ନୂଆଦିଲ୍ଲୀ,୭।୧୨: ଥମିବାର ନାଁ ନେଉନାହିଁ କଂଗ୍ରେସର ଅଡ଼ୁଆ। ପ୍ରଥମେ ଅଧୀର ରଞ୍ଜନ ଚୌଧୁରୀ ସଂସଦରେ ଦଳକୁ କଟାକ୍ଷ କରିବା ପରେ ଏବେ ପୂର୍ବତନ ରାଷ୍ଟ୍ରପତି ପ୍ରଣବ ମୁଖାର୍ଜୀଙ୍କ ଝିଅ ଶର୍ମିଷ୍ଠା ମୁଖାର୍ଜୀ ନିଜର ପୁସ୍ତକରେ ଦଳକୁ ନେଇ ବଡ଼ ଖୁଲାସା କରିଛନ୍ତି। ରୂପା ପବ୍ଲିକେଶନ୍ ଦ୍ୱାରା ପ୍ରକାଶିତ ପୁସ୍ତକ ‘ଇନ୍ ପ୍ରଣବ, ମାଇଁ ଫାଦର: ଏ ଡଟର ରିମେମ୍ବର୍ସ’ରେ କଂଗ୍ରେସ ନେତାଙ୍କୁ ନେଇ ଅନେକ ଗୋପନ କଥା ପ୍ରଘଟ କରିଛନ୍ତି। ସେଥିରେ କଂଗ୍ରେସ ଏମ୍ପି ରାହୁଲ ଗାନ୍ଧୀ ଏବଂ ତାଙ୍କ ବାପାଙ୍କ ଭେଟଘାଟକୁ ନେଇ ଏକ ମଜାଦାର ଘଟଣା ବିଷୟରେ କୁହାଯାଇଛି।
ପୁସ୍ତକରେ ଶର୍ମିଷ୍ଠା କହିଛନ୍ତି, ଏକଦା ପ୍ରଣବ ରାଷ୍ଟ୍ରପତି ଭବନର ମୋଗଲ ଗାର୍ଡେନ୍ (ଅମୃତ ଉଦ୍ୟାନ)ରେ ପ୍ରାତଃ ଭ୍ରମଣ କରୁଥିଲେ। ତାଙ୍କୁ ପୂଜାପାଠ ଏବଂ ପ୍ରାତଃଭ୍ରମଣ କରିବା ସମୟରେ କେହି ତାଙ୍କୁ ବ୍ୟାଘାତ ଦେଲେ ସେ ଆଦୌ ବରଦାସ୍ତ କରୁ ନ ଥିଲେ। କିନ୍ତୁ ସେହି ସମୟରେ ହିଁ ରାହୁଲ ତାଙ୍କୁ ଭେଟିବାକୁ ଯାଇଥିଲେ। ହେଲେ ରାହୁଲ ପ୍ରଣବଙ୍କୁ ସନ୍ଧ୍ୟାରେ ଭେଟିବା ପାଇଁ ସମୟ ନେଇଥିଲେ। ରାହୁଲଙ୍କ ଟିମ୍ ଭୂଲବଶତଃ ସନ୍ଧ୍ୟା ବଦଳରେ ସକାଳେ ମିଟିଂ ଥିବା କହିଥିଲେ। ଫଳରେ ସେ ସକାଳେ ଯାଇ ମୋଗଲ ଗାର୍ଡେନରେ ସାକ୍ଷାତ କରିଥିଲେ। ଏହି ବିଷୟରେ ଶର୍ମିଷ୍ଠା ବାପାଙ୍କୁ ପ୍ରଶ୍ନ କରିବାରୁ ସେ କହିଥିଲେ, ଯଦି ଏଏମ୍ (ଏଣ୍ଟିମେରିଡିୟମ୍) ଏବଂ ପିଏମ୍ (ପୋଷ୍ଟ୍ ମେରିଡିୟମ୍)ର ପ୍ରଭେଦ ରାହୁଲଙ୍କ ଅଫିସକୁ ଜଣାନାହିଁ, ତେବେ ଦିନେ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ (ପିଏମ୍ଓ)କୁ କିପରି ଚଳାଇବେ?
ସୂଚନାଯୋଗ୍ୟ, ପ୍ରଣବ ଭାରତର ତ୍ରୟୋଦଶ ରାଷ୍ଟ୍ରପତି (୨୦୧୨-୨୦୧୭) ଥିଲେ। ୨୦୨୦ ଅଗଷ୍ଟ ୧୩ରେ ୮୪ ବର୍ଷ ବୟସରେ ତାଙ୍କ ପରଲୋକ ହୋଇଥିଲା। ୨୦୨୧ରେ ରାଜନୀତି ଛାଡ଼ିଦେଇଥିବା କଂଗ୍ରେସର ପୂର୍ବତନ ମୁଖପାତ୍ର ଶର୍ମିଷ୍ଠା ନିଜ ପୁସ୍ତକରେ ବାପାଙ୍କ ଗୌରବମୟ ରାଜନୈତିକ ଜୀବନ ସମ୍ପର୍କରେ ସମ୍ୟକ ରୂପେ ଉଲ୍ଲେଖ କରିଛନ୍ତି। ୨୦୦୪ ଲୋକ ସଭା ନିର୍ବାଚନରେ କଂଗ୍ରେସ ନେତୃତ୍ୱାଧୀନ ସଂଯୁକ୍ତ ପ୍ରଗତିଶୀଳ ମେଣ୍ଟ (ଉପା) ସରକାର ଗଠନ ବେଳେ ସୋନିଆ ପ୍ରଣବଙ୍କ ପରିବର୍ତ୍ତେ କିପରି ମନମୋହନ ସିଂଙ୍କୁ ଭାରତର ପ୍ରଧାନମନ୍ତ୍ରୀ ବାଛିଥିଲେ ତାହା ‘ଦି ପିଏମ୍ ଇଣ୍ଡିଆ ନେଭର ହ୍ୟାଡ୍’ ଅଧ୍ୟାୟରେ ଶର୍ମିଷ୍ଠା ଲେଖିଛନ୍ତି।
