ରାୟଗଡ଼ା, ୧୦।୩ (ଆଶିଷ ରଞ୍ଜନ ପଣ୍ଡା): ରାୟଗଡ଼ା ଜିଲା ମୁଖ୍ୟ ଚିକିତ୍ସାଳୟରୁ ଜଣେ ଗର୍ଭବତୀ ମହିଳା ରହସ୍ୟଜନକ ଭାବେ ନିଖୋଜ ହୋଇଯାଇଥିବା ଅଭିଯୋଗ ହୋଇଛି। ଏହି ଘଟଣାକୁ ନେଇ ଜିଲା ଅତିରିକ୍ତ ମୁଖ୍ୟ ଚିକିତ୍ସା ଅଧିକାରୀ (ADMO) ରାୟଗଡ଼ା ଟାଉନ ଥାନାରେ ଏକ ଏତଲା ଦେଇଛନ୍ତି।
ସୂଚନା ମୁତାବକ, ଜେକେପୁର ଅଞ୍ଚଳର ଜଣେ ୪ ମାସର ଗର୍ଭବତୀ ମହିଳାଦୁଇ ଦିନ ତଳେ ପ୍ରସୂତି ବିଭାଗରେ ଚିକିତ୍ସା ପାଇଁ ଭର୍ତ୍ତି ହୋଇଥିଲେ। ସବୁକିଛି ସ୍ବାଭାବିକ ଥିବା ବେଳେ ଗତକାଲି ରାତି ପ୍ରାୟ ୧୧:୩୦ ସମୟରେ ମହିଳା ଜଣଙ୍କ ନିଜ ଶଯ୍ୟାରେ ଥିଲେ। ମାତ୍ର କିଛି ସମୟ ପରେ କାର୍ଯ୍ୟରତ ନର୍ସ ଯାଞ୍ଚ ପାଇଁ ଆସିବା ବେଳକୁ ମହିଳା ଜଣଙ୍କ ଶଯ୍ୟାରେ ନଥିଲେ।
ମହିଳା ଜଣଙ୍କୁ ହସ୍ପିଟାଲ ପରିସରରେ ବହୁ ଖୋଜାଖୋଜି କରାଯାଇଥିଲେ ମଧ୍ୟ ତାଙ୍କର କୌଣସି ପତ୍ତା ମିଳି ନ ଥିଲା। ଜଣେ ଗର୍ଭବତୀ ମହିଳା ଚିକିତ୍ସାଧୀନ ଅବସ୍ଥାରେ କିଭଳି ଗାଏବ ହୋଇଗଲେ, ତାହା ମେଡିକାଲ କର୍ତ୍ତୃପକ୍ଷଙ୍କୁ ଆଶ୍ଚର୍ଯ୍ୟ କରିଛି। ଏ ସମ୍ପର୍କରେ ଉଚ୍ଚ କର୍ତ୍ତୃପକ୍ଷଙ୍କୁ ଅବଗତ କରାଯିବା ପରେ ମଙ୍ଗଳବାର ସକାଳେ ବିଧିବଦ୍ଧ ଭାବେ ଥାନାରେ ଜଣାଯାଇଥିଲା।
ଟାଉନ ଥାନା ଅଧିକାରୀ ପ୍ରସନ୍ନ କୁମାର ବେହେରା କହିଛନ୍ତି ଯେ, ମୁଖ୍ୟ ଚିକିତ୍ସାଳୟ ପକ୍ଷରୁ ଏକ ଲିଖିତ ଏତଲା ମିଳିଛି। ପୋଲିସ ଏହି ଘଟଣାରେ ଏକ ନିଖୋଜ ମାମଲା ରୁଜୁ କରି ତଦନ୍ତ ଆରମ୍ଭ କରିଛି। ମହିଳା ଜଣଙ୍କ ନିଜ ଇଚ୍ଛାରେ କେଉଁଆଡ଼େ ଚାଲିଯାଇଛନ୍ତି ନା ଏହା ପଛରେ ଅନ୍ୟ କିଛି କାରଣ ରହିଛି, ସେ ନେଇ ପୋଲିସ ଖୋଳତାଳ କରୁଛି।
