ଜଳେଶ୍ୱର, ୨୬ା୭(ରବିନାରାୟଣ ପାତ୍ର):ପଶ୍ଚିମବଙ୍ଗ ସରକାର ନିଜ ରାଜ୍ୟରେ ଆଳୁ ଆବଶ୍ୟକତାକୁ ଲକ୍ଷ୍ୟ କରି ଅନ୍ୟ ରାଜ୍ୟକୁ ପରିବହନ ଉପରେ ଗତ ୬ଦିନ ତଳେ ରୋକ ଲଗାଇଛନ୍ତି। ପଶ୍ଚିମବଙ୍ଗରେ ଥିବା ସମସ୍ତ ଶୀତଳଭଣ୍ଡାରରୁ ଆଳୁ ବାହାରି ପାରୁନାହିଁ। ଫଳରେ ବାଲେଶ୍ୱର ଜିଲା ଜଳେଶ୍ୱର ବଜାରରେ ଆଳୁ କିଲୋ ପ୍ରତି ମୂଲ୍ୟ ୫୦ ଟଙ୍କା ଛୁଇଁଛି। ୨୦୧୪ ମସିହା ପରିସ୍ଥିତି ଉପୁଜିବାକୁ ଯାଉଥିବାରୁ ଏହାର ସମାଧାନ ଲାଗି ଉଭୟ ରାଜ୍ୟ ପ୍ରଶାସନିକ ଆଲୋଚନା କରାଯିବାକୁ ସାଧାରଣରେ ଦାବି ହୋଇଛି। ଅନ୍ୟଥା ଓଡ଼ିଶାରୁ ପଶ୍ଚିମବଙ୍ଗକୁ ଯାଉଥିବା ଅନ୍ୟ ସମସ୍ତ ଜିନିଷର ପରିବହନକୁ ବନ୍ଦ କରାଯିବ ବୋଲି ଉପାନ୍ତରେ ପ୍ରସ୍ତୁତି ଚାଲିଛି ା ପଶ୍ଚିମବଙ୍ଗ ରାଜ୍ୟ ସରକାର ଗତ ୨୦ତାରିଖରୁ ଅନ୍ୟ ରାଜ୍ୟକୁ ଆଳୁର ରପ୍ତାନୀ ଉପରେ ରୋକ ଲଗାଇଛନ୍ତି। ତାଙ୍କ ରାଜ୍ୟରେ ଆଳୁ କିଲୋଗ୍ରାମ ପ୍ରତି ୨୦ଟଙ୍କାରେ ବିକ୍ରି କରିବାକୁ ଆଳୁ ବ୍ୟବସାୟୀ ମହାସଂଘକୁ ପଶ୍ଚିମବଙ୍ଗ ସରକାର ନିର୍ଦ୍ଦେଶ ଦେଇଛନ୍ତି। ଏହା ସହିତ ଉପାନ୍ତରେ ଥିବା ତନଖି ଫାଟକ ଓ ଥାନାଗୁଡିକୁ ଅନ୍ୟ ରାଜ୍ୟକୁ ନ ଛାଡିବା ଲାଗି ନିର୍ଦ୍ଦେଶ ଦିଆଯାଇଛି। ୬ଦିନ ହେଲାଣି ପଶ୍ଚିମବଙ୍ଗ ଆଳୁ ମହାସଂଘ ରପ୍ତାନୀ ବନ୍ଦ ରଖିଛି ା ଫଳରେ ଓଡିଶା, ଝାଡଖଣ୍ଡ, ଛତିଶଗଡ, ବିହାର, ଆସାମ ରାଜ୍ୟକୁ ଆଳୁ ପରିବହନ ସମ୍ପୂର୍ଣ୍ଣ ଭାବେ ବନ୍ଦ ରହିଛି ବୋଲି ପଶ୍ଚିମବଙ୍ଗ ଆଳୁ ମହାସଂଘ ପକ୍ଷରୁ ସୂଚନା ମିଳିଛି ା ଗୁରୁବାର ପଶ୍ଚିମବଙ୍ଗର ପ୍ରଶାସନିକ ଅଧିକାରୀ ଓ ବ୍ୟବସାୟୀ ମହାସଂଘ ମଧ୍ୟରେ ଆରମବାଗଠାରେ ଆଲୋଚନା କରାଯାଇଛି। ଅନ୍ୟପକ୍ଷରେ ଆଳୁ ପରିବହନ ବନ୍ଦ ହୋଇଥିବାରୁ ଜଳେଶ୍ୱର ଅଞ୍ଚଳର ବ୍ୟବସାୟୀମାନେ ଗଡବେତା, ଚନ୍ଦ୍ରକଣା, ବର୍ଦ୍ଧମାନ ଅଞ୍ଚଳରୁ ଆଳୁକୁ ଚୋରାରେ ଆଣି କିଲୋ ପ୍ରତି ୫୦ଟଙ୍କାରେ ବିକ୍ରି କରୁଥିବା ବେଳେ ଗ୍ରାମାଞ୍ଚଳରେ ୬୦ଟଙ୍କା ଛୁଇଁଛି।
ସୂଚନାଯୋଗ୍ୟ, ଜଳେଶ୍ୱରକୁ ପ୍ରତିଦିନ ୮୦ଟନ୍ ଆଳୁ ବିକ୍ରି ପାଇଁ ଆସୁଥିବା ବେଳେ ଓଡ଼ିଶାକୁ ପ୍ରତିଦିନ ୧୨ହଜାର ଟନ୍ ଆଳୁ ଆସୁଥିବା ଜଣାଯାଇଛି। ଓଡ଼ିଶାକୁ ଆଳୁ ପରିବହନ ହେଉ ନ ଥିବାରୁ ଶୁକ୍ରବାରଠାରୁ ଆଳୁର ମୂଲ୍ୟ ଅଧିକ ହେବା ସମ୍ପର୍କରେ ସ୍ଥାନୀୟ ବ୍ୟବସାୟୀମାନେ ଆକଳନ କରୁଛନ୍ତି ା ୨୦୧୪ ମସିହା ପରିସ୍ଥିତି ସୃଷ୍ଟି ହୋଇଥିବାରୁ ଯଥାଶୀଘ୍ର ରାଜ୍ୟ ସରକାର ଆଲୋଚନା ମାଧ୍ୟମରେ ସମସ୍ୟାର ସମାଧାନ କରିବାକୁ ସାଧାରଣରେ ଦାବି ହେଉଛି ା ଅନ୍ୟଥା ଓଡ଼ିଶାରୁ ପଶ୍ଚିମବଙ୍ଗ ଯାଇଥିବା ବିଭିନ୍ନ ଜିନିଷର ପରିବହନ ଉପରେ ଉପାନ୍ତ ଅଞ୍ଚଳରେ ରୋକ ଲଗାଯିବ ବୋଲି ସ୍ଥାନୀୟ ଲୋକେ ସଜବାଜ ହେଉଥିବା ଜଣାଯାଇଛି।
