କୋରୁକୋଣ୍ଡା,୨୮ା୬(ଡି.ଏନ୍.ଏ.): ପୁଣି ଅଶାନ୍ତ ହୋଇଉଠିଛି ସ୍ବାଭିମାନ ଅଞ୍ଚଳ। ମାଲକାନଗିରି ଜିଲାର ସ୍ବାଭିମାନ ଅଞ୍ଚଳରେ ଦିନକୁ ଦିନ ଦାନା ବାନ୍ଧୁଛି ସରକାର ତଥା ବିଏସ୍ଏଫ୍ ବିରୋଧୀ ସ୍ବର। ସ୍ବାଭିମାନ ଅଞ୍ଚଳର ଦରଲାବେଡ଼ାଠାରେ ଗତ ୨୪ ତାରିଖରେ କିଛି ଶ୍ରମିକ କାମ ସାରି ଫେରୁଥିବା ବେଳେ ସେମାନଙ୍କୁ ବିଏସ୍ଏଫ୍ର ସୁରକ୍ଷା କର୍ମୀମାନେ ଅଟକାଇବା ସହ ମାଓବାଦୀଙ୍କ ସହ ସମ୍ପର୍କ ରଖିଥିବା କହି ମାଡ଼ ମାରିଥିବା ଅଭିଯୋଗ ହୋଇଛି। ତେବେ ଏହି ସମୟରେ ବିଏସ୍ଏଫ୍ ଏହି ଶ୍ରମିକମାନଙ୍କୁ ଜୀବନରୁ ମାରିଦେବା ପାଇଁ ଧମକ ଦେବା ସହ ଫାଙ୍କା ଗୁଳିଚଳନା କରିଥିବା ମଧ୍ୟ ଅଭିଯୋଗ ହୋଇଛି। ତେବେ ଏହି ଘଟଣାକୁ କେନ୍ଦ୍ର କରି ରବିବାର ସ୍ବାଭିମାନ ଅଞ୍ଚଳର ଗୋରାସେତୁଠାରେ ଏକ ବିରାଟ ପ୍ରଜାମେଳି ହୋଇଛି। ଏହି ପ୍ରଜାମେଳିରେ ଶତାଧିକ ଲୋକ ଯୋଗଦେଇ ବିଏସ୍ଏଫ୍ ବିରୋଧରେ ସ୍ବର ଉତ୍ତୋଳନ କରିଥିଲେ। ସ୍ବାଭିମାନ ଅଞ୍ଚଳରେ ଅନେକ ସମସ୍ୟା ଥିବା ବେଳେ ସରକାର ସେଥିପାଇଁ ଦୃଷ୍ଟି ନ ଦେଇ ବିଏସ୍ଏଫ୍ଙ୍କ ଦାରା ନିରୀହ ଲୋକଙ୍କୁ ଶୋଷଣ କରୁଥିବା ଏହି ପ୍ରଜାମେଳିରେ ଅଭିଯୋଗ ହୋଇଛି। ବିଏସ୍ଏଫ୍ ଯଦି ଏଭଳି ଜୁଲୁମ କରିଚାଲିବ ତେବେ ଆଗାମୀ ଦିନରେ ଆଦିବାସୀମାନେ ମଧ୍ୟ ପାରମ୍ପରିକ ଅସ୍ତ୍ରଶସ୍ତ୍ରରେ ବିଏସ୍ଏଫ୍କୁ ବିରୋଧ କରିବେ ବୋଲି ଏହି ମେଳିରେ ଆଲୋଚନା ହୋଇଛି। ଏହାସହ ଲକ୍ଡାଉନ୍ ଯୋଗୁ ସ୍ବାଭିମାନ ଅଞ୍ଚଳରେ ଥିବା ବିଚ୍ଛିନ୍ନ ଅଞ୍ଚଳକୁ ଦୀର୍ଘ ୩ ମାସ ହେଲା ଲଞ୍ଚ ବନ୍ଦ ଥିବାରୁ ଲୋକେ ନାନା ଅସୁବିଧାର ସମ୍ମୁଖୀନ ହେଉଛନ୍ତି। ତୁରନ୍ତ ପ୍ରଶାସନ ଲଞ୍ଚ ବ୍ୟବସ୍ଥା କରିବା ପାଇଁ ଏହି ମେଳିରେ ଦାବି ହୋଇଛି।
