ବାଲେଶ୍ୱର,୧୪।୪(ମାନସ ବିଶ୍ୱାଳ)- ଜଳେଶ୍ୱର ବିଧାନସଭା ନିର୍ବାଚନମଣ୍ଡଳୀ ପାଇଁ ଭାଜପା ପକ୍ଷରୁ ଘୋଷଣା କରାଯାଇଥିବା ପ୍ରାର୍ଥୀଙ୍କୁ ବିରୋଧ କରାଯାଇଛି। ଏନେଇ ବାଲେଶ୍ୱର ସହର ସହଦେବଖୁଣ୍ଟାସ୍ଥିତ ଏକ ଘରୋଇ କଲ୍ୟାଣ ମଣ୍ଡପରେ ଭାଜପା ପକ୍ଷରୁ ଖୋଲାଯାଇଥିବା ଅସ୍ଥାୟୀ ନିର୍ବାଚନୀ କାର୍ଯ୍ୟାଳୟରେ ପହଞ୍ଚତ୍ କର୍ମୀମାନେ ହୋହଲ୍ଲା କରିଛନ୍ତି। ପ୍ରାର୍ଥୀ ପରିବର୍ତ୍ତନ ନ ହେଲେ ଏମ୍ପି ପ୍ରାର୍ଥୀ ପ୍ରତାପ ଚନ୍ଦ୍ର ଷଡ଼ଙ୍ଗୀଙ୍କୁ ଜଳେଶ୍ୱର ନିର୍ବାଚନମଣ୍ଡଳୀରେ ପୂରାଇ ଦିଆଯିବ ନାହିଁ ବୋଲି ଅସନ୍ତୁଷ୍ଟ ଭାଜପା କର୍ମୀମାନେ ଚେତାବନୀ ଦେଇଛନ୍ତି।
ସୂଚନା ଅନୁଯାୟୀ, ରବିବାର ଜଳେଶ୍ୱର ବିଧାନସଭା ନିର୍ବାଚନମଣ୍ଡଳୀର ପୁରୁଖା ଭାଜପା କର୍ମୀମାନେ ସହଦେବଖୁଣ୍ଟାସ୍ଥିତ ଅସ୍ଥାୟୀ କାର୍ଯ୍ୟାଠାରେ ପହଞ୍ଚତ୍ ପ୍ରାର୍ଥୀ ଘୋଷଣା ହୋଇଥିବା ବ୍ରଜମୋହନ ପ୍ରଧାନଙ୍କ ବଦଳରେ ରଘୁନାଥ ମହାନ୍ତିଙ୍କୁ ପ୍ରାର୍ଥୀ କରିବା ପାଇଁ ଏମ୍ପି ପ୍ରାର୍ଥୀ ପ୍ରତାପ ଚନ୍ଦ୍ର ଷଡ଼ଙ୍ଗୀଙ୍କଠାରେ ଦାବି କରିଥିଲେ। ଏହାକୁ ନେଇ ଦୀର୍ଘ ସମୟ କଥା କଟାକଟି ହେବା ସହ ଉତ୍ତେଜନାମୂଳକ ପରିସ୍ଥିତି ସୃଷ୍ଟି ହୋଇଥିଲା। କର୍ମୀ ଦୀର୍ଘ ୨/୩ ଘଣ୍ଟା ଉକ୍ତ କାର୍ଯ୍ୟାଳୟକୁ ଘେରାଉ କରି ରଖିଥିବା ଦେଖିବାକୁ ମିଳିଥିଲା।
ଅଭିଯୋଗ ଅନୁଯାୟୀ, ବ୍ରଜ ବିଜେଡି ଛାଡ଼ି ଭାଜପାରେ ମିଶିଥିବା କାରଣରୁ ସ୍ଥାନୀୟ ଭାଜପା କର୍ମୀମାନେ ସହଜରେ ଗ୍ରହଣ କରି ନ ପାରି ତାଙ୍କ ପ୍ରାର୍ଥୀତ୍ୱକୁ ବିରୋଧ କରିଆସୁଛନ୍ତି। ଉକ୍ତ ବିଧାନସଭା କ୍ଷେତ୍ରରେ ପ୍ରାର୍ଥୀ ପରିବର୍ତ୍ତନ ପାଇଁ କର୍ମୀମାନେ ଦାବି କରିଆସୁଥିଲେ ମଧ୍ୟ କୌଣସି ସୁଫଳ ମିଳି ନ ଥିଲା। ଅସନ୍ତୁଷ୍ଟ ଭାଜପା କର୍ମୀ ଚାରୁଚନ୍ଦ୍ର ଦାସଙ୍କ ନେତୃତ୍ୱରେ ଅଞ୍ଚଳର ୪୦ରୁ ୫୦ ନେତା ଓ କର୍ମୀ ରବିବାର ଏକଜୁଟ୍ ହୋଇ ଉକ୍ତ କାର୍ଯ୍ୟାଳୟରେ ପହଞ୍ଚତ୍ଥିଲେ। ପ୍ରାର୍ଥୀ ପରିବର୍ତ୍ତନ ପାଇଁ ଦାବି କରିଥିଲେ। ଯଦି ପ୍ରାର୍ଥୀ ପରିବର୍ତ୍ତନ କରା ନ ଯାଏ ତେବେ ଜଳେଶ୍ୱର ବିଧାନସଭା କ୍ଷେତ୍ର ଅଞ୍ଚଳରେ ଭାଜପା ଏମ୍ପି ପ୍ରାର୍ଥୀ ଷଡ଼ଙ୍ଗୀ ଓ ଜିଲା ଭାଜପା ସଭାପତି ଉମାକାନ୍ତ ମହାପାତ୍ରଙ୍କୁ ପୂରାଇ ଦିଆଯିବ ନାହଁି ବୋଲି ଅସନ୍ତୁଷ୍ଟ ନେତାମାନେ ଚେତାବନୀ ଦେଇଛନ୍ତି।
