ପାଟନା,୩।୮: ବାଙ୍କିପୁର ବିଧାନସଭା ଉପନିର୍ବାଚନରେ ବଡ଼ ବିଜୟ ହାସଲ କରିଛନ୍ତି ଜନ ସୁରାଜର ପ୍ରତିଷ୍ଠାତା ପ୍ରଶାନ୍ତ କିଶୋର। ତେବେ ଭୋଟ ଗଣତି ଚାଲିଥିବା ସମୟରେ ଗଣମାଧ୍ୟମ ସହ କଥାବାର୍ତ୍ତା ବେଳେ ଅନେକ ଗୁରୁତ୍ୱପୂର୍ଣ୍ଣ ମତ ରଖିଛନ୍ତି।
ସେ କହିଛନ୍ତି, “ଆପଣ ଯଦି ଜଣେ ଅପରାଧିକ ପୃଷ୍ଠଭୂମି ଥିବା ବ୍ୟକ୍ତିଙ୍କୁ ବିହାରର ମୁଖ୍ୟମନ୍ତ୍ରୀ କରିବେ, ତେବେ ରାଜ୍ୟର ବିକାଶ ସମ୍ଭବ ନୁହେଁ। ବହୁମତ ତାଙ୍କ ପାଖରେ ଅଛି, ତେଣୁ ମୁଖ୍ୟମନ୍ତ୍ରୀ ସେମାନଙ୍କ ଦଳରୁ ହିଁ ହେବେ। ଆମ ଦଳରୁ ମୁଖ୍ୟମନ୍ତ୍ରୀ ହେବେ ନାହିଁ, କିନ୍ତୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଆମର ଅପିଲ, ବିହାର ପାଇଁ ଜଣେ ଚରିତ୍ରବାନ ଓ ଯୋଗ୍ୟ ବ୍ୟକ୍ତିଙ୍କୁ ମୁଖ୍ୟମନ୍ତ୍ରୀ କରନ୍ତୁ।”
ପ୍ରଶାନ୍ତ କିଶୋର କହିଛନ୍ତି, ବିହାରର ଲୋକମାନେ କେବଳ ପରିଶ୍ରମ ଓ ଦିନମଜୁରି କରିବା ପାଇଁ ଜନ୍ମ ହୋଇନାହାନ୍ତି। “ଗୁଜରାଟର ଲୋକେ ଲକ୍ଷ କୋଟି ଟଙ୍କାର ବୁଲେଟ ଟ୍ରେନରେ ଯାତ୍ରା କରିବେ, ଆଉ ବିହାରର ଲୋକେ କେବଳ ମଜୁରି କରିବେ ଏହା ଗ୍ରହଣୀୟ ନୁହେଁ।” ସେ କହିଛନ୍ତି, ଯଦି ଭାଜପା କୁଶୱାହା ସମାଜର କାହାକୁ ମୁଖ୍ୟମନ୍ତ୍ରୀ କରିବାକୁ ଚାହୁଁଛି, ତେବେ ଜଣେ ଦକ୍ଷ ଓ ସ୍ବଚ୍ଛ ଭାବମୂର୍ତ୍ତି ଥିବା ନେତାଙ୍କୁ ସୁଯୋଗ ଦେବା ଉଚିତ୍।
ବାଙ୍କିପୁରରେ ନିଜ ବିଜୟକୁ ନେଇ ପ୍ରଶାନ୍ତ କିଶୋର କହିଛନ୍ତି, “ଏହି ନିର୍ବାଚନ କେବଳ ଜଣେ ବିଧାୟକ ବାଛିବା ପାଇଁ ନଥିଲା, ବରଂ ଏହାକୁ ସରକାରଙ୍କ କାର୍ଯ୍ୟକଳାପ ଉପରେ ଜନମତ ଭାବେ ଦେଖାଯାଇପାରେ।” ସେ କହିଛନ୍ତି, ଜନତା ଏହି ନିର୍ବାଚନ ମାଧ୍ୟମରେ ନିଜର ମତ ଓ ପ୍ରାଥମିକତା ସ୍ପଷ୍ଟ କରିଛନ୍ତି।
ପ୍ରଶାନ୍ତ କିଶୋର ଆହୁରି କହିଛନ୍ତି ଯେ, ସମ୍ରାଟ ଚୌଧୁରୀଙ୍କର ଅପରାଧିକ ପୃଷ୍ଠଭୂମି ରହିଛି ଏବଂ ସେ ମୁଖ୍ୟମନ୍ତ୍ରୀ ପରି ପଦରେ ରହିବା ଉଚିତ୍ ନୁହେଁ। ଜନ ସୁରାଜ ନେତା କେନ୍ଦ୍ରରେ ଭାଜପା ନେତୃତ୍ୱଙ୍କୁ ଅପିଲ କରି କହିଛନ୍ତି, “ବିହାର ପାଇଁ ଜଣେ ଯୋଗ୍ୟ, ସ୍ବଚ୍ଛ ଓ ଦକ୍ଷ ନେତାଙ୍କୁ ମୁଖ୍ୟମନ୍ତ୍ରୀ କରନ୍ତୁ, ଯାହାଦ୍ୱାରା ରାଜ୍ୟର ପ୍ରକୃତ ବିକାଶ ସମ୍ଭବ ହେବ।”