ବାଲିଚନ୍ଦ୍ରପୁର,୨୪।୯(ଗିରିଜା ପ୍ରସାଦ ସାହୁ): ଚଣ୍ଡିଖୋଲ-ପାରାଦୀପ ୫୩ ନମ୍ବର ଜାତୀୟ ରାଜପଥର ବାଲିଚନ୍ଦ୍ରପୁର ଛକରେ ଗ୍ରାମାଞ୍ଚଳ ଓ ବାଲିଚନ୍ଦ୍ରପୁର ବଜାରକୁ ସଂଯୋଗ ପାଇଁ ରାଜପଥର ଉଭୟ ପାର୍ଶ୍ୱରେ ରହିଛି ସଂଯୋଗୀକରଣ ରାସ୍ତା। ଦୀର୍ଘଦିନ ହେବ ଏହି ରାସ୍ତାରେ ବିରାଟ ବରାଟ ଗର୍ତ୍ତ ସୃଷ୍ଟି ହୋଇ ପୋଖରୀର ଭ୍ରମ ସୃଷ୍ଟି କରୁଛି। ଜାତୀୟ ରାଜପଥରୁ ପଟାମୁଣ୍ଡାଇ କେନାଲ ବନ୍ଧକୁ ସଂଯୋଗୀକରଣ ଏହି ରାସ୍ତାଟି ଏବେ ମରଣଯନ୍ତାରେ ପରିଣତ ହୋଇଛି। ଏବେ ବର୍ଷା ଋତୁ ଥିବାରୁ ଗର୍ତ୍ତ ଗୁଡ଼ିକରେ ପାଣି ଭର୍ତ୍ତି ହୋଇ ରହୁଛି। ଏହି ରାସ୍ତା ଦେଇ ୧୦ ପଞ୍ଚାୟତର ଲୋକ ଯାତୟାତା କରୁଛନ୍ତି। ସେହିପରି ସ୍କୁଲ, କଲେଜର ଛାତ୍ରୀଛାତ୍ର ଏହି ରାସ୍ତାରେ ଯିବାଆସିବା କରୁଛନ୍ତି। ବାଲିଚନ୍ଦ୍ରପୁର ବଜାର ଏକ ପ୍ରମୁଖ ବାଣିଜ୍ୟ ପେଣ୍ଠସ୍ଥଳି ହୋଇଥିବାରୁ ଏଠାକୁ ବଡ଼ବଡ଼ ଗାଡ଼ିରେ ମାଲ ପରିବହନ ହୋଇଥାଏ। ଉକ୍ତ ରାସ୍ତାଟି ଏବେ ଶୋଚନୀୟ ହୋଇପଡ଼ିଥିବାରୁ ଅନେକ ସମୟରେ ସେହି ଗର୍ତ୍ତରେ ପଡ଼ି ବାଇକ୍ ଆରୋହୀ ଗୁରୁତର ହୋଇଥିବା ଦେଖାଯାଇଛି।
ସ୍ଥାନୀୟ ଅଞ୍ଚଳର ଯୁବକମାନେ ବାଲିଚନ୍ଦ୍ରପୁର ବଜାରରେ ପରିବା ବ୍ୟବସାୟ କରନ୍ତି। ସେମାନଙ୍କ ମଧ୍ୟରୁ ୨/୩ ଜଣ ଉକ୍ତ ରାସ୍ତାର ଗର୍ତ୍ତରେ ପଡ଼ି ଗୁରୁତର ହୋଇଛନ୍ତି। ଏପରିକି ସେଠାରେ କେତେବେଳେ ଟ୍ରାକ୍ଟର ଓଲଟି ପଡୁଛି ତ କେତେବେଳେ କାର ଓ ଟ୍ରକ୍ ଓଲଟି ପଡ଼ିଥିବା ଦେଖାଯାଇଛି। ଦୁର୍ଘଟଣା ପରେ ସ୍ଥାନୀୟ ପୋଲିସ ପହଞ୍ଚି ଆଇନଗତ ଦିଗ ଉପରେ ନଜର ଦେଉଥିବାବେଳେ ଜାତୀୟ ରାଜପଥ ସୁରକ୍ଷା ଦାୟିତ୍ୱରେ ଥିବା ଠିକା କମ୍ପାନୀ କର୍ମଚାରୀ ପହଞ୍ଚି ରାସ୍ତାରୁ ଗାଡ଼ିମୋଟରଗୁଡ଼ିକ ହଟାଇ ଦେଇ ଚୁପ ବସୁଛନ୍ତି। ଅନେକ ସମୟରେ ସ୍ଥାନୀୟ ଜନସାଧାରଣ ଓ ବ୍ୟବସାୟୀଙ୍କ ପକ୍ଷରୁ ଅସ୍ଥାୟୀଭାବେ ଉକ୍ତ ରାସ୍ତାକୁ ମରାମତ କରାଯାଉଥିଲେ ମଧ୍ୟ ରାସ୍ତାର ଅବସ୍ଥାରେ ସୁଧାର ଆସିପାରୁନାହିଁ। ଏସବୁ ଘଟଣା ଜାତୀୟ ରାଜପଥ ପ୍ରାଧିକରଣ କର୍ତ୍ତୃପକ୍ଷଙ୍କୁ ବାରମ୍ବାର ଅବଗତ କରାଯାଇଥିଲେ ମଧ୍ୟ ସେମାନେ କର୍ଣ୍ଣପାତ କରୁନାହାନ୍ତି। ଫଳରେ ଏହି ରାସ୍ତାରେ ଦୈନିକ ଧନଜୀବନ ହାନି ଘଟୁଛି। ତେଣୁ ଏଥିପ୍ରତି ବିଭାଗୀୟ ଉଚ୍ଚ ପଦାଧିକାରୀ ଦୃଷ୍ଟି ଦେଇ ତୁରନ୍ତ ରାସ୍ତା ମରାମତ କରିବା ପାଇଁ ଜନସାଧାରଣଙ୍କ ପକ୍ଷରୁ ଦାବି ହୋଇଛି। ଯଦି ରାସ୍ତା ମରାମତ କରା ନ ଯାଏ ତାହା ହେଲେ ବାଧ୍ୟ ହୋଇ ସ୍ଥାନୀୟ ଜନସାଧାରଣ ଆନ୍ଦୋଳାତ୍ମକ ପନ୍ଥା ଗ୍ରହଣ କରିବେ ବୋଲି ଚେତାବନୀ ଦେଇଛନ୍ତି।
