ରାୟପୁର,୧୮।୫: ଛତିଶଗଡ଼ର ସୁରଗୁଜା ଜିଲାରୁ ଏକ ଅତ୍ୟନ୍ତ ଅମାନୁଷିକ ତଥା ହୃଦୟବିଦାରକ ଘଟଣା ସାମ୍ନାକୁ ଆସିଛି। ଜଣେ ୨୩ ବର୍ଷୀୟା ଗର୍ଭବତୀ ମହିଳାଙ୍କୁ ତାଙ୍କ ସ୍ବାମୀ ଅତି ନିର୍ମମ ଭାବେ ନିର୍ଯାତନା ଦେଇ ହତ୍ୟା କରିଥିବା ଅଭିଯୋଗ ହୋଇଛି। ଏହି ସଂଘାତିକ ମାମଲାଟି ଅମ୍ବିକାପୁର ନିକଟସ୍ଥ ଭିଥିକଲା ଗ୍ରାମରେ ଘଟିଛି।
ସୂଚନା ଅନୁଯାୟୀ, ଲଖନପୁରର ସାକରିଆ ଗ୍ରାମର ବାସିନ୍ଦା ହୀରାବାଈଙ୍କୁ ଗତ ମେ ୧୪ ତାରିଖରେ ତାଙ୍କ ସ୍ବାମୀ ପ୍ରଦୀପ ଅଗରିଆ ନିଜ ଘର ଭିତରେ ବର୍ବର ଭାବେ ଆକ୍ରମଣ କରିଥିଲେ। ହତ୍ୟା କରିବା ପରେ ଅଭିଯୋଗକୁ ଲୁଚାଇବା ପାଇଁ ଅଭିଯୁକ୍ତ ସ୍ବାମୀ ସ୍ତ୍ରୀର ମୃତଦେହକୁ ଏକ ମୋଟରସାଇକେଲ ପଛରେ ବାନ୍ଧି ଅମ୍ବିକାପୁର ମେଡିକାଲ କଲେଜ ହସ୍ପିଟାଲକୁ ଆଣିଥିଲା। ସେଠାରେ ସେ ଏହା ଏକ ଦୁର୍ଘଟଣା ବୋଲି ଦାବି କରିଥିଲା। ମାତ୍ର ଡାକ୍ତରମାନେ ମହିଳାଙ୍କୁ ମୃତ ଘୋଷଣା କରିବା କ୍ଷଣି ଅଭିଯୁକ୍ତ ସ୍ବାମୀ ହସ୍ପିଟାଲ ପରିସରରୁ ଫେରାର ହୋଇଯାଇଥିଲେ।
ଥାନା ଅଧିକାରୀ ସି.ପି. ତିୱାରୀଙ୍କ କହିବାନୁସାରେ, ଏହି ବର୍ବରତା କରିବା ସମୟରେ ତାଙ୍କର ୪ ବର୍ଷର କୁନି ଝିଅ ମଧ୍ୟ ସେଠାରେ ଉପସ୍ଥିତ ଥିଲା। ଶିଶୁଟି ହିଁ ପୋଲିସକୁ ନିଜ ବାପାର ପୈଶାଚିକ ଚେହେରା ବିଷୟରେ ସବୁ ସତ କଥା କହିଥିଲା । ଅଭିଯୁକ୍ତ ପ୍ରଥମେ ଏହାକୁ ଏକ ସଡ଼କ ଦୁର୍ଘଟଣାର ରୂପ ଦେବାକୁ ଚେଷ୍ଟା କରିଥିଲେ। କିନ୍ତୁ ପୋଷ୍ଟମର୍ଟମ ଏବଂ ଫୋରେନ୍ସିକ ଯାଞ୍ଚରୁ ଯେଉଁ ତଥ୍ୟ ସାମ୍ନାକୁ ଆସିଛି, ତାହା ସମସ୍ତଙ୍କୁ ସ୍ତବ୍ଧ କରିଦେଇଛି। ବ୍ୟବଚ୍ଛେଦରୁ ଜଣାପଡ଼ିଛି ଯେ ମୃତ ମହିଳା ଜଣକ ପ୍ରାୟ ୩ ମାସର ଗର୍ଭବତୀ ଥିଲେ। ଫୋରେନ୍ସିକ ଟିମ ମହିଳାଙ୍କ ଗୁପ୍ତାଙ୍ଗରୁ ଏକ ପ୍ରାୟ ୧୦ ଇଞ୍ଚର ଲୁହା ହେକ୍ସା ବେ୍ଲଡ୍ ଉଦ୍ଧାର କରିଛନ୍ତି । ମହିଳାଙ୍କ ଶରୀରରେ ଏକାଧିକ ଗମ୍ଭୀର କ୍ଷତ ଚିହ୍ନ ରହିଛି। ଏକ ଶକ୍ତ କାଠ ବାଡ଼ିରେ ବାରମ୍ବାର ମୁଣ୍ଡକୁ ଆଘାତ କରାଯିବା ଫଳରେ ତାଙ୍କ ମୁଣ୍ଡର ହାଡ଼ ଫାଟି ଯାଇଥିବା ରିପୋର୍ଟରେ କୁହାଯାଇଛି।
ଏହି ସାଂଘାତିକ ଘଟଣା ପରେ ସ୍ଥାନୀୟ ଅଞ୍ଚଳରେ ତୀବ୍ର ଅସନ୍ତୋଷ ପ୍ରକାଶ ପାଇଛି। ପୋଲିସ ଏହି ମାମଲାରେ ହତ୍ୟା ମାମଲା ରୁଜୁ କରି ଫେରାର ଅଭିଯୁକ୍ତ ସ୍ବାମୀକୁ ଗିରଫ କରିବା ପାଇଁ ବିଭିନ୍ନ ସ୍ଥାନରେ ଚଢ଼ାଉ ଜାରି ରଖିଛି।