ୟନ୍ତ ଯିବାକୁ ପଡ଼ିଛି। ଗତ ଗୁରବାର ସନ୍ଧ୍ୟାରେ ଏହି ଘଟଣା ଘଟିଥିବା ବେଳେ ଏହାର ଭିଡିଓ ସୋସିଆଲ ମିଡିଆରେ ଭାଇରାଲ ହେବା ପରେ ଘଟଣା ପଦାକୁ ଆସିଛି।
ପ୍ରକାଶ ଯେ, ତାଳବାଙ୍କ ଆଦିବାସୀ ସାହିର ନାଥ ମୁଣ୍ଡାଙ୍କ ସ୍ତ୍ରୀ ବୁଦୁନି(୨୫) ପ୍ରସବ ଯନ୍ତ୍ରଣା ଅନୁଭବ କରିବାରୁ ପରିବାର ଲୋକେ ଡାକ୍ତରଖାନା ନେବା ପାଇଁ ଆମ୍ବୁଲାନ୍ସକୁ ଯୋଗାଯୋଗ କରିଥିଲେ। କିଛି ସମୟ ମଧ୍ୟରେ ଆମ୍ବୁଲାନ୍ସ ଆସିଥିଲା। କିନ୍ତୁ ରାସ୍ତା ଖରାପ ଯୋଗୁ ଗ୍ରାମ ମଧ୍ୟକୁ ଆସି ନ ପାରି ଆମ୍ବୁଲାନ୍ସ ୨ କି.ମି. ଦୂର ମୁଖ୍ୟ ରାସ୍ତାରେ ଅଟକି ରହିଥିଲା। ଫଳରେ ଆଶାକର୍ମୀ ଓ ପରିବାର ଲୋକେ ବୁଦୁନିଙ୍କୁ ଚଲାଇ ଆମ୍ବୁଲାନ୍ସ ପର୍ଯ୍ୟନ୍ତ ନେବା ପରେ ବନ୍ତ ପ୍ରାଥମିକ ସ୍ବାସ୍ଥ୍ୟକେନ୍ଦ୍ରକୁ ନିଆଯାଇଥିଲା।
ବାଲିଗଢ଼ିଆ ଆର୍.ଡି ରୋଡ୍ଠାରୁ ତାଳବାଙ୍କ ରେବ ନଦୀ ପର୍ଯ୍ୟନ୍ତ ଅଢ଼େଇ କି.ମି. ରାସ୍ତା ଗତ ୧୦ ବର୍ଷ ହେବ ମରାମତି ହୋଇନାହିଁ। ଫଳରେ ରାସ୍ତା ଖାଲଖମାରେ ପରିଣତ ହୋଇଛି। ବର୍ଷାଦିନେ ଚାଲିକି ଯିବା କଷ୍ଟକର ହୋଇପଡୁଛି। ଏହି ଗ୍ରାମରେ ପ୍ରାୟ ୨ ଶହ ଅନୁସୂଚିତ ଜନଜାତି ସମେତ ପ୍ରାୟ ୫ ଶହରୁ ଊର୍ଦ୍ଧ୍ୱ ଲୋକ ବସବାସ କରୁଛନ୍ତି। ଆଗାମୀ ପଞ୍ଚାୟତ ନିର୍ବାଚନ ପୂର୍ବରୁ ଉକ୍ତ ରାସ୍ତା ମରାମତି କରା ନ ଗଲେ ଭୋଟ୍ ବର୍ଜନ କରିବେ ବୋଲି ନନ୍ଦକିଶୋର ବାରିକ, କାହ୍ନୁ ଚରଣ ନାୟକ, ଟିମା ମୁଣ୍ଡା, ଶଙ୍କର ମୁଣ୍ଡା, ମଧୁ ମୁଣ୍ଡାଙ୍କ ସମେତ ଗ୍ରାମବାସୀ ଚେତାବନୀ ଦେଇଛନ୍ତି। ଏ ସମ୍ପର୍କରେ ଏବିଡିଓ ନିଶିକାନ୍ତ ଖୁଣ୍ଟିଆଙ୍କୁ ପଚାରିବାରୁ ଉକ୍ତ ରାସ୍ତା ମରାମତି ନେଇ ପଦକ୍ଷେପ ଗ୍ରହଣ କରାଯିବ ବୋଲି କହିଛନ୍ତି।
