ନୂଆଦିଲ୍ଲୀ,୧୬।୭(ପି.ଟି.): ଭାରୋତ୍ତୋଳକ ପ୍ରଦୀପ ସିଂ ଡୋପ୍ ଟେଷ୍ଟରେ ବିଫଳ ହୋଇ ସାମୟିକ ଭାବେ ବାସନ୍ଦ ହୋଇଛନ୍ତି। ୨୦୧୮ ରାଜ୍ୟଗୋଷ୍ଠୀ କ୍ରୀଡ଼ା ରୌପ୍ୟ ପଦକ ବିଜେତା ପ୍ରଦୀପଙ୍କ ରକ୍ତ ନମୁନାରେ ହ୍ୟୁମାନ ଗ୍ରୋଥ ହରମୋନ୍ (ଏଚ୍ଜିଏଚ୍) ଥିବା ଜଣାପଡିଥିଲା। ନିଷିଦ୍ଧ ଏଚ୍ଜିଏଚ୍ ପାଇଁ ପ୍ରଦୀପ୍ ବାସନ୍ଦ ହେବା ପ୍ରଥମ ଘଟଣା ବୋଲି କୁହାଯାଉଛି। ଯଦିଓ ୨୦୧୮ରେ ସମକାରଣ ପାଇଁ ଭାରୋତ୍ତୋଳିକା ଯଶବୀର କୌର ବାସନ୍ଦ ହୋଇଥିଲେ।
ବିଶ୍ୱ ନିଶା ନିବାରଣ ସଂସ୍ଥା (ଓ୍ବାଡ଼ା) ନିୟମ ଅନୁସାରେ ଏଚ୍ଜିଏଚ୍କୁ ନିଷିଦ୍ଧ କରାଯାଇଛି। ପଟିଆଲସ୍ଥିତ ନ୍ୟାଶନାଲ ଇନ୍ଷ୍ଟିଚ୍ୟୁଟ୍ ଅଫ୍ ସ୍ପୋଟର୍ସ (ନିସ୍)ରେ ଗତ ଡିସେମ୍ବରରେ ଚାଲିଥିବା ଏକ ପ୍ରଶିକ୍ଷଣ ଶିବିରରେ ସରପ୍ରାଇଜ୍ ଆଉଟ୍- ଅଫ୍- କମ୍ପିଟିଶନ ଟେଷ୍ଟରେ ପ୍ରଦୀପଙ୍କ ରକ୍ତ ନମୁନା ସଂଗୃହିତ ହୋଇଥିଲା। ପରେ ଦୋହାସ୍ଥିତ ଓ୍ବାଡା ମାନ୍ୟତାପ୍ରାପ୍ତ ଲବୋରାଟୋରୀରେ ଏହି ନମୁନାର ଟେଷ୍ଟ କରାଯାଇଥିଲା। ନୂଆଦିଲ୍ଲୀସ୍ଥିତ ନ୍ୟାଶନାଲ ଡୋପ୍ ଟେଷ୍ଟ ଲାବୋରାଟୋରୀକୁ ବାସନ୍ଦ କରାଯାଇଥିବା କାରଣରୁ ଦୋହାରେ ଏହାର ଟେଷ୍ଟ କରାଯାଇଥିଲା। ମାର୍ଚ୍ଚରେ ଏ ନମୁନାର ଫଳ ପଜିଟିଭ୍ ଆସିଥିଲା। ଏହାକୁ ମଙ୍ଗଳବାର ସାର୍ବଜନୀନ କରାଯାଇଥିଲା। ତେବେ ଲକ୍ଡାଉନ୍ କାରଣରୁ ଏପର୍ଯ୍ୟନ୍ତ ବି ସାମ୍ପୂଲର ଟେଷ୍ଟ ଏପର୍ଯ୍ୟନ୍ତ ହୋଇନାହିଁ। ଟେଷ୍ଟ ଆରମ୍ଭ କରିବା ପରେ କୌଣସି ରକ୍ତ ନମୁନାରେ ପ୍ରଥମଥର ପାଇଁ ଏଚ୍ଜିଏଚ୍ ଦେଖିବାକୁ ମିଳିଛି ବୋଲି ଜାତୀୟ ନିଶା ନିବାରଣ ସଂସ୍ଥା (ନାଡ଼ା)ର ଡାଇରେକ୍ଟର ଜେନେରାଲ ନବୀନ ଅଗ୍ରଓ୍ବାଲ କହିଛନ୍ତି। ପୂର୍ବରୁ ଏହି ଡ୍ରଗ୍ କେହି ବ୍ୟବହାର କରୁ ନ ଥିଲେ। ତେବେ ବର୍ତ୍ତମାନ ଭାରତରେ ଏହା ବହୁତ ବ୍ୟବହାର ହେଉଛି ବୋଲି ବିଭିନ୍ନ ରିପୋର୍ଟରେ କୁହାଯାଇଛି। ପ୍ରଦୀପଙ୍କୁ ସାମୟିକ ଭାବେ ୪ ବର୍ଷ ବାସନ୍ଦ କରାଯାଇଛି ବୋଲି ନବୀନ ସ୍ପଷ୍ଟ କରିଛନ୍ତି।
ପ୍ରଦୀପ ପୂର୍ବରୁ ୨୦୧୮ ଗୋଲ୍ଡ କୋଷ୍ଟ ରାଜ୍ୟଗୋଷ୍ଠୀ କ୍ରୀଡ଼ାରେ ପୁରୁଷ ୧୦୫ କେ.ଜି ବର୍ଗରେ ରୌପ୍ୟ ପଦକ ହାସଲ କରିଥିଲେ। ତାଙ୍କର ମୋଟ୍ ଲିଫ୍ଟ ଥିଲା ୩୫୨ କେ.ଜି.। ଗତ ଫେବୃୟାରୀରେ ସେ ୧୦୨ କେ.ଜି.ରେ ଜାତୀୟ ସ୍ବର୍ଣ୍ଣ ପଦକ ହାସଲ କରିଥିଲେ। ଏଥିରେ ତାଙ୍କର ଟୋଟାଲ ଲିଫ୍ଟ ଥିଲା ୩୪୬ କେ.ଜି.। ଏଚ୍ଜିଏଚ୍ ବ୍ୟବହାର ଦ୍ୱାରା ଶରୀରରେ ଚର୍ବି କମାଇବା ସହ ମାଂଶପେସୀ ଓ ଶକ୍ତିରେ ବୃଦ୍ଧି ଘଟିଥାଏ ବୋଲି ଓ୍ବାଡ଼ା ତରଫରୁ କୁହାଯାଇଛି।
